ភ្លៀងលាយឡំនិងខ្យល់បក់ខ្លាំងនៅតំបន់ឆ្នេរសមុទ្រកម្ពុជា អាចបន្តដល់ថ្ងៃ ៥ សីហា
- 2016-08-03 17:46:12
- ចំនួនមតិ 0 | ចំនួនចែករំលែក 0
ភ្លៀងលាយឡំនិងខ្យល់បក់ខ្លាំងនៅតំបន់ឆ្នេរសមុទ្រកម្ពុជា អាចបន្តដល់ថ្ងៃ ៥ សីហា
ចន្លោះមិនឃើញ
ភ្លៀងធ្លាក់ជោកជាំលាយឡំ និងខ្យល់បោកបក់ខ្លាំង នៅតំបន់មាត់សមុទ្រ កាលពីថ្ងៃទី ០២ ខែសីហា ឆ្នាំ២០១៦ បានធ្វើឲ្យ កន្លែងមួយចំនួននៅតំបន់ខាងលើរងជំនន់ទឹកភ្លៀង តួយ៉ាងនៅផ្សារវាលរេញ ខេត្តព្រះសីហនុ។
បើតាមការឲ្យដឹងពីលោក អ៊ុំ រីណា ប្រធាននាយកដ្ឋានឧតុនិយមនៃក្រសួងធនធានទឹក បានប្រាប់ Sabay ថា ស្ថានភាពខាងលើគឺដោយសារខ្យល់មូលសុងនិរតីបង្កើតឥទ្ធិពល ដូចនេះតំបន់ដែលចាប់ផ្ដើមទទួលរងឥទ្ធិពលមុនគេ គឺតំបន់មាត់សមុទ្រ។
"ខ្យល់បោកបក់ពីសមុទ្រកាត់ឈូងសមុទ្រថៃ មកលើយើង ចឹងហើយបានធ្វើឲ្យមានភ្លៀងធ្លាក់គំហុក។ មួយទៀតស្ថានភាពភូមិសាស្ត្រតំបន់ភ្នំ ដែលជារនាំង ធ្វើឲ្យមានកើតពពកច្រើន បង្កឲ្យភ្លៀងធ្លាក់ច្រើន"។ នេះបើតាមការបញ្ជាក់ពី លោក រីណា។
យោងតាមការព្យាករណ៍ ផ្សាយដោយក្រសួងធនធានទឹក និងឧតុនិយម ឥទ្ធិពលខ្យល់មូសុងខាងលើអាចធ្វើឲ្យភ្លៀងធ្លាក់ច្រើនជាប់ៗគ្នា លាយឡំ និងខ្យល់បក់បោកខ្លាំងនៅតំបន់ឆ្នេរ និងលើផ្ទៃសមុទ្រ ចាប់ពីថ្ងៃទី ០២ សីហា បន្តដល់ថ្ងៃទី០៥ សីហា ឆ្នាំ២០១៦។ ស្ថានភាពនេះ ក្រសួងធនធានទឹក និងឧតុនិយម ក៏បានអំពាវនាវឲ្យមានការប្រុងប្រយ័ត្ន ជាពិសេសអ្នកចេញនេសាទតាមសមុទ្រ និងអ្នកទេសចរ៕
អត្ថបទ៖ មាន រតនា