កំពូលតារាភាពយន្តថៃ កញ្ញា Bella នឹងមកជួបប្រិយមិត្តរបស់ខ្លួននៅកម្ពុជាឆាប់ៗនេះ
- 2016-08-29 23:45:30
- ចំនួនមតិ 0 | ចំនួនចែករំលែក 0
កំពូលតារាភាពយន្តថៃ កញ្ញា Bella នឹងមកជួបប្រិយមិត្តរបស់ខ្លួននៅកម្ពុជាឆាប់ៗនេះ
ចន្លោះមិនឃើញ
កំពូលតារាភាពយន្តថៃ កញ្ញា Bella នឹងធ្វើដំណើរពិសេសមកកាន់ទីក្រុងភ្នំពេញដើម្បីជួបជាមួយប្រិយមិត្តរបស់ខ្លួនជាច្រើននៅកម្ពុជាក្នុងខែតុលា ខាងមុខនេះ។
ដំណើរមកដល់ទឹកដីដ៏ស្រស់បំព្រងរបស់កម្ពុជាលើកនេះ តារាភាពយន្តនៃស្ថានីយទូរទស្សន៍ដ៏ល្បីរបស់ថៃ TV3 នឹងទទួលពិធីស្វាគមន៍ ក៏ដូចជាចូលរួមក្នុងជំនួបពិសេសមួយនៅឯផ្សារទំនើបអ៊ីអន។
កញ្ញា ទូច បុប្ផា ប្រធានផ្នែកកម្មវិធីផ្សាយរបស់ភីអិនអិន បានបញ្ជាក់ថា៖ "កញ្ញា Bella ជាតារាល្បីម្នាក់ក្នុងចំណោមតារាល្បីៗរបស់ថៃជាច្រើនដែលគាំទ្រស្ថានីយទូរទស្សន៍ភីអិនអិន។ ការមកកាន់កម្ពុជារបស់នាងលើកនេះ គឺបង្ហាញពីការប្ដេជ្ញារបស់ភីអិនអិនក្នុងការនាំយកតារាល្បីៗ និងភាពយន្តល្អៗជូនដល់ទូរទស្សនិកជនកម្ពុជា"។
កញ្ញាបន្ថែមថា៖ "ក្នុងសប្ដាហ៍នេះ ភីអិនអិនក៏នឹងចាក់បញ្ចាំងរឿងដ៏មានប្រជាប្រិយភាពមួយរបស់ Bella គឺរឿង វិមានមេខលា ចាប់ពីថ្ងៃពុធ ទី៣១ សីហា។ ដោយឡែករឿង «ភរិយាបណ្ដូលចិត្ត» ដែលជាខ្សែភាពយន្តល្បីបំផុតនៅថៃ ភីអិនអិន នឹងចាក់បញ្ចាំងនៅក្នុងពេលឆាប់ៗខាងមុខនេះផងដែរ"។
កញ្ញា Ranee Campen ឬ Bella ជាតារាសម្ដែងស្រីល្បីឈ្មោះប្រចាំស្ថានីយទូរទស្សន៍ថៃ TV3 ដែលបានចូលប្រឡូកក្នុងវិស័យសិល្បៈដោយចាប់ផ្ដើមដំបូងជាតារាម៉ូដែល មុនពេលចុះកុងត្រាជាតារាសម្ដែងប្រចាំប៉ុស្តិ៍លេខ៣ថៃ នៅឆ្នាំ២០១១។
តារាសម្តែងវ័យ២៦ឆ្នាំរូបនេះ កាលពីឆ្នាំ២០១៣ ទទួលបានតំណែងតួឯកស្រីជាលើកដំបូងនៅក្នុងរឿង Porn Prom Onlaweng ដែលជារឿងជាប់ចំណាត់ថ្នាក់លេខ៥ក្នុងចំណោមរឿងភាគនៅក្នុងម៉ោងមាសទាំងអស់របស់ស្ថានីយប៉ុស្តិ៍លេខ៣ថៃក្នុងឆ្នាំនោះ។ បន្ទាប់មក នាងក៏បានសម្តែងជាតួឯកនៅក្នុងរឿងភាគបន្តបន្ទាប់ទៀតឲ្យTV3 មានដូចជារឿង Gentleman Puttipat, Child of a Slave, Flame of Chimplee, Two Worlds of Love, Faithful and Beloved Wife, និងរឿងចុងក្រោយបង្អស់ Mekkala's Castle។
ឆ្នាំ២០១៣ តារាសម្ដែងកូនកាត់ថៃអង់គ្លេសរូបនេះ បានទទួលពានរង្វាន់ជា Fantasy Couple of the Yearពី Kerd Awards ជាមួយនឹងលោក James Jirayu បន្ទាប់ពីពួកគេបានសម្ដែងរឿង Gentleman Puttipat។ មិនតែប៉ុណ្ណោះ នាងក៏ធ្លាប់បានទទួលពានរង្វាន់ជាតារាស្រីមានប្រជាប្រិយភាពបំផុតពីកាសែត12th Kom Chad Luek ផងដែរ។
រឿងភាគចុងក្រោយបង្អស់របស់ Bella នឹងចាក់បញ្ចាំងនៅលើកញ្ចក់ទូរទស្សន៍ភីអិនអិន នៅថ្ងៃពុធ ទី៣១ សីហា នេះហើយ គឺរឿង Mekkala's Castle ឬ វិមានមេខលា បន្ទាប់ពីរឿង ចំណងស្នេហ៍ អន្ទាក់កម្ម ដែលផ្សាយជូនទស្សនារៀងរាល់ថ្ងៃចន្ទ ដល់សុក្រ វេលាម៉ោង ១២ ថ្ងៃត្រង់ ដល់ម៉ោង១រសៀល។
វិមានមេខលា ជាភាពយន្តភាគដែលរៀបរាប់ពីតួឯកស្រីដែលមានចរិតចចេសរឹងរូសដែលត្រូវបានទម្រើសដោយម្ដាយមីងរបស់នាងតាំងពីតូចរហូតដល់ធំ។ ដល់ពេលដឹងក្តីនាងមេខលា ដែលសម្ដែងដោយBella ក៏បានក្លាយខ្លួនជាតារាល្បីឈ្មោះម្នាក់ តែក្រោយមកក៏ធ្លាក់ខ្លួន ហើយត្រូវការលុយជាបន្ទាន់ ក៏សម្រេចចិត្តលក់ព្រៃឈើដែលជារបស់ប៉ានាង តែចៃដន្យអាក្រក់នៅតាមផ្លូវទៅកាន់ព្រៃនោះ នាងបានជួបគ្រោះថ្នាក់បាត់បង់ការចងចាំ ហើយត្រូវបានផ្ដល់អត្តសញ្ញាណថ្មីជាតួអង្គឈ្មោះ Prim ដោយបុរសឈ្មោះ Paya ដែលជាតួឯកប្រុស សម្ដែងដោយតារាកូនកាត់ថៃអាល្លឺម៉ង់ Andrew Charlie Gregson។
ទោះបីជានាងបាត់ការចងចាំក៏ពិតមែន ប៉ុន្តែនាងនៅតែជាមនុស្សរប៉ិលរប៉ូច តែទីបំផុតអ្នកនៅទីនោះក៏បានធ្វើឲ្យនាងកែប្រែទៅជាមនុស្សដែលមិនអាត្មានិយមដូចកាលពីមុន។ រឿងរ៉ាវកាន់តែច្របូកច្របល់នៅពេលដែលនាងមេខលា និងកំលោះសង្ហា Paya មានចិត្តលើគ្នាតែនៅមិនសារភាពរហូតដល់មានយប់មួយពួកគេបានគេងជាមួយគ្នា។ យ៉ាងណាមិញ ក្រោយពីនាង មេខលា បានចងចាំរឿងអតីតកាល ហើយដឹងថា Paya កុហកខ្លួន នាងខឹងខ្លាំងណាស់ ក៏ត្រលប់ទៅក្រុងបាងកក វិញ ហើយសម្រេចចិត្តលក់ព្រៃនោះចោល។ ចុងបញ្ចប់នៃសាច់រឿងនាង Mekala និង Paya បានជួបជុំគ្នាវិញ ហើយ Mekala បានផ្លាស់ប្តូរជានារីម្នាក់ថ្មីដែលមានចិត្តស្រឡាញ់ព្រៃឈើខ្លាំងដូចPayaដែរ។
ភីអិនអិន ជាស្ថានីយទូរទស្សន៍ថ្មី និងទំនើបបំផុតនៅកម្ពុជា បានចុះកិច្ចសន្យាផ្ដាច់មុខមួយកាលពីខែ ឧសភា ២០១៥ ក្នុងការទទួលបានសិទ្ធិចាក់ផ្សាយខ្សែភាពយន្តភាគល្បីៗទាំងចាស់ ទាំងថ្មី របស់ស្ថានីយទូរទស្សន៍ប៉ុស្តិ៍លេខ៣ថៃ។ កិច្ចព្រមព្រៀងនេះ មានតម្លៃជាទឹកប្រាក់ប្រមាណជាង១លានដុល្លារក្នុងមួយឆ្នាំៗ។
សម្រាប់ព័ត៌មានបន្ថែមពាក់ព័ន្ធនឹងការមកដល់របស់តារាសម្តែងស្រី Bella សូមតាមដានផេកហ្វេសប៊ុក www.facebook.com/PNNDramaFanClub ៕
អត្ថបទ៖ ពាណិជ្ជកម្ម