ម្ចាស់ពានរង្វាន់ឆ្នើមទាំង៤ ក្នុងកម្មវិធីប្រកួតពានរង្វាន់សហគ្រិនវ័យក្មេងឆ្នាំ២០១៦
- 2016-08-01 20:37:01
- ចំនួនមតិ 0 | ចំនួនចែករំលែក 0
ម្ចាស់ពានរង្វាន់ឆ្នើមទាំង៤ ក្នុងកម្មវិធីប្រកួតពានរង្វាន់សហគ្រិនវ័យក្មេងឆ្នាំ២០១៦
ចន្លោះមិនឃើញ
ការប្រកួតប្រជែងសហគ្រិនឆ្នើមវ័យក្មេងកម្ពុជាប្រចាំឆ្នាំ២០១៦ បានបិទបញ្ចប់ជាស្ថាពរ បន្ទាប់ពីបានប្រកាសឲ្យដឹងពីម្ចាស់ពានរង្វាន់ចុងក្រោយ ៤ រូប ក្នុងចំណោមសហគ្រិនឆ្នើមទាំង១២ រូបសម្រាប់ទទួលពានរង្វាន់ (១) សហគ្រិនវ័យឆ្លាតផ្នែកបច្ចេកវិទ្យា (២) សហគ្រិនឆ្នើមផ្នែកសង្គម (៣) សហគ្រិនឆ្នើមផ្នែកស្ត្រី និង (៤) សហគ្រិនឆ្នើមប្រចាំឆ្នាំ២០១៦។
ម្ចាស់ពានរង្វាន់ទាំង៤ ប្រចាំឆ្នាំ២០១៦ នេះ រួមមាន៖
១. ពានរង្វាន់សហគ្រិនឆ្នើមវ័យឆ្លាតផ្នែកបច្ចេកវិទ្យា៖ លោក សុខ សុភមង្គល ប្រធានក្រុមហ៊ុន បច្ចេកវិទ្យាកុំព្យូទ័រ Codingate
២. ពានរង្វាន់សហគ្រិនឆ្នើមផ្នែកសង្គម៖ លោកស្រី នាវ នារីបញ្ចពិសី នាយិកាក្រុមហ៊ុនទេសចរណ៍ All Dreams (Cambodia) Co. Ltd.
៣. ពានរង្វាន់សហគ្រិនឆ្នើមផ្នែកស្ត្រី ៖ លោកស្រី ស្រ៊ាត មុំសុភា អគ្គនាយិកាក្រុមហ៊ុន ទេសចរណ៍ SOPHIYA Travel & Tours
៤. ពានរង្វាន់សហគ្រិនឆ្នើមប្រចាំឆ្នាំ២០១៦៖ លោក ចាង ប៊ុនលាង ម្ចាស់ហាងប្រោនកាហ្វេ។
ថ្លែងក្នុងពិធីប្រគល់ពានរង្វាន់នេះ លោក ប៉ិច បូឡែន ប្រធានថ្នាក់ជាតិនៃសភាយុវពាណិជ្ជករអន្តរជាតិកម្ពុជាឆ្នាំ២០១៦ និងជាអ្នកឈរលើវេទិកាប្រកាសឈ្មោះជយលាភីទាំង៤ ម្តងមួយៗ បានបញ្ជាក់ថា សហគ្រិនទាំង១២រូប សុទ្ធតែជាសហគ្រិនឆ្នើម គ្រាន់តែសហគ្រិនដែលទទួលបានពានរង្វាន់ទាំង៤ចុងក្រោយនេះ មានពិន្ទុលើសគេបន្តិចបន្តួចប៉ុណ្ណោះ។
រាត្រីស្រមោលសប្រគល់ពានរង្វាន់នេះ បានប្រព្រឹត្តទៅនៅសណ្ឋាគារសុខា កាលពីល្ងាច ថ្ងៃទី៣០ កក្កដា កន្លងទៅ ដោយមានការអញ្ជើញចូលរួមជាកិត្តិយសពីលោកជំទាវ ទេព រង្សី ភរិយាឯកឧត្តម ខៀវ កាញារិទ្ធ រដ្ឋមន្ត្រីក្រសួងព័ត៌មាន អគ្គរដ្ឋទូតចក្រភពអង់គ្លេសប្រចាំកម្ពុជា ឯកឧត្តម សុក ស៊ីផាណា ទីប្រឹក្សារាជរដ្ឋាភិបាល ប្រធានសមាគមសហគ្រិនស្ត្រីកម្ពុជា អនុប្រធានសមាគមសហគ្រិនវ័យក្មេងកម្ពុជា ក្រុមប្រឹក្សាភិបាល សមាជិកសមាគមសហគ្រិនវ័យក្មេងកម្ពុជា សភាយុវពាណិជ្ជករអន្តរជាតិកម្ពុជា JCI ព្រមទាំងភ្ញៀវជាតិ និងអន្តរជាតិជាច្រើនរូប៕
លោកស្រី នាវ នារីបញ្ចពិសី នាយិកាក្រុមហ៊ុនទេសចរណ៍ All Dreams (Cambodia) (អ្នកលើកពាន)
លោក សុខ សុភមង្គល ប្រធានក្រុមហ៊ុន បច្ចេកវិទ្យាកុំព្យូទ័រ Codingate
លោក ចាង ប៊ុនលាង ម្ចាស់ហាងប្រោនកាហ្វេ
លោកស្រី ស្រ៊ាត មុំសុភា អគ្គនាយិកាក្រុមហ៊ុន ទេសចរណ៍ SOPHIYA Travel & Tours
អត្ថបទ៖ លីដា