គ្រូ Barca ថាត្រូវតែស៊ី Sevilla លើកពាន Spanish Super Cup យប់នេះ

2016-08-17 21:08:49
ចំនួនមតិ 0 | ចំនួនចែករំលែក 0

ចន្លោះមិនឃើញ

Luis Enrique អ្នកចាត់ការក្រុមម្ចាស់ជើងឯកអេស្ប៉ាញ FC Barcelona បានលើកឡើងថា ក្រុមរបស់លោកត្រូវតែឈ្នះ Sevilla ក្នុងការប្រកួត Spanish Super Cup ជើងទី២យប់នេះទៀត ដើម្បីលើកពានរង្វាន់នេះឲ្យបាន មុនបើករដូវកាលថ្មី La Liga ចុងសប្ដាហ៍នេះ។

Luis Enrique អ្នកចាត់ការក្រុមម្ចាស់ជើងឯកអេស្ប៉ាញ FC Barcelona

កាលជើងទី១ នៅទឹកដី Sevilla ក្រុម Barcelona បានឈ្នះ ២-០ រួចហើយ ខណៈដែលជើងទី២នៅកីឡដ្ឋាន Nou Camp វេលាម៉ោង០៤:០០នាទីយប់នេះ អ្នកចាត់ការ Enrique ថាគ្មានបំណងចង់លេងទម្រង់ការពារនោះទេ ពោលគឺត្រូវតែបុកយកឈ្នះទៀត ដើម្បីធានាអាចលើកពានរង្វាន់។

“គោលដៅរបស់យើងនៅតែដូចមុនគឺ «ឈ្នះ»។ យើងត្រូវតែលេងឲ្យបានល្អបំផុត លេងឲ្យល្អជាង Sevilla។ កីឡាកររបស់យើងដឹងច្បាស់ហើយថា បន្ទាប់ពីបញ្ចប់៩០នាទី យើងអាចលើកពាន។ ទោះបីយើងនាំមុខ ២-០ ជើងទី១ ប៉ុន្តែអ្វីៗអាចប្រែប្រួលគ្រប់ពេល ដូច្នេះយើងគួរតែស៊ុត Sevilla មុន និងព្យាយាមរកគ្រាប់ឲ្យបានច្រើន បើមានឱកាស ហើយព្យាយាមយកជ័យជម្នះឲ្យបាន”។ អ្នកចាត់ការវ័យ៤៦ឆ្នាំ បានលើកឡើង។

បន្ទាប់ពីប្រកួតយប់នេះ Barcelona នឹងត្រូវប៉ះ Real Betis នៅប្រកួតបើកឆាករដូវកាលថ្មី La Liga នាកីឡដ្ឋាន Nou Camp នៅយប់ថ្ងៃសៅរ៍ចុងសប្ដាហ៍នេះ៕