ប៉ូឡូញ ជាក្រុមមួយឡើងដល់វគ្គ៨ក្រុមនៅ Euro 2016 យ៉ាងភ្ញាក់ផ្អើល
- 2016-06-29 13:07:29
- ចំនួនមតិ 0 | ចំនួនចែករំលែក 0
ប៉ូឡូញ ជាក្រុមមួយឡើងដល់វគ្គ៨ក្រុមនៅ Euro 2016 យ៉ាងភ្ញាក់ផ្អើល
ចន្លោះមិនឃើញ
ក្រុមជម្រើសជាតិប៉ូឡូញ បានឡើងលេង Euro ៣សម័យកាលនៅឆ្នាំ២០០៨, ២០១២ និង២០១៦ ប៉ុន្តែពួកគេបានបង្កើតកំណត់ត្រាដ៏អស្ចារ្យ អាចឡើងដល់វគ្គ៨ក្រុមចុងក្រោយ ជាលើកដំបូងក្នុងប្រវត្តិសាស្ត្ររបស់ពួកគេ នៅឆ្នាំ២០១៦នេះ។
ក្រុមជម្រើសជាតិប៉ូឡូញ
១. Euro 2008៖
កាលឆ្នាំ២០០៨ ប៉ូឡូញបានឡើងលេងនៅ Euro ជាលើកដំបូងដែលពេលនោះស្ថិតនៅពូលជាមួយក្រុមក្រូអាត អាល្លឺម៉ង់ និងម្ចាស់ផ្ទះអូទ្រីស។ ឆ្លងកាត់៣ប្រកួតក្នុងពូល ប៉ូឡូញបានចាញ់អាល្លឺម៉ង់ ២-០, ស្មើអូទ្រីស ១-១ និងចាញ់ក្រូអាត ១-០។ ដូច្នេះសរុបមក ៣ប្រកួតបានតែ១ពិន្ទុ ស្ថិតនៅបាតតារាងគេ ធ្លាក់ត្រឹមវគ្គចែកពូល។
២. Euro 2012៖
ឆ្នាំ២០១២ ប៉ូឡូញទទួលបានសិទ្ធិធ្វើជាសហម្ចាស់ផ្ទះ Euro ជាមួយប្រទេសអ៊ុយក្រែន និងស្ថិតនៅពូល A ជាមួយក្រុមសាធារណរដ្ឋឆេក ក្រិក និងរុស្សី។ ឆ្លងកាត់៣ប្រកួតក្នុងពូលស្មើក្រិក ១-១, ស្មើរុស្សី ១-១ និងចាញ់សាធារណរដ្ឋឆេក ១-០។ សរុបមក ៣ប្រកួត បានត្រឹម២ពិន្ទុ នៅបាតតារាង ធ្លាក់វគ្គចែកពូលជាលើកទី២។
៣. Euro 2016៖
Euro 2016 នៅប្រទេសបារាំងឆ្នាំនេះ ប៉ូឡូញជាប់វគ្គជម្រុះឡើងមកលេងជាលើកទី៣ ដោយនៅពូល C ជាមួយក្រុមអាល្លឺម៉ង់ អៀរឡង់ខាងជើង និងអ៊ុយក្រែន។ ៣ប្រកួតក្នុងពូល ប៉ូឡូញបានយកឈ្នះអៀរឡង់ខាងជើង ១-០, ស្មើជាមួយក្រុមជើងឯក World Cup 2014 អាល្លឺម៉ង់ ០-០ និងឈ្នះអ៊ុយក្រែន ១-០ ទៀត។ សរុបមក ប្រកួតបាន៧ពិន្ទុ ស្ថិតនៅលេខ២ក្នុងពូល អាចឡើងទៅវគ្គ១៦ក្រុម។
នៅវគ្គ១៦ក្រុម ប៉ូឡូញបានបន្តឈ្នះស្វីស ដោយបាល់ប៉េណាល់ទីកាត់សេចក្ដី ៥-៤ បន្ទាប់ពីបញ្ចប់ម៉ោងបន្ថែម១៥នាទី២ដង ដោយលទ្ធផលស្មើគ្នា ១-១។
៤. អ្នកស៊ុតចូលទីច្រើនជាងគេនៅ Euro 2016 និងតារាល្បីរបស់ក្រុម៖
ខ្សែបម្រើស្លាបវ័យ៣០ឆ្នាំ Jakub Błaszczykowski របស់ក្លឹប Borussia Dortmund ស៊ុតឲ្យប៉ូឡូញច្រើនគ្រាប់ជាងគេ (២គ្រាប់) នៅ Euro 2016 នេះ ដោយគ្រាប់ដំបូងស៊ុតចូលអ៊ុយក្រែន កាលវគ្គសន្សំពិន្ទុក្នុងពូល និងគ្រាប់ទី២ ស៊ុតស្វីសនៅវគ្គ១៦ក្រុម។
រីឯខ្សែប្រយុទ្ធឆ្នើម Robert Lewandowski របស់ក្លឹប Bayern Munich ដែលឈ្នះស្បែកជើងមាស អ្នកស៊ុតចូលទីច្រើនជាងគេនៅ Bundesliga (៣២ប្រកួត, ស៊ុត៣០គ្រាប់) រដូវកាល២០១៥-២០១៦កន្លងទៅនេះ នៅមិនទាន់រកគ្រាប់ឲ្យជម្រើសជាតិប៉ូឡូញ បាននៅឡើយទេ សម្រាប់ព្រឹត្តិការណ៍ Euro 2016 នេះ។
ចំណែកឯវគ្គ៨ក្រុម Euro 2016 ប៉ូឡូញនឹងត្រូវប៉ះក្រុមព័រទុយហ្គាល់ នៅយប់ថ្ងៃសុក្រខាងមុខ វេលាម៉ោង០២:០០រំលងអាធ្រាត្រ។ ដូច្នេះចាំមើលថា ពួកគេអាចនឹងបង្កើតកំណត់ត្រាអស្ចារ្យទៀត បន្តឡើងទៅវគ្គពាក់កណ្ដាលផ្ដាច់ព្រ័ត្របានឬយ៉ាងណា៕
ប្រែសម្រួល៖ វិន ជីវ័ន្ត ប្រភព៖ SkySports | wiki