Park Café បង្ហាញភាពជោគជ័យរបស់ខ្លួន និងបន្តបើកសាខាថ្មី

2016-08-19 19:02:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ទន្ទឹមនឹងភាពរីកចម្រើនតាមរយៈការបន្តបើកសាខាថ្មីៗដ៏ជោគជ័យ ពេលនេះ សាខាផាកកាហ្វេ (Park Café) ថ្មីមួយទៀតស្ថិតលើផ្លូវប៉ាស្ទ័រ កែងនឹងផ្លូវ៣៦០ បានបើកសម្ពោធជាផ្លូវការហើយ នៅថ្ងៃទី១៨ សីហា ម្សិលមិញនេះ។ Park Café មានប្រវត្តិជាង១ទសវត្សហើយ ដែលត្រូវបានបង្កើតឡើងក្នុងឆ្នាំ២០០៤ ដោយក្រុមសហគ្រិនវ័យក្មេងកម្ពុជា ៤ រូប ដោយបានណែនាំភោជនីយដ្ឋានរចនាបថថ្មីមួយ និងទំនើប ដើម្បីបន្ថែមលើភោជនីយដ្ឋានបែបប្រពៃណីបច្ចុប្បន្ននៅរាជធានីភ្នំពេញ។ មកដល់ពេលនេះ Park Café មានសាខាដល់ទៅ ១០ សាខាក្នុងរាជធានីភ្នំពេញ។

Park Café ជាភោជនីយដ្ឋានដែលផ្ដល់ជូនអតិថិជននូវតម្លៃសមរម្យ ដែលមានលក្ខណៈជាអាហារបែបខ្មែរ។ អតិថិជនភាគច្រើនដែលគាំទ្រ Park Café គឺមានកម្រិតជីវភាពពីថ្នាក់ចំណូលលើមធ្យម និងថ្នាក់ខ្ពស់។ Park Café ក៏ជាភោជនីយដ្ឋានកម្ពុជាដំបូងបង្អស់ដែលបម្រើអាហារគ្មានប៊ីចេង និងមានការទទួលស្គាល់ដោយស្ថាប័ន HACCP និងភោជនីយដ្ឋានចំណាត់ថ្នាក់ A ដែលទទួលស្គាល់ដោយក្រសួងសុខាភិបាល។

Park Café សាខាបឹងកេងកងប៉ាស្ទ័រ (ស្ថិតលើផ្លូវប៉ាស្ទ័រកែងនឹងផ្លូវ៣៦០) នេះ ត្រូវបានបង្កើតឡើងដោយមើលឃើញពីតម្រូវការរបស់អតិថិជនដែលនិយមចូលចិត្តអាហារក្នុងស្រុក ពិសេសគុយទាវភ្នំពេញ។ មិនត្រឹមតែភោជនីយដ្ឋានដែលបម្រើម្ហូបអាហារ និងភេសជ្ជៈប៉ុណ្ណោះទេ សាខាមួយនេះក៏ជាសាខាដែលមានការរចនាថ្មី បែបប្រណីត និងទំនើប។

បច្ចុប្បន្ន Park Café បានផ្តល់ការងារឱ្យបុគ្គលិកចំនួន ៣០០ នាក់ស្ថិតក្នុងតំណែងផ្សេងៗគ្នា ហើយចំនួននេះរំពឹងថានឹងកើនឡើងដល់ ៣៧០ នាក់នាចុងឆ្នាំ២០១៦ នេះ។ ក្តីសុបិនរបស់ Park Café គឺនឹងពង្រីកអាជីវកម្មទៅកាន់ខេត្តមួយចំនួន ដោយផ្ដោតទៅលើបណ្ដាខេត្តដែលមានទីតាំងស្ថិតនៅជុំវិញបឹងទន្លេសាប និងតំបន់មាត់សមុទ្រ។ វានឹងត្រូវដាក់ដំណើរការក្រោមប្រព័ន្ធ Franchise ។ Park Café ក៏មានបំណងនាំយកផលិតផលរបស់ខ្លួនទៅកាន់ពិភពលោក ដូចជា បារាំង អាមេរិក កាណាដា ជាដើម ដែលជាកន្លែងមានប្រជាជនកម្ពុជាច្រើនរស់នៅ។ Park Café មានគម្រោងនឹងពង្រីកដល់ ៣១ ហាងនៅឆ្នាំ២០២០ ស្ថិតក្នុងកណ្ដាលរាជធានីភ្នំពេញ និងខេត្តសំខាន់ៗមួយចំនួន។

លោក សេង លី នាយកគ្រប់គ្រងទូទៅហាង Park Café បានឲ្យដឹងថា ជារៀងរាល់ថ្ងៃនៅតាមសាខានីមួយៗរបស់ Park Café មានអតិថិជនចេញចូលក្នុងរវាងពី ១៥០០នាក់ ទៅ ១៨០០នាក់ ដែលពួកគាត់គឺជាពាណិជ្ជករ មន្ត្រីរាជការ មន្ត្រីសង្គមស៊ីវិល អ្នកស្រាវជ្រាវ និងសិស្ស-និស្សិត ដោយពួកគាត់មិនត្រឹមតែមកទីនេះដើម្បីទទួលទានអាហារ និងភេសជ្ជៈប៉ុណ្ណោះទេ ប៉ុន្តែគឺដើម្បីពិភាក្សាគ្នានៅក្នុងកិច្ចការងារមុខរបរប្រចាំថ្ងៃ ការសិក្សាស្រាវជ្រាវ និងការសម្រាកលំហែកម្សាន្ត ជាដើម៕