Mourinho៖ "ខ្ញុំសុខចិត្តចាញ់នៅប្រកួតមិត្តភាព កុំឲ្យតែ...”

2016-07-25 15:42:45
ចំនួនមតិ 0 | ចំនួនចែករំលែក 0

ចន្លោះមិនឃើញ

Jose Mourinho អ្នកចាត់ការក្រុម Manchester United បានលើកឡើងថា ក្រុមបិសាចក្រហមរបស់លោក សុខចិត្តចាញ់នៅប្រកួតមិត្តភាព កុំឲ្យតែកីឡាករមានរបួស ព្រោះនៅតែ៣សប្ដាហ៍ទៀត Premier League រដូវកាលថ្មី នឹងមកដល់ហើយ។

Jose Mourinho អ្នកចាត់ការក្រុម Manchester United

Man Utd របស់អ្នកចាត់ការរហស្សនាម "Special One” នឹងត្រូវប៉ះក្រុម Manchester City របស់លោក Pep Guardiola នៅទីក្រុងប៉េកាំង ប្រទេសចិន ក្នុងប្រកួតពានរង្វាន់មិត្តភាព International Champions Cup នៅល្ងាចនេះជាបន្ត បន្ទាប់ពីប្រកួតដំបូង ពួកគេចាញ់ក្រុម Borussia Dortmund ៤-១។

Mourinho មិនពេញចិត្តទីលាននៅចិនឡើយ ដោយសារភ្លៀងខ្លាំង ហើយទីលានស្ថិតក្នុងលក្ខខ័ណ្ឌពិបាកលេង និងអាចធ្វើឲ្យកីឡាករងាយនឹងរងរបួស។ អតីតអ្នកចាត់ការក្រុម Chelsea រូបនេះ បាននិយាយថា៖ "ខ្ញុំគិតថា ប៉េកាំងទីលានអន់ណាស់។ ទីលានដូចនេះ កីឡាកររបស់ខ្ញុំ គឺសំខាន់ជាងលទ្ធផល ក្នុងការប្រកួតមិត្តភាព។ វាមិនមានបញ្ហាទេសម្រាប់ខ្ញុំ ដែលចាញ់នៅប្រកួតមិត្តភាព”។

“ប៉ុន្តែវាជាបញ្ហារបស់ខ្ញុំ ដោយសារកីឡាកររបស់ខ្ញុំ ហ្វឹកហាត់មិនត្រូវតាមលក្ខខ័ណ្ឌ និងលេងត្រូវតាមលក្ខខ័ណ្ឌ។ បើអ្នកសួរខ្ញុំពីការប្រកួតខាងមុខនេះ គោលបំណងរបស់ខ្ញុំតែមួយគត់គឺ សូមឲ្យកីឡាកររបស់យើងទាំងអស់ សុវត្ថិភាពត្រឡប់ទៅវិញ ដោយគ្មានរបួស”។ អ្នកចាត់ការវ័យ៥៣ឆ្នាំ បន្ថែម៕