វីង ពង្រីកសេវាបង់វិក្កយបត្រអគ្គិសនីកម្ពុជា នៅតាមបណ្តាខេត្តជាច្រើន
- 2016-06-28 00:57:28
- ចំនួនមតិ 0 | ចំនួនចែករំលែក 0
វីង ពង្រីកសេវាបង់វិក្កយបត្រអគ្គិសនីកម្ពុជា នៅតាមបណ្តាខេត្តជាច្រើន
ចន្លោះមិនឃើញ
ជាមួយនឹងការប្ដេជ្ញាចិត្តក្នុងការនាំមកនូវសេវាទូទាត់សាច់ប្រាក់តាមប្រព័ន្ធអេឡិចត្រូនិកដែលមានភាពងាយស្រួលសម្រាប់ប្រជាជនកម្ពុជា ធនាគារឯកទេស វីង បានសហការជាដៃគូជាមួយអគ្គិសនីកម្ពុជា (EDC) ដើម្បីផ្ដល់នូវភាពងាយស្រួលចំពោះការបង់វិក្កយបត្រអគ្គិសនីកម្ពុជាតាមរយៈ វីង។ អគ្គិសនីកម្ពុជា និង វីង បានសហការគ្នាពង្រីកនូវសេវាបង់វិក្កយបត្រអគ្គីសនីតាម វីង ទៅកាន់បណ្តាខេត្តមួយចំនួនថែមទៀត។ ឥឡូវនេះ អតិថិជនអាចបង់វិក្កយបត្រអគ្គីសនីតាម វីង នៅខេត្ត-ក្រុងមួយចំនួន ដូចជា ភ្នំពេញ បាត់ដំបង សៀមរាប ព្រះសីហនុ កំពង់ចាម កំពង់ស្ពឺ និងបន្ទាយមានជ័យ។
មានន័យថា អតិថិជនដែលធ្លាប់តែបង់វិក្កយបត្រអគ្គិសនីកម្ពុជានៅការិយាល័យ EDC ដោយផ្ទាល់ គឺអាចទៅបង់វិក្កយបត្រតាម វីង ដោយគ្រាន់តែទៅកាន់ភ្នាក់ងារ វីង ដែលមានជាង ៤០០០ កន្លែងនៅទូទាំងប្រទេស ឬក៏ប្រើប្រាស់គណនី វីង របស់ខ្លួន។
លោក សុខ សម្បត្តិ អាយុ ៣៥ ឆ្នាំ ដែលជាបុគ្គលិកនៅក្នុងក្រុមហ៊ុនឯកជនមួយក្នុងរាជធានីភ្នំពេញ បានឲ្យដឹងថា៖ "ពីមុនខ្ញុំត្រូវទៅតម្រង់ជួររង់ចាំនៅការិយាល័យ EDC ដើម្បីបង់លុយភ្លើងរាល់ខែ។ ពេលបង់ម្តងៗខ្ញុំត្រូវចំណាយពេលវេលា ទាំងការធ្វើដំណើរ ទាំងការរង់ចាំ ហើយខ្ញុំត្រូវជិះត្រលប់ទៅធ្វើការវិញទៀត។ ពេលខ្លះ ភ្លើងត្រូវបានកាត់ផ្ដាច់ដោយសារបង់ថ្លៃភ្លើងយឺត។ ពេលបង់យឺតអញ្ចឹង ត្រូវគេពិន័យទៀត បើអត់បង់លុយពិន័យ គេអត់តភ្លើងឲ្យវិញ។ មានថ្ងៃមួយ អ្នកជិតខាងម្នាក់គាត់ ប្រាប់ខ្ញុំថា គាត់បង់វិក្កយបត្រភ្លើងតាម វីង ហើយខ្ញុំបានសាកល្បងបង់តាម វីង ទើបខ្ញុំដឹងថា វាពិតជាងាយស្រួលមែនទែន ព្រោះខ្ញុំអាចបង់ប្រាក់តាមគណនី វីង តាមទូរសព្ទដៃបានដោយខ្លួនឯង"។
លោក ចូចូ មាឡូឡូស អគ្គនាយកក្រុមហ៊ុន វីង បានឲ្យដឹងថា "សេវាកម្មបង់វិក្កយបត្រអគ្គិសនីនេះគឺធ្វើឲ្យអតិថិជនកាន់តែងាយស្រួលជាងមុន ដោយប្រើប្រាស់តាមប្រព័ន្ធអេឡិចត្រូនិក។ ឥឡូវពួកគេ មិនចាំបាច់ធ្វើដំណើរឆ្ងាយ ត្រូវចំណាយលុយថ្លៃសំបុត្រឡាន ឬក៏ត្រូវតម្រង់ចាំយូរជួរទៀតទេ ពួកគេគ្រាន់តែបង់វិក្កយបត្រអគ្គិសនីនៅតាម វីង គឺជាការស្រេច"។
ដើម្បីបង់វិក្កយបត្រអគ្គិសនី អតិថិជនអាចទៅកាន់ភ្នាក់ងារ វីង មួយណាក៏បានក្នុងតម្លៃសេវាទាបបំផុតត្រឹមតែ ១០០០ រៀល សម្រាប់វិក្កយបត្រ ១០០.០០០ រៀល និងត្រឹមតែ ២០០០ រៀល សម្រាប់វិក្កយបត្រចាប់ពី ១០០.០០០ រៀលឡើងទៅ។ កាន់តែងាយស្រួលជាងនេះទៅទៀតគឺចំណាយកាន់តែតិច ជាមួយនឹងការបង់វិក្កយបត្រ តាមគណនី វីង ដោយឥតគិតថ្លៃសេវាកម្មនោះទេសម្រាប់ការបង់វិក្កយបត្រក្រោម ១០០.០០០ រៀល និងបង់ថ្លៃសេវាចំនួន ១០០០ រៀល សម្រាប់វិក្កយបត្រចាប់ពី ១០០.០០០ រៀលឡើងទៅ។
ដើម្បីប្រើប្រាស់សេវាកម្ម វីង អតិថិជន គ្រាន់តែបង្កើតគណនី វីង ជាមួយភ្នាក់ងារ វីង ណាមួយក៏បាននៅទូទាំងប្រទេស។ បន្ទាប់ពីបង្កើតគណនី វីង រួចអតិថិជនអាចប្រើប្រាស់សេវាកម្ម វីង ជាច្រើននេះ ដូចជា ផ្ទេរប្រាក់ បញ្ចូលលុយទូរសព្ទ បង់វិក្កយបត្រ និងទិញទំនិញអនឡាញជាដើម។ អតិថិជនអាចចូលទៅកាន់សេវាកម្ម វីង តាមរយៈទូរសព្ទរបស់ខ្លួន ដោយគ្រាន់តែចុច *989# ឬក៏ទាញយក កម្មវិធី Wing Money ដោយឥតគិតថ្លៃ ដោយស្វែងរកពាក្យ Wing Money នៅក្នុង App Store ឬ Google Play Store។
វីង គឺជាសេវាកម្មដែលឈានមុខគេលើសេវាទូទាត់សាច់ប្រាក់តាមប្រព័ន្ធអេឡិចត្រូនិក ដូចជា ផ្ទេរប្រាក់ ទូទាត់វិក្កយបត្រ ទិញកាតទូរសព្ទ សេវាបើកប្រាក់បៀវត្ស ការទិញទំនិញអនឡាញ និងវីងគិតលុយ (ឆូតកាត)។ សម្រាប់ព័ត៌មានបន្ថែម សូមចូល www.wingmoney.com ឬទាក់ទង 023 999 989 ៕
អត្ថបទ៖ ពាណិជ្ជកម្ម