មន្ត្រី ណាហ្គាវើល បានចុះពិនិត្យទីលានខេត្តកំពង់ស្ពឺធ្វើជា Home របស់ខ្លួន

2016-08-30 21:09:52
ចំនួនមតិ 0 | ចំនួនចែករំលែក 0

ចន្លោះមិនឃើញ

បើតាម Page របស់រដ្ឋបាលខេត្តកំពង់ស្ពឺបានបង្ហោះមុននេះបន្តិច គឺក្លឹបណាហ្គាវើល និងខេត្តកំពង់ស្ពឺបានឯកភាពគ្នាអស់ហើយ ក្នុងការយកតារាងបាល់ទាត់ទីរួមខេត្ត ធ្វើជា Home ផ្ទាល់របស់ខ្លួន។

ក្រុមការងាររបស់ NagaWorld ដឹកនាំដោយលោក Yeo Wee Han Hans ប្រធានផ្នែកកីឡារបស់ NagaWorld FC ថ្ងៃនេះបានចុះមកដល់តារាងបាល់ទាត់ខេត្តកំពង់ស្ពឺផ្ទាល់ អមដោយមន្ត្រីជំនាញខាងសាងសង់កីឡដ្ឋានស្មៅសិប្បនិម្មិត ដែលអាចយកគំរូប្លង់សាងសង់តាមកីឡដ្ឋាននៅខេត្តស្វាយរៀង។

Page ខាងលើបានបន្តទៀតថា NagaWorld បានឯកភាពគ្នាហើយ ថានឹងសាងសង់កែសម្រួលទីលានបាល់ទាត់ខេត្តកំពង់ស្ពឺនេះ ស្ថិតក្នុងមណ្ឌលកីឡាខេត្ត ឱ្យមានលក្ខណៈស្តង់ដា។ ក្នុងនោះមានការពង្រីកទំហំទីលាន ការកសាងកន្លែងអង្គុយដែលអាចទទួលអ្នកទស្សនាបានប្រហែល ៣ពាន់នាក់ កែសម្រួលប្រព័ន្ធភ្លើង និងប្រព័ន្ធលូជាដើម។ បន្ថែមពីលើនេះ នឹងមានការចង់សម្ព័ន្ធភាពជាដៃគូរវាងក្រុមជម្រើសខេត្តកំពង់ស្ពឺនិងក្រុមបាល់ទាត់ NagaWorld FC នេះផង ហើយក៏សុំឱ្យមានការសហការល្អជាមួយអាជ្ញាធរខេត្ត និងអ្នកពាក់ព័ន្ធនានាលើគម្រោងនេះ។

យ៉ាងណាមិញរឿងរ៉ាវនេះ លោក Han បាននិយាយដែរថានេះគ្រាន់តែក្រុមរបស់លោកចុះទៅមើលសិនប៉ុណ្ណោះ ដើម្បីសិក្សាអំពីតម្លៃនៃការសាងសង់ ដោយមិនទាន់មានការចុះកិច្ចសន្យាឱ្យបានជាផ្លូវការនៅឡើយទេ។ ក្រុមរបស់លោកនឹងស្វែងរកវិធីសាស្ត្របន្ថែមទៀត ចំពោះអ្វីដែលអាចកើតមានជាផ្លែផ្កាបាន៕

អត្ថបទ៖ មុន្នី រម្យ ប្រភព៖រដ្ឋបាលខេត្តកំពង់ស្ពឺ