ព្រឹកនេះចាស់ទុំ ប្រាក់ មុន្នីឧត្តម ចូលចែចូវមិត្តស្រីឈ្មោះ រ័ត្ន ហើយ

2016-07-24 17:40:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាស់ទុំរបស់តារាឆ្នើមជម្រើសជាតិកម្ពុជា និងព្រះខ័នរាជស្វាយរៀង ប្រាក់ មុន្នីឧត្តម បានចូលជួបចាស់ទុំខាងមិត្តស្រីដ៏ស្រស់ស្អាតរបស់ខ្លួនហើយ ដែលពិធីនេះទើបរៀបចំឡើងនាព្រឹកថ្ងៃអាទិត្យ ទី២៤ ខែកក្កដា នេះ។

តាមការឲ្យដឹងពីលោក សំ វ៉ាន់ដេត គ្រូបង្វឹកព្រះខ័នរាជស្វាយរៀងថា ប្រាក់ មុន្នីឧត្តម បានហៅចាស់ទុំរបស់ខ្លួនមកចូលមើល ដើម្បីគ្រោងរៀបចំពិធីភ្ជាប់ពាក្យជាមួយនារីដ៏ស្រស់ស្អាតឈ្មោះ ប្រាក់ ស្រីរ៏័ត្ន។ ពិធីខាងលើត្រូវបានធ្វើឡើងនៅខណ្ឌឬស្សីកែវ រាជធានី ភ្នំពេញ។

លោកគ្រូបង្វឹកក្រុមព្រះខ័នរាជស្វាយរៀងបានបញ្ជាក់ទៀតថា តាមការគ្រោងទុក ប្រាក់ មុន្នីឧត្តម នឹងរៀបចំមង្គលការជាមួយគូដណ្តឹងនៅថ្ងៃទី២២ ខែមករា ឆ្នាំ២០១៧ខាងមុខនេះ។

នារីដ៏ស្រស់សោភា ប្រាក់ ស្រីរ័ត្ន និង ប្រាក់ មុន្នីឧត្តម ត្រូវបានគេដឹងថា មានទំនាក់ទំនងគ្នាយូរហើយ ហើយកីឡាកររូបគេនេះក៏មិនលាក់លៀមចំពោះស្នេហាដ៏ស្មោះស្ម័គ្ររបស់គេដែរដោយបានបង្ហោះរូបថតស្និទ្ធស្នាលជាមួយគ្នានៅលើ Facebook ជាសាធារណៈថែមទៀតផង៕