ខ្លាចាស់ សេន ប៊ុនថេន ប៉ះថៃល្ងាចស្អែកនេះ បារម្ភកម្លាំងអត់គ្រប់

2016-09-09 23:40:07
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករចាស់វស្សា សេន ប៊ុនថេន ព្រួយបារម្ភជុំវិញកម្លាំងធ្លាក់ចុះ នៅពេលរូបគេត្រូវទទួលស្វាគមន៍អ្នកលេងឆ្លងដែនថៃនៅសង្វៀន CNC នាល្ងាច ថ្ងៃសៅរ៍ ទី១០ ខែកញ្ញា ឆ្នាំ២០១៦នេះ។

អ្នកតាមដានក៏ដូចជាអ្នកស្រលាញ់ប្រដាល់គុនខ្មែរសុទ្ធតែស្គាល់ហើយកីឡាករចាស់វស្សា សេន ប៊ុនថេន ជាកីឡាករជើងខ្លាំងមួយរូបប្រចាំប្រទេស។ ដោយខ្លាចអ្នកគាំទ្រភ្លេចមុខ ហើយណាមួយចង់ឡើងរំលឹកក្បាច់គុនរបស់ខ្លួនផងនោះទើបរូបគេសម្រេចចិត្តឡើងប្រកួតតែម្ដង។

សេន ប៊ុនថេន បន្តថា ការប្រកួតល្ងាចនេះ រូបគេបារម្ភអំពីកម្លាំងបន្តិចបន្តួចផងដែរដោយខ្លាចអស់ស៊ុហ្វដោយសាររូបគេវ័យកាន់តែច្រើន។ យួរៗឡើងប្រកួតម្ដង ដូច្នេះកម្លាំងប្រាកដជាមិនពេញល្អឡើយ ហើយការហ្វឹកហាត់ក៏មិនបានដិតដល់ដូចកាលពីក្មេង។

ជើងខ្លាំង សេន ប៊ុនថេន ប្រកួតចុងក្រោយប្រើកែងស្ដាំផ្ដួលកីឡាករថៃ Phongdeth Doungchai ឲ្យសន្លប់ធំក្នុងទឹកទី១ កាលពីថ្ងៃទី៩ ខែមេសា ឆ្នាំ២០១៦ កន្លងទៅនេះ។ រូបគេជាកីឡាករដែលឈ្នះខ្សែក្រវាត់ និងពានរង្វាន់ជាច្រើនក្នុងពេលកន្លងមក ព្រមទាំងធ្លាប់ចេញទៅប្រកួតនៅព្រឹត្តិការណ៍ធំៗនៅក្រៅប្រទេសដូចជាបារាំង ថៃផងដែរ៕

អត្ថបទ៖ នួន ស៊ីណា