ក្រសួងវប្បធម៌ ទទួលយកញត្តិ និងស្នើឲ្យតុលាការពន្លឿនចំណាត់ការបណ្ដឹងរបស់ វ៉ាន់ នីឡា

2016-06-29 00:44:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ឆ្លើយតបនឹងការយកញត្តិទៅដាក់នៅក្រសួងវប្បធម៌រសៀលនេះពីកញ្ញា វ៉ាន់ នីឡា ដែលជាជនរងគ្រោះក្នុងករណីបញ្ចេញរូបភាពអាក្រាតរបស់នាងដោយជន អនាមិក ក្រសួងបានទទួលយកញត្តិនោះហើយ ហើយថែមទាំងបានសន្យាថា នឹងជួយសម្រួលតាមមើលករណីនេះផង។

ឯកឧត្ដម ថៃ នរៈសត្យា តាងនាមឲ្យលោកជំទាវរដ្ឋមន្ត្រី បានមានប្រសាសន៍ថា បន្ទាប់ពីទទួលបានញត្តិពី វ៉ាន់ នីឡា អមដំណើរដោយសមាគមសិល្បករ រួមជាមួយសិល្បករ សិល្បការិនីមួយចំនួនទៀត ក្រសួងសូមស្នើឲ្យស្ថាប័នមានសមត្ថកិច្ចដែលកំពុងដំណើរការបណ្ដឹង សូមជួយពន្លឿនចំណាត់ពីបណ្ដឹងនេះ ដើម្បីឲ្យតារាចម្រៀង វ៉ាន់ នីឡា បានទទួលនូវយុត្តិធម៌។

ឯកឧត្ដម នៅបន្តទៀតថា ក្រសួងនឹងចាំឃ្លាំមើលពីដំណើរការបណ្ដឹងមួយនេះផងដែរ ជាមួយនឹងការលើកសរសើរពីភាពរឹងមាំរបស់កញ្ញា វ៉ាន់ នីឡា ផង ដែលតាំងចិត្តមុតមាំប្រឈមនឹងបញ្ហាដែលកើតឡើង។ ងាកមកលោក សុះ ម៉ាច ប្រធានសមាគមសិល្បករខ្មែរ ដែលជូនដំណើរ វ៉ាន់ នីឡា យកញត្តិទៅដាក់នៅក្រសួង បានមានប្រសាសន៍ថា នេះគឺជាអ្វីដែលលោកចង់បាន និងសង្ឃឹមថា ចំណាត់លើបណ្ដឹងរបស់តារាចម្រៀងរងគ្រោះ ឆាប់ទទួលបានលទ្ធផល។

សាមីខ្លួន វ៉ាន់ នីឡា បានឆ្លើយតបនឹងអ្នកសារព័ត៌មានថា នាងមានអារម្មណ៍កក់ក្ដៅ ចំពោះជំនួយពីគ្រប់មជ្ឈដ្ឋាន ពិសេសក្រសួង។ កញ្ញា បញ្ជាក់ថា បានស្គាល់ច្បាស់នូវបុគ្គលដែលបញ្ចេញរូបអាក្រាតរបស់នាង ប៉ុន្តែអ្វីៗត្រូវរង់ចាំអន្តរាគមន៍ពីតុលាការដោយផ្អែកលើភស្តុតាងនានាសិន។

នៅរសៀលនេះ ដឹកនាំដោយសមាគមសិល្បករ វ៉ាន់ នីឡា បានយកញត្តិថ្កោលទោសជនល្មើល ដែលមានស្នាមមេដៃរបស់សិល្បករខ្មែរប្រមាណជា ៣០០នាក់ដាក់ជូនទៅក្រសួងវប្បធម៌ និងវិចិត្រសិល្បៈ។ តាមញត្តិនេះ គឺដើម្បីសុំការគាំទ្រចំពោះចំណាត់ការរបស់សមត្ថកិច្ចលើករណីរបស់កញ្ញា វ៉ាន់ នីឡា៕

អត្ថបទ៖ ទារិកា

Video Live៖ សំ ជំនាញ