តួកគីបញ្ជារបិទអង្គការ និងសាលាជាង ២០០០ កន្លែង
- 2016-07-25 22:50:27
- ចំនួនមតិ 0 | ចំនួនចែករំលែក 0
តួកគីបញ្ជារបិទអង្គការ និងសាលាជាង ២០០០ កន្លែង
ចន្លោះមិនឃើញ
ប្រធានាធិបតីតួកគី សម្រេចបិទសាលាឯកជនរាប់រយ អង្គការ និងស្ថាប័នជាច្រើនកន្លែងទៀតនៅទូទាំងប្រទេសតួកគី ដែលគេសង្ស័យជាប់ពាក់ព័ន្ធនឹងមេដឹកនាំរដ្ឋប្រហាររបស់បព្វជិត Fehullah Gulen នៅសហរដ្ឋអាមេរិក។
ប្រធានាធិបតីតួកគី Erdogan
អនុក្រឹត្យនេះចេញដោយប្រធានាធិបតីតួកគីផ្ទាល់ គឺលោក Recep Tayyip Erdogan ជាលើកដំបូងចាប់តាំងពីប្រកាសរដ្ឋដាក់ក្នុងភាពអាសន្នកាលពីសប្ដាហ៍មុន។ លោកបានបញ្ជាឲ្យបិទសាលាឯកជនចំនួន ១ ០៤៣កន្លែង, អង្គការសប្បុរសធម៌ និងមូលនិធិ ១ ២២៩កន្លែង, ១៩ សហជីព, ១៥សាកលវិទ្យាល័យ និងឱសថស្ថាន ៣៥កន្លែង។
សូមបញ្ជាក់ថា រដ្ឋាភិបាលតួកគី បានចោទប្រកាន់លោក Gulen ថាជាមេខ្លោងនៅពីក្រោយព្រឹត្តិការណ៍រដ្ឋប្រហារផ្ដួលរំលំប្រធានាធិបតី Erdogan កាលពីសប្ដាហ៍មុន តែមិនបានសម្រេច និងបានចាប់ខ្លួនទាហានជាច្រើនពាន់នាក់។ ទោះជាយ៉ាងណា ប្រទេសសម្ព័ន្ធមិត្តរបស់តួកគី មានអាមេរិក និងអឺរ៉ុប បានប្រតិកម្មខ្លាំងៗ ចំពោះការបង្ក្រាបដ៏ព្រៃផ្សៃរបស់រដ្ឋាភិបាលតួកគីផងដែរ៕
ប្រែសម្រួល៖ ឡេង ភារុណ ប្រភព៖ RT