ទិញសំពត់ល្អ កាត់ខោអាវម៉ូដស្អាត គេនិយមទៅផ្សារអូរឫស្សី
- 2016-07-28 22:15:40
- ចំនួនមតិ 0 | ចំនួនចែករំលែក 0
ទិញសំពត់ល្អ កាត់ខោអាវម៉ូដស្អាត គេនិយមទៅផ្សារអូរឫស្សី
ចន្លោះមិនឃើញ
កាត់ខោអាវម៉ូដ កាត់ខោអាវរាង ទៅរកសំពត់គុណភាពល្អ នាំចូលពីបរទេស អ្នកនៅភ្នំពេញប្រាកដជាមិនរំលងទេ កន្លែងលក់សំពត់និងកាត់ដេរនៅម្ដុំផ្សារអូរឫស្សី។ ដោយសារតែគុណភាពសាច់សំពត់ បូករួមនិងការកាត់ម៉ូដស្អាតតម្រូវតាមចិត្តអតិថិជននោះ បានធ្វើឲ្យសិស្ស និស្សិត អ្នកធ្វើការជាច្រើន តែងនិយមទៅជាវ និងក្លាយជាម៉ូយ នៅបណ្ដាតូបលក់ជាច្រើននៅទីនោះផងដែរ។
តាមបងស្រី ហួច អ្នកប្រកបរបររកស៊ីបើកតូបលក់សំពត់ និងកាត់ដេរជាងប្រាំបីឆ្នាំមួយកន្លែង នៅម្ដុំអូរឫស្សី បានរៀបរាប់ប្រាប់ពីចំណូលប្រចាំថ្ងៃថា ជាមធ្យមការលក់នៅតូបរបស់ខ្លួន អាចរកបានចំណូលពី ៧០ ទៅ ១០០ដុល្លារក្នុង១ថ្ងៃ។ អតិថិជនភាគច្រើនដែលមកជាវសំពត់ តែងកាត់នៅទីនោះផ្ទាល់តែម្ដង។
បងស្រីបន្ថែមថា ចំពោះប្រភេទសំពត់ អ្នកទិញភាគច្រើនចូលចិត្តរើសតាមតម្លៃដែលខ្លួនមានលទ្ធភាព ដែលសំពត់មានតាមប្រភេទគុណភាពតម្លៃចាប់ពី ៥ដុល្លារ ទៅ៩ ដុល្លារ។ សម្រាប់ថ្លៃឈ្នួលកាត់ដេរ គឺក្នុងខោ ឬអាវមួយថ្លៃ ៤ដុល្លារ។ ចំពោះសំពត់ទិញចូល អ្នកលក់រូបនេះនិយាយថា៖ "ក្រណាត់(សំពត់) គឺកុម្ម៉ង់ទិញពីថៅកែ ភាគច្រើនយកពីថៃ ហើយចិន "។
សំពត់នាំចូលមកពីប្រទេសថៃ និងចិនមានភាពធន់ជាប់ល្អ ជាមូលហេតុនាំឲ្យអតិថិជនពេញចិត្តមកទិញ និងកាត់ខោអាវ។ តែយ៉ាងណាក្ដី ម្ចាស់តូបខាងលើដដែលបាននិយាយពីបញ្ហាខ្លះដែលធ្វើឲ្យបាត់បង់ អ្នកមកទិញក្រណាត់ កាត់ខោអាវ គឺការពេញនិយមខោអាវម៉ូដស្រាប់ៗ លក់ចុះថ្លៃ។
បងស្រីហួច បានថ្លែងប្រាប់ថា "ពីរ បីឆ្នាំចុងក្រោយនេះ អ្នកមកទិញថ្ងៃបុណ្យ ដូចថ្ងៃភ្ជុំចឹង ក៏ដូចថ្ងៃធម្មតា ឥលូវគេទិញអាវម៉ូដស្រាប់ៗ ហើយពិបាកលក់ណាស់អូនឥលូវ ណាមួយតូបនៅនេះច្រើន ម៉ូយបង សិស្សហើយអ្នកធ្វើការហ្នឹង អត់មានអ្នកថ្មីទេ ម៉ូយដដែល"៕