បើករថយន្តបុកចូលទីសក្ការដ៏ល្បីឈ្មោះនៅថៃរបួស៥នាក់
- 2016-07-23 15:59:26
- ចំនួនមតិ 0 | ចំនួនចែករំលែក 0
បើករថយន្តបុកចូលទីសក្ការដ៏ល្បីឈ្មោះនៅថៃរបួស៥នាក់
ចន្លោះមិនឃើញ
បុរសម្នាក់ បានបើករថយន្តបុកចូលទីកន្លែងសក្ការដ៏ល្បីឈ្មោះនៅទីក្រុងបាងកកឈ្មោះ អេរ៉ាវ៉ាន់ (Erawan Shrine) កាលពីយប់មិញបណ្ដាលឲ្យរងរបួសមនុស្ស៥នាក់។
ភ្លាមៗក្រោយកើតហេតុ ក្រុមជួយសង្គ្រោះ និងប៉ូលិសបានព្យាយាមយកអ្នករបួសទៅមន្ទីរពេទ្យ ហើយជនបង្ក បានសន្លប់បាត់ស្មារតីនៅក្នុងរថយន្តស៊េរី Toyota Corona ដែលមានកូនស្រីអាយុខ្ទង់២០ឆ្នាំនៅជាមួយផង។
បើតាមប៉ូលិសបានឲ្យដឹងថា បុរសជាអ្នកបើករថយន្តមានឈ្មោះ Kanuengnit Techoran វ័យ៥៤ឆ្នាំ ហើយជនរងគ្រោះដែលរងរបួស សុទ្ធតែជាភ្ញៀវទេសចរបរទេស ក្នុងនោះរួមមាន ភ្ញៀវជនជាតិចិនម្នាក់, ម៉ាឡេស៊ី ២នាក់ និងសិង្ហបុរី ២នាក់។ គេមិនទាន់ដឹងមូលហេតុដែលនាំឲ្យមានការបើកឡានបុកចូលទីកន្លែងសក្ការខាងលើនៅឡើយទេ។
ទីសក្ការអេរ៉ាវ៉ាន់ ជាទីអារាមឧទ្ទិសដល់ ហិណ្ឌូព្រហ្មសាសនានៅកណ្ដាលទីក្រុងបាងកក តែពេញនិយម សម្រាប់អ្នកកាន់ព្រះពុទ្ធសាសនា ហើយមានទេសចររាប់រយនាក់ចូលទស្សនា និងបន់ស្រន់ជារៀងរាល់ថ្ងៃ។ កាលពីឆ្នាំមុន ទីនេះធ្លាប់មានអំពើភេរវកម្មមួយកើតឡើង គឺការបំផ្ទុះគ្រាប់បែកដែលសម្លាប់មនុស្សអស់២០នាក់ (ភាគច្រើនជាតិជនជាតិចិន) និងរបួសជាច្រើននាក់៕
ប្រែសម្រួល៖ វីរ៉ុត ប្រភព៖ Khaosodenglish