អាយុជាឧបសគ្គធំសម្រាប់សហគ្រិនវ័យក្មេង

2016-08-23 16:14:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ឧបសគ្គធំបំផុតក្នុងសង្គមកម្ពុជា គឺភាគច្រើនឪពុកម្ដាយតែងឆ្លើយថា "ទេ" នៅពេលកូនរបស់ខ្លួនមានអាយុតិចចង់បើកអាជីវកម្មឬចង់វិនិយោគណាមួយ។

គេមើលឃើញថា អាយុបានក្លាយជាការរារាំងដ៏អយុត្តិធម៌មួយសម្រាប់យុវវ័យដែលមានអាយុមិនលើសពី៣០ឆ្នាំ នៅពេលពួកគេមានគំនិតក្នុងការរកស៊ីឬចង់វិនិយោគបណ្ដាក់ទុនតែត្រូវគេបំបាក់ទឹកចិត្តទៅវិញ។

លោក ស៊ឹម ឬទ្ធី នាយកប្រតិបត្តិនៃក្រុមហ៊ុនបណ្ដុះបណ្ដាលពីរបៀបនៃការវិនិយោគ Miracles of Capital Cambodia Co.,Ltd យល់ថាសព្វថ្ងៃកូនខ្មែរភាគច្រើនចាប់ផ្ដើមមានគំនិតលើការវិនិយោគ បណ្ដាក់ទុននិងសមត្ថភាពខ្លាំងអាចប្រជែងជាមួយសហគ្រិនបរទេសបាន។ ជាក់ស្ដែង សហស្ថាបនិកហាងកាហ្វេ Brown ក៏ចាប់ផ្ដើមរកស៊ីតាំងវ័យក្មេងដែរ ប៉ុន្តែលោកទទួលបានជោគជ័យ។

ដោយសារតែនៅកម្ពុជាមិនទាន់មានក្រុមហ៊ុនណាសម្រាប់បណ្ដុះបណ្ដាលចំពោះរបៀបនៃការវិនិយោគទុន និងរបៀបនៃការដាក់ទុនដើម្បីទាក់ទាញបានអ្នកវិនិយោគច្រើន ដូច្នេះទម្រង់នៃការគ្រប់គ្រងលុយហាក់នៅមិនទាន់ច្បាស់លាស់។ លើសពីនេះ ប្រសិនបើម្ចាស់អាជីវកម្មមិនប្រាកដប្រជា នោះក្រុមហ៊ុនបរទេសនឹងចូលមកបោសសំអាតជាក់ជាមិនខាន។

ជាក់ស្ដែងយុវជន សុខ ចាន់ណារ៉ូ ក៏ធ្លាប់ត្រូវក្រុមគ្រួសារហាក់ស្ទាក់ស្ទើរមិនចង់ឲ្យខ្លួនរកស៊ីដែរ អំឡុងណារ៉ូចង់បើកអាជីវកម្មការផលិតវីដេអូនិងរចនារូបភាពពេលអាយុ២៣ឆ្នាំ។

ម្ល៉ោះហើយលោក គួច ម៉េងលី ទីប្រឹក្សាក្រុមប្រឹក្សាភិបាល JCI Cambodia បានផ្ដល់ជាដំបូន្មានថាសម្រាប់សហគ្រិនវ័យក្មេងដែលមានបំណងធ្វើអាជីវកម្ម ចាំបាច់ត្រូវសិក្សាស្វែងយល់ពីបទពិសោធន៍ ឬវិធីសាស្ត្រធ្វើអាជីវកម្មជោគជ័យរបស់បុគ្គលជោគជ័យទូទាំងពិភពលោក ដើម្បីទុកជាគន្លឹះក្នុងការដោះស្រាយបញ្ហាដែលតែងតែកើតមានឡើង។ ជាងនេះទៀត ជំនាញទំនាក់ទំនងសាធារណៈ និងភាពស្មោះត្រង់ ក៏ជាកត្តាមួយជួយឱ្យឥរិយាបថធ្វើអាជីវកម្មដំណើរការទៅដោយរលូនផងដែរ៕

សូមអាន៖ នៅក្មេងហ៊ានបើកអាជីវកម្មទាំងមិនដែលប្រឡូកដោយមិនខ្លាចបរាជ័យ

អត្ថបទ៖ លឹម សុនា