ប្រលងឌីប្លូមបញ្ចប់ដោយស្ងប់ស្ងាត់ ឯបេក្ខជនសង្ឃឹមជាប់ច្រើន

2016-08-10 17:10:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ដំណើរការនៃការប្រលងសញ្ញបត្រមធ្យមសិក្សាបឋមភូមិ រយៈពេលពីរថ្ងៃ គឺថ្ងៃទី៨ដល់ថ្ងៃទី៩សីហាម្សិលមិញនេះ បានបញ្ចប់ទៅដោយរលូន និងរបៀបរៀបរយល្អ។ ដោយឡែក ការប្រលងឌីប្លូម (ថ្នាក់ទី៩) ទូទាំងប្រទេសឆ្នាំនេះ បេក្ខជនមានក្ដីសង្ឃឹមច្រើនលើការប្រលងរបស់ពួកគេ។

ទិដ្ឋភាពមុខវិទ្យាល័យឥន្ទ្រទេវី ពេលប្រលងកាលពីម្សិលមិញ

ទៅស្ដាប់យុវជនពីរនាក់ ដែលជាបេក្ខជនប្រលងនៅអនុវិទ្យាល័យចតុមុខ គឺយុវតី ចៅ សុធីរាជននីនាថ និងយុវជន កុសល ហ្វីហ្គោ បានប្រាប់ថា នៅក្នុងការប្រលង ពួកគេបានធ្វើពេញៗ គ្រប់មុខវិជ្ជាទាំងអស់ ដែលធ្វើឲ្យពួកគេសប្បាយចិត្តនិងសង្ឃឹមច្រើន ដោយគិតជាភាគរយ គឺ៨០ដល់៩០ភាគរយ។

“ខ្ញុំសង្ឃឹម៨០ (ភាគរយ) “នេះជាការលើកឡើងរបស់យុវជន ហ្វីហ្គោ។ រីឯកញ្ញាសុធីរាជននីនាថបានប្រាប់ថា៖ “...ខ្ញុំសង្ឃឹមប្រហែលជា៩០...ខ្ទង់៩០ដែរ ព្រោះថាខ្ញុំមានទំនុកចិត្តក្នុងខ្លួនឯង ហើយខ្ញុំចាប់ផ្ដើមរៀនត្រៀមប្រលងហ្នឹងតាំងពីថ្ងៃទី១៩ ខែ៧ ចឹងទៅខ្ញុំរៀនបានច្រើនដែរ។ ខ្ញុំគិតថាខ្ញុំធ្វើបានល្អ "។

ងាកទៅស្ដាប់យុវជនពីរនាក់ទៀត ដែលបានប្រលងនៅអនុវិទ្យាល័យចតុមុខដែរនោះ គឺយុវសិស្ស សាក់ ជេដ្ឋាពុធកញ្ញានាគ និងយុវជន ជួន សុចិត្រា បានប្រាប់ថាមានមុខវិជ្ជាខ្លះៗពិបាកសម្រាប់ពួកគេដូចជា ផែនដីវិទ្យា រូបវិទ្យា គីមីវិទ្យាជាដើម តែទោះជាយ៉ាងណាក្ដី ពួកគេជឿជាក់និងសង្ឃឹមច្រើនលើការប្រលងរបស់ពួកគេ។

យុវសិស្ស សាក់ ជេដ្ឋាពុធកញ្ញានាគ៖ " ខ្ញុំសង្ឃឹម៧០ភាគរយ" ។ ចំណែកយុវជន ជួន សុចិត្រា ប្រាប់ថា៖ "សង្ឃឹមច្រើន៧០(ភាគរយ)ដែរ "។

គួររំលឹកផងដែរ ការប្រឡងសញ្ញាបត្រមធ្យមសិក្សាបឋមសិក្សាប្រព្រឹត្តទៅ ២ថ្ងៃ គឺថ្ងៃទី៨ និងថ្ងៃទី៩ ខែសីហា មានបេក្ខជនប្រឡងសរុបចំនួន១៥៤ ៥៤២នាក់ និងមានមណ្ឌលប្រឡងចំនួន ១៦៣០មណ្ឌលទូទាំងប្រទេស ។ មុខវិជ្ជាប្រឡងមានចំនួន ១០មុខវិជ្ជា ត្រូវជា ១១ វិញ្ញាសា រួមមាន ១.តែងសេចក្ដី ២.គីមីវិទ្យា ៣.ផែនដី និងបរិស្ថានវិទ្យា ៤.រូបវិទ្យា ៥.ភូមិវិទ្យា ៦.សីលធម៌-ពលរដ្ឋវិជ្ជា ៧.គណិតវិទ្យា ៨.ការសរសេរតាមអាន ៩. ជីវវិទ្យា ១០.ប្រវត្តិវិទ្យា និង ១១.ភាសាបរទេស៕