តារាៗ ត្រៀមសកម្មភាពជួយ ជៀស ស្រួច

2016-07-25 20:52:05
ចំនួនមតិ 0 | ចំនួនចែករំលែក 0

ចន្លោះមិនឃើញ

មិនមែនតែអ្នកក្នុងវិស័យកីឡាទេ ដែលភ្ញាក់ផ្អើលចំពោះវត្តមានរបស់ ជៀស ស្រួច កាលពីពេលថ្មីនេះក្នុងស្ថានភាពលំបាកដូច្នេះ។ សូម្បីតែសិល្បករមួយចំនួនក៏បានបង្ហាញក្ដីអាណិតអាសូរផងដែរ ព្រោះមិននឹកស្មានថា អតីតកីឡាករល្បីឈ្មោះ និងជាតារាសម្ដែងខាងលើធ្លាក់ដល់ដំណាក់កាលនេះដែរ។

ខាត់ សុឃីម និយាយថា នាងមិននឹកស្មានថា ជៀស ស្រួច ធ្លាក់ដល់ដំណាក់កាលលំបាក ដែលសូម្បីរកលុយជិះឡានមកភ្នំពេញមិនបានដូច្នេះឡើយ ព្រោះពីមុនលោកជាមនុស្សហ៊ឺហាមានមុខមាត់ក្នុងសង្គមសិល្បៈ និងកីឡា។ . "ហឹម! អាណិតគាត់ណាស់។ ពីមុនគាត់ឡូយណាស់សម្ដែងបានហើយ ប្រដាល់ល្អទៀត"។ ខាត់ សុឃីម ថ្លែងមកកាន់ Sabay។ ទោះបីជាយ៉ាងណា អ្នកសិល្បៈពហុជំនាញរូបនេះអះអាងបន្តថា នាងមិនមើលនឹងភ្នែកនោះទេ នឹងជួយដល់លោក ជៀស ស្រួច តាមលទ្ធភាពទៅរួច ហើយស្នើដល់មហាជនចូលរួមជួយ។

ងាកមកតារាសម្ដែង និងបង្ហាញម៉ូដ ទឹម រដ្ឋា ថ្លែងថា នាងមានការរំជួលចិត្តយ៉ាងខ្លាំងនៅពេលបានឭដំណឹងរបស់អតីតកីឡាករ ជៀស ស្រួច ដែលកំពុងជួបទុក្ខវេទនា និងត្រូវការជំនួយដូច្នេះ។

"ក្នុងនាមនាងខ្ញុំជាសិល្បៈការិនីខ្មែរមួយរូប សូមជម្រាបជូនដល់សិល្បករ-សិល្បការិនីខ្មែរ ក៏ដូចជាសប្បុរសធម៌ ជាពិសេសសមាគមសិល្បៈខ្មែរទាំងអស់ សូមជួយដល់លោក ជៀស ស្រួច ផង ព្រោះគាត់ក៏ធ្លាប់ធ្វើការបម្រើសិល្បៈខ្មែរមួយរយះធំដែរ"។

ដោយឡែក ពិធីករ CNC លោក សារ៉ា បាននិយាយថា៖ "ក្នុងនាមជាអ្នកស្រុកមោងឬស្សីដូចគ្នា ខ្ញុំសូមឧបត្ថម្ភដល់បងប្រុស ជៀស ស្រួច អតីតកីឡាករប្រដាល់ និងជាតារាភាពយន្តដ៏ល្បីល្បាញ នូវទឹកប្រាក់តិចតូចចំនួន 20$ ខ្ញុំនឹងទាក់ទងទៅបងប្រុសដោយផ្ទាល់ឆាប់ៗនេះ"។

អត្ថបទ៖ សំ ជំនាញ