យុវវ័យយល់យ៉ាងណាចំពោះការនិយាយភាសាខ្មែរលាយពាក្យអង់គ្លេស?

2016-08-29 21:25:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ការនិយាយភាសាខ្មែរ ក្នុងការសន្ទនាប្រាស្រ័យទាក់ទងគ្នានាពេលបច្ចុប្បន្ន គេតែងសង្កេតឃើញ ការនិយមនិយាយលាយពាក្យអង់គ្លេស។ តួយ៉ាងដូចជាការនិយាយ៖"បទ Original ថ្មីចេញហើយមាន Download មកអត់?” “ខ្ញុំគិតថាយើងគូរតែ Practice ការនិយាយភាសាអង់គ្លេសយើងឲ្យច្រើនដើម្បី Improve ឲ្យវា Fluent បន្តិច “ជាដើម។ ការនិយាយនោះភាគច្រើនគឺចេញមកពីយុវវ័យ ដូចនេះពួកគេយល់យ៉ាងណា?

យុវជន បូ ពិសិដ្ឋ និស្សិតផ្នែកព័ត៌មានវិទ្យា នៅវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍បានលើកឡើងថា ខ្លួនធ្លាប់និយាយលាយខ្លះ គឺដោយសារពាក្យនៅក្នុងវិស័យបច្ចេកវិទ្យាព័ត៌មានវិទ្យាមួយចំនួនជាពាក្យបច្ចេកទេសអង់គ្លេស ដែលពិបាកបកប្រែជាអត្ថន័យក្នុងភាសាខ្មែរ តួយ៉ាងដូចជាពាក្យ Download Upload Search ….។ យុវជន បូ ពិសិដ្ឋ បានបន្ថែមថា៖ "ពាក្យអង់គ្លេសខ្លះអាចបកប្រែបានតែវាវែង ឬឆ្គង ធ្វើឲ្យអ្នកប្រើមិនទម្លាប់បាន "។

ទៅស្ដាប់លោក អ៊ុយ សាមាន អ្នកគ្រប់គ្រងនៅក្នុងក្រុមហ៊ុនមួយ បានប្រាប់ថា ពេលខ្លះលោកក៏ចូលចិត្តនិយាយលាយពាក្យអង់គ្លេសច្រើនគួរសមដែរ ដោយការនិយាយនោះគឺអាស្រ័យលើស្ថានភាពជាក់ស្ដែង ពោលគឺអ្នកដែលលោកនិយាយទៅរក យល់ពីពាក្យទាំងនោះ។

ចំពោះមតិលោក សាមានផ្ទាល់ លោកបាននិយាយថា៖ "ការនិយាយបែបនោះ អាចជួយឲ្យភាសា(បរទេស) របស់យើងល្អផងដែរ ជាក់ស្ដែងការធ្វើសមាហរណកម្មអាស៊ាន យើងប្រើភាសាហ្នឹង( អង់គ្លេស) ដូចនេះវាដូចជាការអនុវត្តភាសាមួយដែរ"។

ដោយឡែក ទៅស្ដាប់ យុវតី លីម ប៉ាជូ សិស្សថ្នាក់ទី១១ នៃវិទ្យាល័យ ច្បារអំពៅបាននិយាយថា ការនិយាយភាសាខ្មែរលាយពាក្យអង់គ្លេស ភាគច្រើនតែងតែកើតឡើង ដោយសារតែអ្នកនិយាយទាំងនោះ ពូកែខាងភាសាអង់គ្លេស ជាពិសេសអ្នករៀននៅសកលវិទ្យាល័យ។

យ៉ាងណាមិញ យុវតីរូបនេះបានលើកពីមតិផ្ទាល់ខ្លួនថា ៖ "ភាសាអង់គ្លេសអាចជាជម្រើសទីពីរ។ យើងមានភាសាកំណើតយើង ដូចនេះគួរតែប្រើភាសាខ្មែរ ហើយវាមានភាពខុសប្លែកពីប្រទេសផ្សេង ដូចជាប្រទេសខ្លះ ពួកគេនិយាយលាយអង់គ្លេសខ្លះ ព្រោះពួកគេអត់មានភាសាដើមរបស់ពួកគេ"។

ងាកទៅស្ដាប់លោក រឿន សុចិត្រា បុគ្គលិកបម្រើការនៅក្រុមហ៊ុនឯកជនមួយវិញ បានលើកឡើងពីគំនិតផ្ទាល់ខ្លួនថា៖ "តាមគំនិតខ្ញុំ គិតថា វាមិនល្អទេ វាអាចប៉ះពាល់ដល់ភាសាខ្មែរយើងដែរ។ អីចឹង យើងទាំងអស់គ្នាគួរតែនិយាយ បែងចែកឲ្យច្បាស់ បើនិយាយអង់គ្លេសឲ្យដឹងអង់គ្លេស បើនិយាយខ្មែរឲ្យដឹងខ្មែរ "៕

ខាងលើនេះ ជាមតិមួយចំនួនប៉ុណ្ណោះ ចុះប្រិយមិត្តអ្នកអានយល់យ៉ាងណាដែរ?

ចុចអាន៖ ហេតុអ្វីយុវវ័យមិនសូវចូលចិត្តសរសេរអក្សរខ្មែរលើបណ្ដាញសង្គម?

អត្ថបទ៖ មាន រតនា