ពិធីការិនីល្បីឈ្មោះក្នុងស្រទាប់យុវវ័យកម្ពុជា នឹងបង្ហាញខ្លួនក្នុងកម្មវិធី មុខរបរខ្ញុំ
- 2016-06-28 01:11:39
- ចំនួនមតិ 0 | ចំនួនចែករំលែក 0
ពិធីការិនីល្បីឈ្មោះក្នុងស្រទាប់យុវវ័យកម្ពុជា នឹងបង្ហាញខ្លួនក្នុងកម្មវិធី មុខរបរខ្ញុំ
ចន្លោះមិនឃើញ
ពិធីការិនីល្បីឈ្មោះក្នុងស្រទាប់យុវវ័យកម្ពុជា បានចូលរួមជាមួយកម្មវិធី ជីវិតពិតរបស់ស្ថានីយទូរទស្សន៍ ភីអិនអិន "មុខរបរខ្ញុំ" ក្នុងនាមជាពិធីការិនីកម្មវិធីផ្ទាល់តែម្តង។
កញ្ញា នាង សុវ៉ាន់ណា ដែលមនុស្សភាគច្រើនស្គាល់ថាជា Dj Nana នឹងបង្ហាញវត្តមានរួមគ្នាជាមួយកំពូលតារាភាពយន្តជើងចាស់របស់កម្ពុជា លោក ទេព រិន្ទដារ៉ូ ក្នុងកម្មវិធី "មុខរបរខ្ញុំ" របស់ ភីអិនអិន។
លោក ទេព រិន្ទដារ៉ូ តារាភាពយន្តល្បីមួយរូបរបស់កម្ពុជាដែលទទួលបានការគាំទ្រខ្លាំងដោយមានទេពកោសល្យជាច្រើនឆ្នាំក្នុងវិស័យភាពយន្ត ក៏នឹងត្រលប់មកជាថ្មី ចូលរួមក្នុងកម្មវិធីជីវិតពិតមួយនេះ។
កម្មវិធីរដូវកាលទី១កន្លងមក លោកធ្លាប់បានចូលរួមជាមួយកម្មវិធី ក្នុងនាមជាគណៈកម្មការ ខណៈវត្តមានរបស់លោកក្នុងរដូវកាលទី២នេះ គឺប្លែកពីរដូវកាលទី១ ព្រោះលោក ទេព រិន្ទដារ៉ូ មិនមាននាទីជាគណៈកម្មការទៀតនោះឡើយ។
លោក Jimmy ផលិតករប្រតិបត្តិកម្មវិធី មុខរបរខ្ញុំ បញ្ជាក់ថា "ពួកយើងបានកែតម្រូវលក្ខន្តិកៈបន្តិចពាក់ព័ន្ធនឹងការកំណត់ជោគវាសនាបេក្ខជនដែលត្រូវនៅបន្តក្នុងកម្មវិធី ឬត្រូវចាកចេញពីកម្មវិធី។ Dj Nana រំពឹងនឹងចូលរួមជាមួយបេក្ខជនទាំង១០រូប ក្នុងការប្រជែងជាច្រើន ខណៈលោក ទេព រិន្ទដារ៉ូ នឹងតាមដានការប្រកួតប្រជែងរបស់ពួកគេពីស្ទូឌីយ៉ូ ហើយនឹងសម្រេចចិត្តបោះឆ្នោតថាបេក្ខជនរូបណានឹងត្រូវចាកចេញ"។
ពីបទពិសោធន៍ជោកជាំ និងជោគជ័យជាច្រើនក្នុងប្រព័ន្ធផ្សព្វផ្សាយមកទល់នឹងពេលនេះ Nana ក៏ធ្លាប់បង្ហាញវត្តមានក្នុងកម្មវិធី មុខរបរខ្ញុំ ម្តងរួចមកហើយកាលពីរដូវកាលទី១ ក្នុងនាមជាអ្នកបង្ហាត់បង្ហាញទៅដល់បេក្ខជនក្នុងកម្មវិធី ខណៈរដូវកាលទី២នេះ Nana នឹងដើរតួជាអ្នកដឹកនាំម្នាក់ក្នុងកម្មវិធីវិញម្តង។
Dj Nana បានលើកឡើងថា "កម្មវិធី មុខរបរខ្ញុំ រដូវកាលទី២ របស់ ភីអិនអិន នឹងចាប់ផ្តើមផ្សាយជូនទស្សនាពីថ្ងៃទី៤-កក្កដា ខាងមុខនេះតទៅ ដោយនឹងបង្ហាញជូននូវបេក្ខជនដែលសុទ្ធសឹងតែមានបទពិសោធន៍លើអាជីវកម្មក្នុងជីវិតពិតរបស់ពួកគេ ក៏ដូចជានិស្សិតបញ្ចប់ថ្នាក់ឧត្ដមសិក្សាផ្នែកពាណិជ្ជកម្មជាដើម"។
កិច្ចការចាំបាច់មួយរបស់ Dj Nana គឺធ្វើយ៉ាងណារៀបចំឲ្យចេញជាវិញ្ញាសាប្រជែងសម្រាប់បេក្ខជនទាំង១០រូប។
កម្មវិធីនេះ នឹងផ្សាយជូនរៀងរាល់ថ្ងៃចន្ទ ដល់សុក្រ ចាប់ពីម៉ោង ៨ ដល់ម៉ោង ៨:៣០ នាទីយប់ ផ្តោតសំខាន់លើការប្រកួតប្រជែងពិតប្រាកដមួយទៅក្នុងអាជីវកម្មខ្នាតតូច និងមធ្យម។ សម្រាប់ព័ត៌មានបន្ថែម សូមចូលផេកហ្វេសប៊ុក www.facebook.com/PNNMyPlace ៕
អត្ថបទ៖ ពាណិជ្ជកម្ម