4KhmeriPhone នឹងស្នើ Apple បញ្ចូលក្តារចុចភាសាខ្មែរ ក្រោយជោគជ័យពុម្ពអក្សរ

2016-08-12 13:00:14
ចំនួនមតិ 0 | ចំនួនចែករំលែក 0

ចន្លោះមិនឃើញ

4KhmeriPhone ដែលជាក្រុមត្រួសត្រាយស្នើដាក់បញ្ចូលពុម្ពអក្សរខ្មែរលើ iPhone នឹងបន្តស្នើទៅ Apple បញ្ចូលក្ដារចុចភាសាខ្មែរលើ iOS ជំនាន់ក្រោយៗ ក្រោយពុម្ពអក្សរត្រឹមត្រូវ ១០០ ភាគរយ។

ប្រធានក្រុម 4KhmeriPhone មួយរូបឲ្យដឹងថា លើ iOS 10 Beta 5 បច្ចុប្បន្នក្រុមហ៊ុន Apple បានកែសម្រួលកំហុសជើងតម្រួតនៃភាសាខ្មែរដែលតែងតែដាច់ដៃដាច់ជើងនិងត្រួតជាន់គ្នា បានជោគជ័យទាំងស្រុង។

ប្រធានក្រុមនេះថា នឹងបន្តសហការជាមួយក្រុមហ៊ុនជំនាញ Font នៅម៉ាឡេស៊ីបន្តទៀត ដើម្បីស្នើ Apple បញ្ចូលក្តារចុចភាសាខ្មែរស្តង់ដារលើ iOS។ ដោយសារកន្លងមកក្រុម 4KhmeriPhone និងក្រុមហ៊ុនរចនា Font នៅម៉ាឡេស៊ីនេះ មានទំនាក់ទំនងល្អតាមរយៈការកែសម្រួលបញ្ហាកំហុសពុម្ពអក្សរខ្មែរ វានឹងកាន់តែងាយក្នុងការស្នើឲ្យ Apple ដាក់បញ្ចូលក្តារចុចខ្មែរលើ iOS ជំនាន់ក្រោយ។

កន្លងមក ប្រធានក្រុមខាងលើបន្ថែមថា នៅពេលពុម្ពអក្សរខ្មែរលើ iOS ត្រឹមត្រូវពេញលេញ នោះនឹងកាន់តែងាយស្រួលសម្រាប់ក្រុមលោក រៀបចំស្តង់ដារពុម្ពអក្សរខ្មែរត្រឹមត្រូវរួមតែមួយ ដើម្បីឲ្យ Apple ពិចារណាបញ្ចូលក្តារចុចភាសាខ្មែរលើ iPhone។

ជោគជ័យយ៉ាងណា លោកមិនទាន់អាចបញ្ជាក់ច្បាស់ ដោយអះអាងថាវាត្រូវការស៊ីពេលយូរគួរសម ដើម្បីឲ្យខាង Apple សម្រេចចិត្ត។ ប៉ុន្តែ លោកថា ដោយបច្ចុប្បន្នពុម្ពអក្សរខ្មែរមានលក្ខណៈត្រឹមត្រូវទាំងស្រុងលើ iOS 10 Beta 5 ហើយនោះ ភាគរយក្នុងការស្នើបញ្ចូលក្ដារចុចភាសាខ្មែរ នឹងមានសង្ឃឹមច្រើន៕

អាន៖ ពុម្ពអក្សរខ្មែរលើ iOS 10 ផ្លូវការ នឹងត្រូវកែសម្រួលលែងបាត់ដៃជើងដូចមុន

អត្ថបទ៖ ប៉ែត ផាន់និត