អេនឌី កាណាដា កោះហៅឲ្យចូលស្ថានទូត
- 2016-07-23 16:23:32
- ចំនួនមតិ 0 | ចំនួនចែករំលែក 0
អេនឌី កាណាដា កោះហៅឲ្យចូលស្ថានទូត
ចន្លោះមិនឃើញ
តាមការបញ្ជាក់របស់សាមីខ្លួន លោក អេនឌី ត្រូវបានស្ថានទូតកាណាដា នៅប្រទេសកម្ពុជា បានកោះហៅលោកកាលប៉ុន្មានថ្ងៃមុននេះ ក្រោយលោកបានដាក់ពាក្យស្នើសុំចេញទៅច្រៀងរយៈពេលខ្លីនៅកាណាដា។
ក្រោយការស្នើសុំនោះ ស្ថានទូត បានសម្រេចផ្ដល់ទិដ្ឋាការ ២ខែឲ្យតារាចម្រៀង និងសម្ដែងខាងលើ បានចូលទៅប្រទេសគេ ធ្វើបេសកកម្មសិល្បៈតាមការស្នើសុំ។ ម្ចាស់បទ "នឹកបង៥០%" ផងរូបនេះបានអះអាងថា មានតែលោកម្នាក់ប៉ុណ្ណោះ ដែលស្ថានទូតមួយនេះ សម្រេចផ្ដល់ទិដ្ឋាការឲ្យ ក្រៅពីនេះគ្មានឡើយ សូម្បីតារាស្រីម្នាក់ដែលបានទៅដាក់ពាក្យសុំ នៅស្ថានទូតកាណាដានាប្រទេសបារាំង ក៏មិនបានជាប់ដែរ។
យ៉ាងណា លោកមិនដឹងពីការសម្រេចឲ្យលោកចូលប្រទេសគេនាគ្រានេះទេ ដោយផ្អែកលើហេតុផលអ្វីខ្លះទេ។ អេនឌី បានប្រាប់ឲ្យដឹងថា លោកត្រេកអរដោយសារបានទៅកាន់ប្រទេសមួយនេះជាលើកទី១ ចាប់តាំងពីប្រឡូកសិល្បៈមក។ ប៉ុន្តែលោក ក៏សោកស្ដាយខ្លះដែរ ដែលស្ថានទូតផ្ដល់វីហ្សាឲ្យរយៈពេលខ្លីត្រឹមតែ២ខែ។
“ខ្ញុំគម្រោងទៅខែ៩ ដល់គេឲ្យតែ២អីចឹង ទាល់តែស្រូតទៅ មិនអីចឹងហួសហើយ តែហួស សុំគេលើកក្រោយប្រាកដជាពិបាកហើយបង អីចឹងត្រូវតែទៅ!”។ តារាប្រុសដែលទើបត្រឡប់មកពីប្រទេសជប៉ុនរូបនេះ ប្រាប់ទៀត ដោយសារវីហ្សាមានរយៈពេល ត្រឹមតែ២ខែ ឥឡូវលោករកបាន Sponsor ហើយ ហើយគ្រោងនឹងចេញទៅនៅថ្ងៃទី ០៦ សីហា ខាងមុខ។
រូបភាព៖ FB អេនឌី
ក្រៅពីអេនឌី ដែលជាសិល្បករខ្មែរម្នាក់ត្រៀមទៅបរទេស នៅមានសិល្បករខ្មែរមួយក្រុមទៀត គ្រោងចេញទៅប្រទេសបារាំងដែរ ក្នុងនោះមានលោក ម៉ាដូណា ករុណា ពេជ្រ និងតារាប្រុសស្រីមួយចំនួនទៀត។ ម៉ាដូណា ដែលបានបញ្ចេញព័ត៌មាននេះលើបណ្ដាញសង្គម ប្រាប់ថា បើមិនមានអ្វីប្រែប្រួល ពួកលោកនឹងចេញដំណើរនៅថ្ងៃទី២៨ កក្កដាខាងមុខ។
យ៉ាងណា ត្រឹមយប់មិញនេះ គេឃើញលោក ករុណា ពេជ្រ បានបង្ហោះរូបថា លោកបានទៅដល់ប្រទេសបារាំងរួចទៅហើយ៕
អត្ថបទ៖ទារិកា