Ezecom ឧបត្ថម្ភកម្មវិធី Hub Academy លើកកម្ពស់សហគ្រិនភាពនៅកម្ពុជា
- 2016-07-21 21:06:10
- ចំនួនមតិ 0 | ចំនួនចែករំលែក 0
Ezecom ឧបត្ថម្ភកម្មវិធី Hub Academy លើកកម្ពស់សហគ្រិនភាពនៅកម្ពុជា
ចន្លោះមិនឃើញ
សហគ្រិនវ័យក្មេងនៅកម្ពុជា បានឆ្លងកាត់វគ្គបណ្ដុះបណ្ដាលភាពជាអ្នកដឹកនាំ និងការកសាងក្រុម (Leadership and Team Building) កាលពីចុងសប្តាហ៍កន្លងទៅ ដែលជាផ្នែកមួយនៃកម្មវិធី Hub Academy រៀបចំដោយ Impact Hub Phnom Penh និងឧបត្ថម្ភដោយក្រុមហ៊ុនផ្គត់ផ្គង់សេវាអ៊ីនធឺណិតលំដាប់ខ្ពស់នៅកម្ពុជា អ៊ីហ្ស៊ីខម (Ezecom)។
យុវជនវ័យក្មេង២៣រូប ត្រូវបានជ្រើសរើសសម្រាប់ចូលរួមក្នុងកម្មវិធីសិក្សារយៈពេលពេញ១ឆ្នាំ ដើម្បីមានលទ្ធភាពសិក្សាស្វែងយល់ពីរបៀបនៃការប្រើប្រាស់សក្តានុពលរបស់ពួកគេ សំដៅធ្វើយ៉ាងណាក្លាយខ្លួនជាអ្នកដឹកនាំសហគមន៍ ឬអ្នកគ្រប់គ្រងអាជីវកម្មនៅពេលអនាគត។
លោក ហង្ស សៀងហេង ដែលកំពុងបម្រើការងារក្នុងក្រុមហ៊ុន QuanDat តែមានបំណងបើកអាជីវកម្មផ្ទាល់ខ្លួននៅថ្ងៃណាមួយនោះ បានឲ្យដឹងថា ការចូលរួមក្នុងកម្មវិធីបណ្ដុះបណ្ដាលនាចុងសប្តាហ៍នេះ បានធ្វើឲ្យលោកមានឱកាសចែករំលែកគំនិតយោបល់ និងកសាងទំនាក់ទំនងជាមួយអ្នកដែលមានគំនិតអាជីវកម្មដូចគ្នា។ លោកថា៖ "នៅក្នុងបរិយាកាសមួយដែលមានមនុស្សផ្តល់គំនិតល្អៗ និងមានឆន្ទៈចែករំលែកបទពិសោធន៍នោះ គឺពិតជាបានជួយឲ្យខ្ញុំយល់កាន់តែច្បាស់ពីបញ្ហាផ្សេងៗ ដែលខ្ញុំចាំបាច់ត្រូវធ្វើ ដើម្បីឲ្យអាជីវកម្មរបស់ខ្ញុំទទួលបានជោគជ័យ"។
លោកបន្តថា៖ "ភាពជាអ្នកដឹកនាំគឺជាគន្លឹះដ៏សំខាន់មួយ។ ដូច្នេះនៅចុងសប្តាហ៍នេះ ខ្ញុំបានរៀនសូត្រច្រើនពីរបៀបក្លាយខ្លួនជាអ្នកដឹកនាំម្នាក់ ហើយដែលខ្ញុំអាចយកទៅអនុវត្តបានទាំងនៅក្នុងការងារបច្ចុប្បន្ន និងនៅពេលដែលខ្ញុំមានអាជីវកម្មផ្ទាល់ខ្លួន។ ភាពជាអ្នកដឹកនាំមិនសំដៅលើការធ្វើអ្វីៗគ្រប់យ៉ាងបានដោយខ្លួនឯងនោះទេ ផ្ទុយទៅវិញការកសាងក្រុមដ៏រឹងមាំមួយដែលនៅជុំវិញខ្លួនអ្នកក្នុងការសម្រេចបានចក្ខុវិស័យរួមនោះ ក៏ជាកត្តាសំខាន់ផងដែរ"។
កម្មវិធីនៅចុងសប្តាហ៍នេះ រួមមានការពិភាក្សាជាក្រុម ការសិក្សាពីដំណោះស្រាយផ្សេងៗទាក់ទងនឹងការបង្កើតអាជីវកម្មដែលជោគជ័យ ដោយសង្កត់ធ្ងន់លើអាជីវកម្មដែលមានការទទួលខុសត្រូវក្នុងសង្គម និងផ្តល់ផលវិជ្ជមានដល់សហគមន៍របស់ខ្លួន។
លោក Yves Schaeffer អគ្គនាយកក្រុមហ៊ុន Ezecom ថ្លែងថា ដោយសារ Ezecom ឈរលើទស្សនៈនៃការធ្វើអាជីវកម្មដែលមានការទទួលខុសត្រូវចំពោះសង្គមនោះ ទើបធ្វើឲ្យក្រុមហ៊ុនឧបត្ថម្ភក្នុងកម្មវិធីនេះ។
លោកថា៖ "យើងជាក្រុមហ៊ុនមួយក្នុងចំណោមក្រុមហ៊ុនដំបូងគេនៅកម្ពុជា ដែលបង្កើតឲ្យមានកម្មវិធីជួយដល់សង្គម។ ដូច្នេះ យើងពិតជារីករាយណាស់ ដែលឃើញម្ចាស់អាជីវកម្មជំនាន់ក្រោយយល់ដឹង និងអនុវត្តគោលការណ៍នេះទៅក្នុងអាជីវកម្មរបស់ពួកគេ។ ដើម្បីបង្កើតអាជីវកម្មមួយដែលមានការទទួលខុសត្រូវនោះ ចាំបាច់យើងត្រូវធ្វើឲ្យអាជីវកម្មរបស់យើងជោគជ័យជាមុនសិន។ នៅពេលខ្ញុំក្រឡេកឃើញយុវជនដែលមានទេពកោសល្យក្នុងកម្មវិធីនេះ ខ្ញុំពិតជារីករាយចំពោះអនាគតកម្ពុជា ព្រោះពួកគេមិនត្រឹមតែមានផែនការអាជីវកម្មដ៏គួរឲ្យទាក់ទាញប៉ុណ្ណោះទេ ថែមទាំងយល់ដឹងអំពីនីតិវិធីនៃការធ្វើអាជីវកម្មថែមទៀត"។
អ្នកសម្របសម្រួលកម្មវិធី Hub Academy អ្នកនាង Laura Smitheman បានឲ្យដឹងថា កម្មវិធីនេះលើសពីកម្មវិធីរៀននៅក្នុងថ្នាក់ទៅទៀត ដោយសារអ្នកចូលរួមមានឱកាសបានជួប និងកសាងមិត្តភាពយូរអង្វែងជាមួយអ្នកចូលរួមដទៃទៀត ហើយពួកគេក៏មានការជួយជ្រោមជ្រែងពីអ្នកសម្របសម្រួល អ្នកណែនាំ (Mentor) និងសហការី ដើម្បីវាស់ស្ទង់ពីសមត្ថភាពដឹកនាំ ជំនាញស្រាវជ្រាវ និងទំនាក់ទំនងរបស់ពួកគេថែមទៀត។
អ្នកនាង Smitheman ថា៖ "គោលបំណងនៃកម្មវិធីនេះ គឺយើងធ្វើការជាមួយមនុស្សវ័យក្មេងដែលចាប់អារម្មណ៍អំពីការធ្វើអាជីវកម្មដែលមានការទទួលខុសត្រូវចំពោះសង្គម ប៉ុន្តែពួកគេមិនដឹងថាត្រូវចាប់ផ្តើមពីកន្លែងណាទៅ។ ដូច្នេះ យើងផ្តល់នូវវិធីសាស្ត្រផ្សេងៗទាក់ទងនឹងបញ្ហានេះ ហើយពួកគេចាំបាច់ត្រូវអនុវត្តតាម ដើម្បីយល់កាន់តែច្បាស់ពីឱកាស និងឧបសគ្គនានានៅពេលធ្វើអាជីវកម្ម។ យើងក៏បានបង្ហាញពីរបៀបនៃការច្នៃប្រឌិតថ្មីសម្រាប់សង្គម ដែលពួកគេអាចយកទៅប្រើប្រាស់បាន ដើម្បីបង្កើនការយល់ដឹងរបស់ពួកគេផងដែរ។ កម្មវិធីបណ្តុះបណ្តាលនេះ បានចេញជាលទ្ធផលហើយ ដោយសមាជិកក្រុម Hub Academy ឈ្មោះ Krumpet.com ត្រូវបានប្រកាសជាសហគ្រិនសង្គមឆ្នើម ក្នុងចំណោមសហគ្រិនសង្គមទាំង១២០ក្រុមរបស់កម្មវិធី watch for in 2016 ដែលជាផ្នែកមួយនៃកម្មវិធី DBS-National University of Singapore Social Venture Challenge ។ សមាជិកក្រុមនេះ បានលើកពីដំណោះស្រាយបញ្ហាតម្លាភាព និងមធ្យោបាយក្នុងការទទួលបានព័ត៌មានផ្នែកវេជ្ជសាស្ត្រនៅកម្ពុជា។
Ezecom ត្រូវបានបង្កើតឡើង ដើម្បីបម្រើសេចក្ដីត្រូវការរបស់បណ្តាសហគ្រាសអាជីវកម្មទាំងឡាយ ព្រមទាំងអ្នកប្រើប្រាស់នៅតាមគេហដ្ឋានដែលកំពុងកើនឡើងយ៉ាងឆាប់រហ័សក្នុងទីផ្សារកម្ពុជា។ ចាប់តាំងកកើតឡើងក្នុងឆ្នាំ២០០៧ Ezecom បានក្លាយជាអ្នកនាំមុខគេមួយក្នុងការផ្គត់ផ្គង់សេវាកម្មផ្នែកទំនាក់ទំនងថ្មីៗយ៉ាងសម្បូរបែប។ ក្រុមហ៊ុនផ្តល់នូវសេវាខ្សែកាប្លិ៍អុបទិក ទំនាក់ទំនងជាសំឡេងតាមអ៊ីនធឺណិត (VoIP) ការតភ្ជាប់ក្នុងស្រុក (VPN) និងដំណោះស្រាយតាមអ៊ីនធឺណិត និងទូរគមនាគមន៍ដទៃទៀត។ Ezecom បានទិញយកក្រុមហ៊ុនខ្សែកាប្លិ៍អុបទិក Telcotech ដែលនឹងនាំមកនូវសេវាអ៊ីនធឺណិតល្បឿនលឿន និងទុកចិត្តបំផុតមកកាន់កម្ពុជានៅឆ្នាំក្រោយនេះ តាមរយៈការបង្កើតខ្សែកាប្លិ៍អុបទិកក្រោមបាតសមុទ្រម៉ាឡេស៊ី-កម្ពុជា-ថៃ (MCT)៕
អត្ថបទ៖ ពាណិជ្ជកម្ម