សហព័ន្ធកីឡាអេឡិចត្រូនិក បង្កើតជាផ្លូវការនៅកម្ពុជា
- 2014-10-30 23:22:57
- ចំនួនមតិ 0 | ចំនួនចែករំលែក 0
សហព័ន្ធកីឡាអេឡិចត្រូនិក បង្កើតជាផ្លូវការនៅកម្ពុជា
ចន្លោះមិនឃើញ
មហាសន្និបាតលើកទី១ត្រូវបានរៀបចំឡើងដើម្បីប្រកាសបង្កើត«សហព័ន្ធកីឡាអេឡិចត្រូនិកកម្ពុជា (E-Sports Federation Cambodia«EFC»)ជាផ្លូវការស្របតាមគោលនយោបាយកីឡាជាតិ និងគោលការណ៍កីឡា E-Sports អន្តរជាតិ។ មហាសន្និបាតនេះក្រោមអធិបតីភាពឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជានៅទីស្តីការគណៈកម្មាធិការជាតិអូឡាំពិកកម្ពុជាដែលប្រព្រឹត្តទៅនាថ្ងៃទី៣០ខែតុលាឆ្នាំ២០១៤។
ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានលើកឡើងថា ការបង្កើតឲ្យមានសហព័ន្ធកីឡាអេឡិចត្រូនិកកម្ពុជាពិតជាចូលរួមចំណែកក្នុងការអភិវឌ្ឍវិស័យកីឡានៅប្រទេសកម្ពុជា ស្របពេលកីឡានេះកំពុងរីកចម្រើនទូទាំងពិភពលោក។
ឯកឧត្តមបានឲ្យដឹងថា ៖«ឆ្នាំ២០០៩ ខ្ញុំបានចូលរួមព្រឹត្តិការណ៍កីឡា Asian and Indoor Games ពេលនោះសហព័ន្ធកីឡាទ្វីបអាស៊ីមានរៀបចំការប្រកួតកីឡាអេឡិចត្រូនិក ខ្ញុំបានភ្ញាក់ខ្លួន អ...យើងអត់មាន ហើយគេសុំឲ្យយើងបង្កើត ព្រោះនៅទ្វីបអាស៊ី និងអាស៊ានមានច្រើនប្រទេសហើយ។ ប៉ុន្មានឆ្នាំចុងក្រោយនេះ យើងចង់បង្កើតវាឲ្យចេញ តែយើងខ្វះធនធានមនុស្ស។ ទើបតែពេលយើងបានសហការជាមួយក្រុមហ៊ុន Sabay ដើម្បីរៀបចំបង្កើតជាផ្លូវការឡើង ពីព្រោះ Sabay មានធនធានស្រាប់»។
គណៈកម្មាធិការជាតិអូឡាំពិកកម្ពុជាមានមោទនភាពណាស់ដែលបានកំពុងធ្វើឲ្យវិស័យកីឡាមានភាពសំបូរបែបនៅក្នុងប្រទេសកម្ពុជា ស្របពេលដែលកីឡាជាវិស័យមួយមានចរាចរណ៍ទឹកប្រាក់នៅលើពិភពលោកច្រើនជាវិស័យសិល្បៈទៀត។ ឯកឧត្តមបានបន្ថែមដោយបានបញ្ជាក់ថា ៖«ម្យ៉ាងទៀតយើងបង្កើតសហព័ន្ធកីឡាអេឡិចត្រូនិកនេះគឺសមស្របតាមសម័យកាលបច្ចេកវិទ្យាទំនើប ហើយកីឡាក៏មានការវិវឌ្ឍឈានទៅរកភាពទំនើបកម្មដ៏សំបូរបែប»។
ឯកឧត្ដមបានបង្ហាញពីសមាសភាពគណៈកម្មាធិការប្រតិបត្តិនៃសហព័ន្ធកីឡាអេឡិចត្រូនិកកម្ពុជាសម្រាប់អាណត្តិទី១រយៈពេល៤ឆ្នាំ(២០១៤-២០១៨)មាន៩រូបគឺលោក ជី សិលា ជាប្រធាន លោក ង៉ោ សាង ជាអនុប្រធាន លោក លន់ សាមឌី ជាអគ្គលេខាធិការ និងលោក ជាន ចាន់រ៉ា ជាអគ្គលេខាធិការរង។ លោកស្រី ឡុង សុម៉ាលី ជាហិរញ្ញិក និងសមាជិក៤រូបទៀតគឺលោក វ៉ាន់ សំបូរ, លោកស្រី ជ វុទ្ធីរ៉ាន, លោក ហ៊ុយ អៀវ និងលោកចាន់ សុវណ្ណារិទ្ធ។
លោក ជី សិលា ប្រធានសហព័ន្ធកីឡាអេឡិចត្រូនិកកម្ពុជាបានលើកឡើងថា ការបង្កើតសហព័ន្ធកីឡាអេឡិចត្រូនិកនេះឡើងគឺបញ្ជាក់ឲ្យឃើញពីភាពរីកចម្រើនវិស័យកីឡានៅក្នុងព្រះរាជាណាចក្រកម្ពុជាក្រោមការដឹកនាំរបស់រាជរដ្ឋាភិបាលកម្ពុជា ព្រមទាំងជំរុញលើការអភិវឌ្ឍ និងផ្សព្វផ្សាយកីឡាអេឡិចត្រូនិកនៅកម្ពុជាឲ្យស្របតាមគោលនយោបាយកីឡាជាតិ និងគោលការណ៍កីឡា E-Sports អន្តរជាតិ។
លោកបានបន្ថែមថា ៖«កីឡាអេឡិចត្រូនិកនឹងជួយបណ្ដុះប្រាជ្ញា ស្មារតី និងភាពឆ្លាតវ៉ៃរបស់អត្តពលិក ហើយជំរុញនិងលើកកម្ពស់កីឡាអេឡិចត្រូនិកតាមរយៈតម្លៃនៃមនុស្សជាតិអប់រំវប្បធម៌សាមគ្គីនិងសន្តិភាព។ លើសពីនេះ យើងនឹងរៀបចំការប្រកួតថ្នាក់ជាតិ និងអន្តរជាតិ ដោយប្រកាន់ភ្ជាប់នូវនិយាមបច្ចេកទេស (Fair Play»។
លោកប្រធានបានរំលឹកពីប្រវត្តិកីឡា E-Sports ថា កីឡាអេឡិចត្រូនិកត្រូវបានគេស្គាល់និងរៀបចំការប្រកួតដំបូងតាំងពីឆ្នាំ១៩៧២នៅសហរដ្ឋអាមេរិក។ បន្ទាប់មក សហព័ន្ធកីឡាអេឡិចត្រូនិកអន្តរជាតិ«IeSF»ត្រូវបានបង្កើតឡើងនៅឆ្នាំ២០០៨ ដោយមានសមាគមកីឡាអេឡិចត្រូនិកចំនួន៩គឺដាណឺម៉ាក កូរ៉េខាងត្បូង អាល្លឺម៉ង់ អូទ្រីស បែលហ្ស៊ិក ហុល្លង់ ស្វីស វៀតណាម និងកោះតៃវ៉ាន់។
សហព័ន្ធអន្តរជាតិនេះមានទីស្នាក់ការកណ្ដាលនៅប្រទេសកូរ៉េខាងត្បូងដែលបច្ចុប្បន្នមានសមាជិកចំនួន៤៦ប្រទេសនៅលើពិភពលោកក្នុងនោះទ្វីបអឺរ៉ុបមាន២១ ប្រទេស ទ្វីបអាស៊ីមាន១៧ប្រទេស ទ្វីបអាហ្វ្រិកមាន៤ប្រទេស ទ្វីបអាមេរិកមាន៣ប្រទេស និងទ្វីបអូសេអានីមាន១ប្រទេស។
ចំណែកនៅតំបន់អាស៊ីអាគ្នេយ៍ (អាស៊ាន)មានប្រទេសចំនួន៦បានចូលជាសមាជិកសហព័ន្ធកីឡាអេឡិចត្រូនិកអន្តរជាតិរួចហើយគឺឥណ្ឌូណេស៊ី, ម៉ាឡេស៊ី, ហ្វីលីពីន, សិង្ហបុរី, ថៃ និង វៀតណាម ដែលបានចូលរួមការប្រកួតជាលក្ខណៈអន្តរជាតិជារៀងរាល់ឆ្នាំ៕
អត្ថបទ៖ ម៉ឺន រស្មី