អម្ពរ ទេវី បានមកដល់ភ្នំពេញហើយ!
- 2016-08-14 03:44:18
- ចំនួនមតិ 0 | ចំនួនចែករំលែក 0
អម្ពរ ទេវី បានមកដល់ភ្នំពេញហើយ!
ចន្លោះមិនឃើញ
បន្ទាប់ពីចំណាយពេលជិត២ថ្ងៃ តារាសម្ដែងជើងចាស់ អម្ពរ ទេវី បានមកដល់កម្ពុជាហើយ នៅប៉ុន្មាននាទីមុននេះ។
ដំណើររបស់អ្នកនាង អម្ពរ ទេវី មកកាន់កម្ពុជាត្រូវបានលាក់លៀម អ្នកពាក់ព័ន្ធផ្សេងៗមាន ភាគីផលិតកម្មថោន ក្នុងនោះអ្នកនិពន្ធ ពាន់ ភួងបុប្ផា ដែលដឹកនាំ អម្ពរ ទេវី មកថតភាពយន្តជាថ្មីនៅកម្ពុជា តាំងពីចាកចេញជាង១០ឆ្នាំនោះ ក៏មិនព្រមប្រាប់ដែរ។
តាមប្រភពមួយផ្សេង បានបង្ហើបថា មូលហេតុដែលភាគីពាក់ព័ន្ធទាំងអស់ព្យាយាមលាក់ ព្រោះពួកគេចង់បានតារាសម្ដែងជើងចាស់មកសម្ដែងភាពយន្តសិន ទើបធ្វើសន្និសីទសារព័ត៌មានជាក្រោយ។ បន្ទាប់ពីព័ត៌មានពីដំណើររបស់ដៃគូសម្ដែងសាកសមរបស់លោក ទេព រិនដារ៉ូ មិនត្រូវបានបែកខ្ចាយ ពេលនេះ អ្នកស្រី អម្ពរ ទេវី បានមកដល់ភ្នំពេញព្រលប់នេះហើយ។
(រាប់ពីឆ្វេង) អម្ពរ ទេវី និងកូនប្រុស(រូបអាវខ្មៅ) និងលោក ឯម រាម(រូបភាព៖ FB ឯម រាម)
លោក ឯម រៀម អ្នកច្នៃម៉ូដម្នាក់ បានបើកបង្ហាញព័ត៌មាននេះ តាមរយៈរូបថតចំនួនពីរសន្លឹក ក្នុងនោះ អម្ពរ ទេវី ដែលមានម៉ូដសក់ខ្លី បានរួមដំណើរជាមួយកូនប្រុសម្នាក់។ តាមផែនការ អតីតតារាល្បីទសវត្សរ៍ទី ៩០ រូបនេះ នឹងត្រូវចូលរួមថតភាពយន្ត "ទឹកចិត្តម្ដាយសម័យថ្មី" ដែលក្នុងនោះ អ្នកស្រី គឺជាតួម្ដាយម្នាក់ក្នុងចំណោម៣នាក់ ដែលតួអង្គឆ្អឹងនៃសាច់រឿង។
យ៉ាងណា មិនមានព័ត៌មានថា អ្នកស្រី អម្ពរ ទេវី នឹងត្រូវចេញថតនៅពេលណា ហើយបញ្ចប់នៅពេលណានោះទេ៕
អត្ថបទ៖ ទារិកា