ប្រវត្តិត្រួសៗ ជើងខ្លាំងហុល្លង់ គូប្រកួត ស៊ន សៀវម៉ី មានសមត្ថភាពមិនធម្មតា
- 2016-08-03 13:00:08
- ចំនួនមតិ 0 | ចំនួនចែករំលែក 0
ប្រវត្តិត្រួសៗ ជើងខ្លាំងហុល្លង់ គូប្រកួត ស៊ន សៀវម៉ី មានសមត្ថភាពមិនធម្មតា
ចន្លោះមិនឃើញ
ស៊ន សៀវម៉ី នឹងតំណាងឱ្យកម្ពុជា ចូលប្រកួតព្រឹត្តិការណ៍អូឡាំពិករដូវក្ដៅ នៅប្រទេសប្រេស៊ីលនាពេលខាងមុខនេះ។ រូបនាងប្រកួតតែ៤ប្រកួតទេ នឹងទទួលបានមេដាយមាសហើយ ដោយដៃគូប្រកួតដំបូងជាជើងខ្លាំងមកពីហុល្លង់ឈ្មោះថា Reshmie Oogink ជាជើងឯកតេក្វាន់ដូអឺរ៉ុបឆ្នាំ២០០៥។
ខាងក្រោមនេះជាប្រវត្តិត្រួសៗរបស់ Reshmie Oogink ៖
អាយុនិងទីកន្លែងកំណើត
Reshmie មានអាយុ២៦ឆ្នាំ កើត Almelo ប្រទេសហុល្លង់។ កីឡាការិនីរូបនេះ មានកម្ពស់ដល់ទៅ ១,៧៩ម៉ែត្រ ហើយមានបទពិសោធន៍ជោកជាំជាមួយការប្រកួតធំៗ។ រូបនាង ចាប់ផ្ដើមហ្វឹកហាត់តាំងពីអាយុ៥ឆ្នាំ នៅក្នុងកន្លែងហ្វឹកហាត់របស់ឪពុកនាងតែម្ដង។
ការចាប់ផ្ដើមចូលប្រកួត
បន្ទាប់ពីហ្វឹកហាត់បានរយៈ ពេល៧ឆ្នាំ Reshmie ចាប់ផ្ដើមចូលប្រកួតក្នុងពានរង្វាន់តេក្វាន់ដូយុវជនរបស់ប្រទេសហុល្លង់។ នៅឆ្នាំ២០០៥ នាងបានឈ្នះពានរង្វាន់ European Championships សម្រាប់យុវជន ហើយក៏ទទួលបានមេដាយមាសក្នុងប្រភេទទម្ងន់៥៩គីឡូក្រាម។ ហើយដល់ឆ្នាំ២០០៦ នាងទទួលបានលេខ៤ ក្នុងការប្រកួត European Youth Championships ។
ពានរង្វាន់ផ្លូវការ
Reshmie ធ្លាប់ឈ្នះមេដាយមាស ៦ដងមកហើយ ដោយក្នុងនោះរួមមាន Dutch Open 2006, German Open 2006 , French Open 2008 , British Open 2009 , German Open 2012 និង Dutch Open 2012 កន្លងទៅនេះ។ ដោយសរុបជាប្រកួតវិញ Reshmie ប្រកួតបាន១២០ប្រកួត ឈ្នះបាន៧៧ប្រកួត។
ចំណាត់ថ្នាក់នៅអូឡាំពិក (Olympic Ranking)
Reshmie មានចំណាត់ថ្នាក់លេខ៥នៅអូឡាំពិក ខណៈដែល ស៊ន សៀវម៉ី វិញ មានចំណាត់ថ្នាក់ដល់ទៅ៣៣ឯណោះ។
អីចឹង កុំភ្លេចតាមដានការប្រកួតនេះទាំងអស់គ្នា ដោយ ស៊ន សៀវម៉ី និងប៉ះ Reshmie នៅថ្ងៃទី២០ខាងមុខនេះហើយ ក្នុងការប្រកួតជុំដំបូង ហើយប្រសិនបើ ស៊ន សៀវម៉ី ឈ្នះ នោះឱកាសបានមេដាយកាន់តែមានច្រើនហើយ។
ការប្រកួតកីឡាអូឡាំពិកនៅប្រទេសប្រេស៊ីលនៅឆ្នាំនេះ មានប្រទេសចូលរួមជាង២០០ប្រទេស ដោយអត្តពលិកចូលរួមចំនួនជាង១ម៉ឺននាក់ លើវិញ្ញាសាជាច្រើន ដែលត្រូវចាប់ផ្ដើមប្រកួតចាប់ពីថ្ងៃទី៥ រហូតដល់ថ្ងៃទី២១ខែសីហាឆ្នាំ២០១៦នេះ។ ដោយឡែក ស៊ន សៀវម៉ី ប្រកួតលើវិញ្ញាសាតេក្វាន់ដូក្នុងប្រភេទទម្ងន់៧៣គីឡូក្រាមផ្នែកនារី ដោយមានប្រទេសចូលរួមសរុប១៦ប្រទេស៕
អត្ថបទ៖ មុន្នី រម្យ