យុទ្ធនាការ ៣ម៉ឺនដុល្លារទ្រទ្រង់ល្ខោនស្បែកធំ សម្បត្តិUNESCO

2016-07-22 17:51:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុម "ភ្លើងគប់" កំពុងធ្វើយុទ្ធនាការស្វែងរកថវិកាឱ្យបាន ៣ម៉ឺនដុល្លារ សម្រាប់ទ្រទ្រង់ សម្បត្តិបេតិកភណ្ឌពិភពលោកអរូបី នៃអង្គការយូណេស្កូ "ល្ខោនស្រមោលស្បែកធំ" នៃសមាគមសិល្បៈសុវណ្ណភូមិ របស់លោកគ្រូ ម៉ាន់ កុសល ។

បើតាមតំណាងក្រុមកញ្ញា រិទ្ធី លំអរពេជ្រ បាននិយាយថា យុទ្ធនាការនេះចាប់ផ្ដើមម្សិលមិញ ហើយបន្តរហូតដល់រយៈ ៣ ខែក្នុងសកម្មភាពរៃអង្គាសរកមូលនិធិទាំងក្នុង និងក្រៅប្រទេស។ "យើងនឹងធ្វើឱ្យសមាគមសុវណ្ណភូមិមានលុយគ្រប់គ្រាន់ ព្រោះបើគ្មានលុយគ្រប់គ្រាន់ការសម្ដែងពិតជាធ្លាក់ចុះ គុណភាពសិល្បករក៏ធ្លាក់ចុះដែរ"។ លំអរពេជ្រ ថ្លែងមកកាន់ Sabay។

យុវតីរូបនេះបន្ថែមថា ដោយសារទីតាំងជួលគេរបស់សមាគមកាន់តែឡើងថ្លៃទាមទារការចំណាយកាន់តែច្រើនមួយកម្រិតទៀត។ សមាគមក៏មានគម្រោងរៀបចំទស្សនីយភាពធំៗចំនួនពីនៅពេលខាងមុខផងដែរ ដើម្បីចូលរួមអបអរសម្រាប់ឱកាសគម្រប់ខួប១១ឆ្នាំក្នុងដាក់បញ្ចូលល្ខោនស្បែកធំជាសម្បត្តិបេតិកភណ្ឌពិភពលោកអរូបីនៃអង្គការយូណេស្កូថ្ងៃទី១៧តុលា ២០១៦ខាងមុខនេះ។

លំអរពេជ្រ បានបន្តថា រហូតមកដល់ពេលនេះ នាងរកបានក្រុមការងារស្នូលដើម្បីចូលរួមជួយបន្តនិរន្តរភាពសមាគមបានហើយ ដោយពួកគេធ្វើការដោយស្ម័គ្រចិត្តមិនយកប្រាក់កម្រៃនោះទេ។ ជាមួយគ្នានោះយុវតីខាងលើក៏ស្នើដល់មហាជនទូទៅមានការគាំទ្រ និងចូលរួមក្នុងយុទ្ធនាការនេះក៏ដូចជាគាំទ្រដល់ល្ខោនស្រមោលស្បែកធំនៅសមាគមសុវណ្ណភូមិ ព្រោះជួបការខ្វះខាតរយៈពេល ២០ឆ្នាំមកហើយ៕