វៀតណាមឈប់បញ្ជូនពលករ១០ខេត្ត ទៅកូរ៉េខាងត្បូង
- 2016-08-02 18:53:01
- ចំនួនមតិ 0 | ចំនួនចែករំលែក 0
វៀតណាមឈប់បញ្ជូនពលករ១០ខេត្ត ទៅកូរ៉េខាងត្បូង
ចន្លោះមិនឃើញ
ក្រសួងការងារវៀតណាម បានប្រកាសថាខ្លួននឹងឈប់បញ្ជូនពលករចំនួន ១០ខេត្ត ក្នុងចំណោម ៦៣ខេត្ត ទៅកាន់ប្រទេសកូរ៉េខាងត្បូងហើយនៅឆ្នាំនេះ។
ក្រសួងបានបញ្ជាក់ក្នុងសេចក្ដីថ្លែងការណ៍ចុះថ្ងៃទី ២៩កក្កដាថ្មីៗនេះថា ពលករមកពី ៤៤ស្រុក ក្នុងខេត្តចំនួន១០ ខាងលើ មានពលករជាង ៦០នាក់ធ្វើការដោយខុសច្បាប់ ហើយគេនឹងហាមឃាត់ពលករមកពីខេត្តទាំងនេះមិនឲ្យចូលប្រទេសកូរ៉េខាងត្បូងនេះទៀតឡើយ។
ចំណែកពលករនៅស្រុកចំនួន ៤៦ផ្សេងទៀត ក្រសួងនឹងពិចារណា ដោយសារពួកគេទាំងនោះជាង ៣៥% បញ្ចប់កិច្ចសន្យាហើយ មិនព្រមមកប្រទេសកំណើតវិញ។
អនុរដ្ឋមន្ត្រីក្រសួងការងារលោក Doan Mau Diep មានប្រសាសន៍ថា "ពលករវៀតណាមចប់កិច្ចសន្យា សម្រេចក្រាញននៀលនៅកូរ៉េ ដោយសារពួកគេអាចរកចំណូលបានជាង ១០០០ដុល្លារក្នុងមួយខែ ខណៈប្រាក់ចំណូលប្រចាំឆ្នាំពលរដ្ឋវៀតណាមមានប្រមាណតែ ២ ១១១ដុល្លារប៉ុណ្ណោះកាលពីឆ្នាំមុន"។ លោកបន្តថា ប្រសិនបើពលករទាំងនោះត្រលប់មកវៀតណាមវិញ វាពិបាកសម្រាប់ពួកគេក្នុងការស្វែងរកប្រាក់ខែខ្ពស់ ឬប្រហាក់ប្រហែលនៅកូរ៉េណាស់។
តែទោះជាយ៉ាងណា ចំនួនពលករខុសច្បាប់វៀតណាមដ៏ច្រើនលើសលប់នៅរយៈពេល ៣ឆ្នាំចុងក្រោយនេះ គេបានរកឃើញថាមានប្រហែល ៣៥ ០០០ ទៅ៤០០០០នាក់ ត្រូវគេរារាំងមិនឲ្យធ្វើការនៅកូរ៉េខាងត្បូង។ កាលពីឆ្នាំ ២០១៥ វៀតណាមឈរនៅលំដាប់កំពូលក្នុងការបញ្ជូនពលករទៅកូរ៉េច្រើនជាងគេ ដោយរួមបញ្ចូលទាំងពលករខុសច្បាប់ ១៥០០០នាក់ផង ស្មើនឹងចំនួន ៣៥%នៃពលករវៀតណាមសរុប។
គួរបញ្ជាក់ថា វៀតណាមចាប់ផ្ដើមបញ្ជូនពលករទៅកាន់កូរ៉េខាងត្បូងលើកដំបូងក្នុងឆ្នាំ ១៩៩៣ ប៉ុន្តែក្រុងសេអ៊ូលប្រកាសឈប់ទទួលក្នុងឆ្នាំ ២០១២ ដោយសារពលករវៀតណាមច្រើនឡើងៗចប់កុងត្រា មិនព្រមវិលចូលប្រទេសវិញ។ ក្នុងឆ្នាំ ២០១៣ កូរ៉េខាងត្បូងព្រមបន្តទទួលលំហូរពលករវៀតណាមឡើងវិញ តែមានកម្រិត៕
ចុចអាន៖ ថៃ និងភូមា សហការគ្នាចង់នាំពលករភូមា ទៅស្រុកកំណើតវិញ
ប្រែសម្រួល៖ ឡេង ភារុណ ប្រភព៖ Vnexpress