ប៉ូលិសប៉ះស៊ីម៉ាក់ ខណៈបឹងកេតជួប Cam-Tiger នៅអូឡាំពិក

2016-07-31 15:54:13
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីប្រកួតបាល់ទាត់ក្របខ័ណ្ឌកំពូលរបស់កម្ពុជា បានចាប់ផ្ដើមវិញហើយ ក្រោយកីឡាករបំពេញភារកិច្ចជាមួយជម្រើសជាតិ ល្ងាចថ្ងៃទី៣១ ខែកក្កដា ឆ្នាំ២០១៦ ជាការប្រកួតសប្ដាហ៍ទី១៤ ដោយមានក្លឹបប៉ូលិសប៉ះស៊ីម៉ាក់ ខណៈ បឹងកេតអង្គរជួប Cam-Tiger ទាំងពីរគូនៅពហុកីឡដ្ឋានជាតិដែលមានផ្សាយផ្ទាល់តាមរយៈទូរទស្សន៍ BTV។

ប៉ូលិសអាចធ្វើបានល្អឡើងវិញហើយ បន្ទាប់ពីធ្លាក់ទម្រង់លេងខ្លាំងកាលដើមរដូវកាល។ ពីរប្រកួតចុងក្រោយក្លឹបមួយនេះគឺយកឈ្នះក្រុមខ្លាំងព្រះខ័នរាជស្វាយរៀង១-០ និងបន្តឈ្នះអាស៊ីអឺរ៉ុប១-០ផងដែរ។

ចំណែកស៊ីម៉ាក់វិញកំពុងធ្លាក់ទម្រង់លេងយ៉ាងខ្លាំងមួយរយៈចុងក្រោយនេះ ពួកគេបានបរាជ័យ ៤ប្រកួតជាប់ៗគ្នា។ ជំនួបរវាងប៉ូលិស និងស៊ីម៉ាក់កាលពីជើងទី១ធ្វើបានត្រឹមស្មើគ្នា ២-២។

សម្រាប់បឹងកេតអង្គរវិញបានដាក់គោលដៅខ្ពស់ ក្នុងការប្រជែងយកពានលីគកំពូលកម្ពុជាឆ្នាំ២០១៦ បើគិតត្រឹមពេលនេះពួកគេមាន ៣៤ពិន្ទុឈរកំពូលតារាងឆ្លងកាត់១៣ប្រកួតកន្លងមក។ ដៃគូបឹងកេតគឺ Cam-Tiger ក៏ជាក្រុមរឹងមាំមួយផងដែរ បច្ចុប្បន្នក្រុមមួយនេះកំពុងឈរលេខ ៥ក្នុងតារាងលីគកំពូលកម្ពុជាឆ្លងកាត់ ១៣ប្រកួតដូចគ្នាមាន២០ពិន្ទុតាមពីក្រោយស្វាយរៀង ដែលមាន២២ ពិន្ទុនៅលេខ ៤។

តាំងពីឆ្នាំ២០១៤ មកដល់ពេលនេះ បឹងកេតធ្លាប់ប៉ះ Cam-Tiger ចំនួន ៧លើកក្នុងនោះបឹងកេតចាញ់តែម្ដងគត់។ ចុះលើកនេះវិញតើបឹងកេតអាចយកឈ្នះ Cam-Tiger បានអត់?

អត្ថបទ៖ ស្រី សុវណ្ណដារ៉ា