ផ្សារទេសចរណ៍រំលេចស្ថាបត្យកម្មខ្មែរ នឹងបង្ហាញខ្លួនក្នុងពេលឆាប់ៗ

2016-09-06 21:33:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ដំណើរការកែលម្អផ្សារទំនើបសុរិយា បានប្រព្រឹត្តទៅអស់ជាច្រើនថ្ងៃហើយ និងអាចបញ្ចប់ទាំងស្រុងនៅដើមឆ្នាំ២០១៧។ មិនត្រឹមតែប្ដូរឈ្មោះប៉ុណ្ណោះទេ សូរិយា សេនធ័រ ភ័នធ៍ នឹងប្រែក្លាយមុខមាត់ស្ទើរទាំងស្រុង ទៅជាកន្លែងទិញទំនិញដ៏ទាក់ទាញមួយ ហើយអ្វីដែលរឹតតែពិសេសទៅទៀតនោះ គឺផ្សារទេសចរណ៍ជាន់ទី៤ នឹងរំលេចស្នាដៃស្ថាបត្យកម្មខ្មែរ ដែលមានភាពល្បីល្បាញដក់ជាប់ក្នុងទឹកចិត្តកូនខ្មែរគ្រប់រូប និងជាសម្រស់ពិតនៃទីក្រុងគជ់។

លោក រ៉ូប៊ីន តៃ ជាទីប្រឹក្សាអគ្គនាយក សូរិយា សេនធ័រ ភ័នធ៍ និងជាអតីតស្ថាបត្យករជំនាញម្នាក់បានបញ្ជាក់ថា មូលហេតុដែលលោកគិតដល់ស្ថាបត្យកម្មចាស់ៗទាំងនោះ ព្រោះវាមានភាពទាក់ទាញ និងដើម្បីផ្សព្វផ្សាយនូវកិត្យានុភាពកេរដំណែលវប្បធម៌ពិតៗរបស់ខ្មែរដល់អ្នកទេសចរបរទេសផងដែរ។

លោក រ៉ូប៊ីន តៃ បាននិយាយថា៖ "ខ្ញុំមើលឃើញស្ថាបត្យកម្មខ្មែរពិតជាអស្ចារ្យណាស់ ហើយខ្ញុំចាប់ផ្ដើមដឹងកាលពី ២ឆ្នាំមុននេះ ពេលមកដល់ទឹកដីកម្ពុជាដំបូង... វាសុទ្ធតែជាស្នាដៃដ៏ល្បីល្បាញ ខ្ញុំចាប់អារម្មណ៍ខ្លាំងណាស់ ហើយស្នាដៃទាំងនោះពិតជាទាក់ចិត្តខ្ញុំតែម្ដង..."។ លោកបានបន្តទៀតថា ដំណើរការកែលម្អផ្សារទំនើបសុរិយា នឹងទាញយកស្នាដៃទាំងនោះ មកដាក់ប្រមូលផ្ដុំគ្នានៅផ្សារទេសចរណ៍ ដែលជាផ្នែកមួយអាចជួយអភិរក្ស និងផ្សព្វផ្សាយផងដែរ។

ទីប្រឹក្សាអគ្គនាយករូបនេះ បានបន្ថែមថា នៅជាន់ទី៤ នេះ នឹងផ្ដោតសំខាន់លើការដាក់លក់ផលិតផលក្នុងស្រុក ឬអាចផ្ដល់អាទិភាពឲ្យផលិតផលក្នុងប្រទេសរហូតដល់ ៨០ភាគរយ។ បន្ទាប់ពីកែលម្អរួចរាល់ លោក រ៉ូប៊ីន តៃ សង្ឃឹមថាផ្សារទេសចរជាន់ទី៤ ដែលដាក់ឈ្មោះថា The Bazaar នេះ អាចទាក់ទាញទាំងភ្ញៀវជាតិ និងអន្តរជាតិ ព្រោះពួកគេបានទៅទិញទាំងទំនិញមានគុណភាព និងអាចទស្សនាស្ថាបត្យកម្មខ្មែរនានាជាច្រើនក្នុងពេលតែមួយព្រមគ្នា។

ចំណែកគណៈគ្រប់គ្រង សូរិយា សេនធ័រ ភ័នធ៍ បានបញ្ជាក់យ៉ាងច្បាស់ថា ក្នុងអំឡុងពេលកែលម្អនេះ សូរិយា សេនធ័រ ភ័នធ៍ (ផ្សារទំនើប សូរិយា) បើកដំណើរការជាធម្មតា ព្រមទាំងផ្ដល់នូវកម្មវិធី លក់ លាងឃ្លាំង ដែលមានការបញ្ចុះតម្លៃពី៣០% ដល់ ៧០%។ ផែនការកំណែទម្រង់ និងកែលម្អខាងលើនេះ សូរិយា សេនធ័រ ភ័នធ៍(ផ្សារទំនើប សូរិយា) នឹងផ្ដល់ជូនអតិថិជន នូវបទពិសោធន៍ដ៏អស្ចារ្យដែលមិនធ្លាប់មានពីមុនមក៕

ទស្សនាវីដេអូបទសម្ភាសន៍រវាង Sabay និងលោក រ៉ូប៊ីន តៃ ដូចខាងក្រោម៖