យុវវ័យច្រើនកុះករ ចូលរួមកម្មវិធី «រត់ដើម្បីបរិស្ថាន»
- 2016-08-29 18:28:32
- ចំនួនមតិ 0 | ចំនួនចែករំលែក 0
យុវវ័យច្រើនកុះករ ចូលរួមកម្មវិធី «រត់ដើម្បីបរិស្ថាន»
ចន្លោះមិនឃើញ
កម្មវិធីរត់ប្រណាំង «អេ. ស៊ី. អ៊ី. រត់ដើម្បីបរិស្ថាន» បានរៀបចំឡើងកាលពីម្សិលមិញ នៅក្នុងបរិវេណទីក្រុងរណបកោះពេជ្រ ដោយមានអ្នកចូលរួមយ៉ាងច្រើនកុះករ ភាគច្រើនជាយុវវ័យ។ ពួកគេចូលរួមកម្មវិធីនេះក៏ព្រោះតែស្រលាញ់បរិស្ថាន និងដើម្បីសុខភាព។
យុវតី ជីរ៉ា ដែលជាសិស្សនៅសាលា អេ.ស៊ី.អ៊ី បានប្រាប់ Sabay ថា ការមកចូលរួមកម្មវិធីនេះមិនត្រឹមតែដើម្បីបរិស្ថានប៉ុណ្ណោះទេ ថែមទាំងជាការហាត់ប្រាណសម្រាប់សុខភាពផ្ទាល់ខ្លួនផងដែរ។ ជីរ៉ា បញ្ជាក់ថា៖"ខ្ញុំចូលចិត្តកម្មវិធីបែបនេះបង! ព្រោះវាជាសកម្មភាពជួយដល់បរិស្ថាន ថែមទាំងអាចឲ្យអ្នកចូលរួមហាត់ប្រាណបែបញើសដើម្បីសុខភាព ហើយខ្ញុំក៏ចង់ឲ្យកម្មវិធីបែបនេះធ្វើបន្ថែមទៀតឲ្យបានច្រើន"។
ស្រដៀងគ្នានេះដែរ ឆ្លើយទៅនឹងសំណួរថាហេតុអ្វីបានជាសុខចិត្តចំណាយពេលចុងសប្ដាហ៍មកចូលរួមកម្មវិធីនេះ? វត្តី បានថ្លែងទាំងញញឹមថា៖ "ខ្ញុំចូលរួមសកម្មភាពបែបហ្នឹង ព្រោះវាបានប្រយោជន៍ពីរយ៉ាង! គឺបានសប្បាយជាមួយមិត្តភ័ក្ដិផង និងបានជួយដល់សកម្មភាពដាំដើមឈើផង"។
គោលបំណងសំខាន់របស់កម្មវិធី «អេ. ស៊ី. អ៊ី. រត់ដើម្បីបរិស្ថាន» គឺដើម្បីបំផុសការយល់ដឹងស្ដីពីបរិស្ថាននិងសារសំខាន់នៃការដាំដើមឈើ ហើយថវិកាទាំងស្រុងដែលបានមកពីការលក់សំបុត្រនឹងយកទៅដាំដើមឈើបន្ថែមទៀត៕
អត្ថបទៈ យ៉ារិទ្ធ