ម៉ូដរ៉ូបរបស់តារាស្រី អូនអ៊ីង ច្នៃពីសារុងពុម្ព

2016-09-12 17:29:31
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាស្រីវ័យក្មេងដែលមានឈ្មោះក្នុងសិល្បៈ អូនអ៊ីង បានទាក់ទាញការចាប់អារម្មណ៍ពីមហាជនយ៉ាងច្រើនក្នុងឱកាសសម្ពោធរឿង "ចន្ទ្រា” ព្រោះតែបានស្លៀករ៉ូបពណ៌ក្រហមដែលច្នៃពីសារុងពុម្ព។

តារាស្រីវ័យ ២០ ឆ្នាំខាងលើ បានប្រាប់ថា បានជានាងជ្រើសរើសសារុងដែលប្រជាជនខ្មែរពេញនិយមស្លៀកមកធ្វើជារ៉ូបស្លៀក ដោយសារមានកត្តាពីយ៉ាង។ "ទី១ នាងខ្ញុំមិនចង់ឲ្យដូចគេ ហើយទី២គឺខ្ញុំចង់បានអ្វីដែលប្លែក។”

ស្រីស្រស់សម្បុរស្រអែមបានបន្តថា កន្លងមករ៉ូបប្រភេទសាច់ក្រណាត់ ឬប៉ាក់ មានគេស្លៀកច្រើនដែលធ្វើឲ្យមើលមានភាពដដែលៗ។ ដូច្នេះហើយ ដើម្បីឲ្យប្លែក និងសន្សំសំចៃផង ទើបច្នៃមួយម៉ូដនេះតែម្ដង។ "នេះជាចំណុចពិសេសដែរបង គឺខ្ញុំគិតថារ៉ូបមួយនេះអាចសន្សំសំចៃបានច្រើន ដោយចំណាយពេលតែពីរថ្ងៃ និងប្រាក់ប្រហែល ៨០ ដុល្លារ។ តែបើធៀបនឹងរ៉ូបដទៃរ៉ូបពណ៌ក្រហមនេះថោកជាងឆ្ងាយណាស់ តែមើលទៅក៏ស្រស់ស្អាតម្យ៉ាងដែរ”។

អូនអ៊ីង ទើបប្រឡូកក្នុងសិល្បៈបានជាងមួយឆ្នាំប៉ុណ្ណោះ និងបានថតខ្សែភាពយន្តមួយចំនួនដូចជារឿង"ភូមិខ្ញុំស្រមុំឆ្នាស់" ហើយធ្លាប់ថតស្ប៉តមួយចំនួនទៀតដូចជាក្រុមហ៊ុនទូរសព្ទ cellcard និង ស្រាបៀ black cat និងមានស្ប៉តដទៃទៀត៕