ទោះគុណភាពសាងសង់ល្អផ្ដាច់ ក៏អតិថិជននឹងបាត់ទំនុកចិត្តបើខ្វះមួយចំណុចនេះ

2016-08-29 23:34:21
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រោះថ្នាក់ខ្លាំងបំផុតរបស់ម្ចាស់គម្រោងដែលធ្វើឲ្យអតិថិជនលែងមានជំនឿចិត្តតទៅទៀត ត្រូវបានអ្នកជំនាញអចលនទ្រព្យយល់ថាគឺការសន្យាដែលមិនបានកំណត់ដូចផែនការរបស់ខ្លួន។

នៅពេលសំណង់ខ្លួនចាប់ផ្ដើមបុកគ្រឹះ ម្ចាស់គម្រោងបានកំណត់ផែនការថានឹងបញ្ចប់ការសាងសង់របស់ខ្លួននៅឆ្នាំណាមួយ ដែលធ្វើឲ្យអតិថិជនទុកចិត្ត។ តែផ្ទុយទៅវិញ គម្រោងខ្លះបែរជាផ្អាកពាក់កណ្ដាលទី និងខ្លះទៀតដល់ឆ្នាំកំណត់ហើយបែរជាមិនទាន់រួចរាល់ទៅវិញ។

លោក ចេង ខេង អគ្គនាយកក្រុមហ៊ុន CPL បាននិយាយថា ចង់លក់ខុនដូមួយទទួលជោគជ័យ គឺម្ចាស់គម្រោងត្រូវបញ្ចប់ការសាងសង់របស់ខ្លួនតាមផែនការដូចកំណត់។ នេះជាទំនុកចិត្តខ្ពស់មួយដែលអតិថិជនត្រូវការបំផុត និងមិនបង្កការព្រួយបារម្ភ។ លោកបន្តថា ចៀសវាងការទិញអចលនទ្រព្យប្រឈមនឹងហានិភ័យ អតិថិជនត្រូវពិនិត្យឲ្យច្បាស់ពីប្រវត្តិកេរ្តិ៍ឈ្មោះរបស់ម្ចាស់គម្រោង រួមទាំងអាជ្ញាបណ្ណផងដែរ ចៀសវាងសំណង់នោះផ្អាកដំណើរការកណ្ដាលទី។

សម្រាប់ខុនដូមួយដែលទើបចាប់ផ្ដើមដំណើរការសាងសង់របស់ខ្លួនតាមបណ្ដោយផ្លូវមុនីវង្សក្នុងសង្កាត់បឹងត្របែក ត្រូវបានអ្នកគ្រប់គ្រងការលក់នៃគម្រោងនេះ កញ្ញា ឆឹង សុធារ៉ា បានឲ្យដឹងថា គម្រោង Sino Plaza នឹងបញ្ចប់នៅចុងឆ្នាំ២០១៨ ដោយគ្រោងចំណាយប្រមាណ ២០០លានដុល្លារ។ ទំនុកចិត្តមួយដែលផ្ដល់ដល់អតិថិជន គឺគម្រោងនេះនឹងមិនប្រឈមការសង់ចោលពាក់កណ្ដាលទីឡើយ ដោយសារខុនដូនេះមានទុនវិនិយោគគ្រប់គ្រាន់ ហើយជាគម្រោងវិនិយោគឡើងពីក្រុមហ៊ុនធំមកពីហុងកុងនិងចិន ដែលទទួលស្គាល់ដោយរដ្ឋាភិបាលចិន។ ម្ល៉ោះហើយ បើខុនដូនេះជួបវិបត្តិហិរញ្ញវត្ថុ ក៏រដ្ឋាភិបាលចិននឹងមានទុនបម្រុងសម្រាប់គម្រោងនេះសង់ដល់ទីបញ្ចប់ផងដែរ។

គេឃើញថា កន្លងមកសំណង់អាគារនិងខុនដូមួយចំនួនបានបង្កជាវិបត្តិទំនុកចិត្តដល់អ្នកទិញ។ សំណង់អាគារ ៤២ជាន់ បានផ្អាកគម្រោងរបស់ខ្លួនកណ្ដាលទី។ រីឯថ្មីៗនេះ ខុនដូមួយនៅម្ដុំជ្រោយចង្វារ ក៏បានប្រកាសថានឹងផ្អាកដំណើរការសាងសង់របស់ខ្លួនផងដែរ។ នេះជាគ្រោះថ្នាក់ខ្លាំងបំផុតសម្រាប់អតិថិជន៕

អត្ថបទ៖ លឹម សុនា