ព្រំ រដ្ឋា កៅឆាយរឿង "វិថីនារី" បើកមុខផលិតកម្មថ្មីរបស់ខ្លួន

2014-10-31 18:47:32
ចំនួនមតិ 0 | ចំនួនចែករំលែក 0

ចន្លោះមិនឃើញ

“ខ្ញុំទើបសុំ License គេបានប្រមាណជា ១ខែមុនហ្នឹងទេ ហើយ "វិថីនារី" គឺជាភាពយន្តដំបូងរបស់ផលិតកម្មនាងខ្ញុំ "។ អ្នកនាង ព្រំ រដ្ឋា តារាសម្ដែង និងជាចាងហ្វាងផលិតកម្ម PR Production ថ្លែងពេលធ្វើក្រុងពាលីព្រឹកមិញ ដោយត្រៀមចេញថតនាថ្ងៃស្អែក។

អ្នកនាង ព្រំ រដ្ឋា ប្រាប់បន្ថែមទៀតថា អ្នកនាងចំណាយពេលវេលា កម្លាំងកាយចិត្ត និងស្មារតីច្រើន ក្នុងការបង្កើតផលិតកម្ម និងឈានមកផលិតខ្សែភាពយន្តទី១គឺរឿង "វិថីនារី" នាពេលនេះ។ "ខ្ញុំធ្វើវា ទី១ ដោយចិត្តស្រឡាញ់ និងទី២ គឺរួមចំណែកជួយលើកកម្ពស់សិល្បៈភាពយន្តខ្មែរយើង កុំឲ្យគេចេះតែថា សិល្បករយើងអញ្ចេះអញ្ចុះណាបង"។

មិនត្រឹមតែជាចាងហ្វាង ប៉ុន្តែអ្នកនាង រដ្ឋា ក៏ចូលរួមសម្ដែងក្នុងរឿងនេះដែរ។ រដ្ឋា អះអាងថា បើទោះជានេះជាភាពយន្តដំបូងរបស់ផលិតកម្មអ្នកនាងក៏ពិតមែន ប៉ុន្តែអ្នកនាងសង្ឃឹមជោគជ័យច្រើន ដោយសំអាងថា អ្នកនាងបានចំណាយដើមទុនខ្ពស់ និងបានទាក់ទាញយកសុទ្ធតែតារាល្បីៗជាច្រើនរូបមកចូលរួមសម្ដែង មានដូចជា កញ្ញា ទេព សម្ផស្ស អ៊ិន វលក្ខណ៍ទេពី សូដា នីតា ពៅ លីដា លោក ណាខុន ហេង ប៊ុនលាភ និងលោក ឌឹម ឧត្តម ជាដើម។

មួយផ្នែកទៀត នេះជាខ្សែភាពយន្តទីមួយដែលឆ្លុះបង្ហាញពីជីវិតនារី ពិសេសសិល្បការិនីដែលជានិច្ចកាលតែងមានពាក្យចចាមអារ៉ាមថាមានអ្នកនេះអ្នកនោះចិញ្ចឹម។ “យើងចង់ឲ្យបង្ហាញថា អ្នកសិល្បៈយើងជួនកាលក៏ធ្វើត្រូវ ជួនកាលក៏ធ្វើខុស ប៉ុន្តែអ្វីទាំងអស់ គឺពួកគាត់ដើម្បីគ្រួសារគាត់"

អ្នកមេម៉ាយកូនមួយរូបនេះ បន្ថែមថា មួយផ្នែកទៀត "វិថីនារី" នឹងឆ្លុះបង្ហាញពីជីវិតរបស់យុវវ័យ ដែលដើរលេងភ្លើតភ្លើន មុនពេលភ្ញាក់ខ្លួនដើរមករកផ្លូវត្រូវវិញ ដែលនេះគឺជាសារដើម្បីពញ្ញាក់អារម្មណ៍របស់យុវវ័យយើងដែរ។

កញ្ញា ទេព សម្ផស្ស ដែលគេស្គាល់ច្បាស់ក្នុងរឿង "ជីវិតនាងរក្សា" និងជាតួឯកស្រីក្នុងរឿងនេះ ប្រាប់ថា នាងអត់ទាន់ដឹងថាតួដែលនាងត្រូវសម្ដែងមានឈ្មោះអ្វី និងចរិតឫកពារយ៉ាងណានៅឡើយទេ។ ប៉ុន្តែទោះជាយ៉ាងនេះក្ដី នាងរីករាយ និងមោទនភាពណាស់ដែលចូលសម្ដែងភាពយន្តនេះ ហើយថា នាងនឹងប្រឹងប្រែងសម្ដែងឲ្យអស់ពីលទ្ធភាព។

"វិថីនារី" គឺជាប្រភេទខ្សែរឿងភាគដាក់បញ្ចាំងទូរទស្សន៍ ក្នុងនោះគ្រោងចំណាយពេលថតប្រមាណជាង ៣ខែ។ ក្រោយពេលថតចប់ ភាពយន្តនេះ គ្រោងយកទៅដាក់បញ្ចាំងនៅលើកញ្ចក់ទូរទស្សន៍ CTN ក្រោយបុណ្យចូលឆ្នាំខ្មែរ។ "មិនទាន់ច្បាស់១០០%ទេ ប៉ុន្តែនេះជាអ្វីដែលខ្ញុំគ្រោង!”៕