ភាពយន្តខ្នាតធំរបស់ Rock ចាប់យកកីឡាករ លី វ៉ាហេទ ធ្វើតួឯក

2016-09-12 16:03:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសារតែទទួលបានការគាំទ្រខ្លាំងពីប្រិយមិត្ត តាមរយៈរូបសម្រស់ស្រស់សង្ហារ ខ្សែការពាររបស់ក្លឹបបឹងកេតអង្គរ លី វ៉ាហេទ ត្រូវបានអ្នកនិពន្ធ ស៊ា រស្មី ជ្រើសរើសឲ្យសម្ដែងជាតួឯកភាពយន្តខ្នាតធំឲ្យផលិតកម្មរ៉ុក(Rock) ចំណងជើងថា "ខូចចិត្តអាជីព"។

ពីឆ្វេងទៅស្តាំ នាយ ចឺម ស៊ា រស្មី លោក យឹម សុសត្យា សុខ សោម៉ាវត្តី និងអ្នកដឹកនាំ

អ្នកនិពន្ធ ស៊ា រស្មី ថ្លែង ៖ "ក្នុងរឿងនេះ ខ្ញុំរើសកីឡាករ៤ក្រុមមកបញ្ចូលគ្នា តែក្នុងនោះ មានតែលោក លី វ៉ាហេទ ម្នាក់ទេដែលស្ថិតក្នុងក្រុមជម្រើសជាតិ។ ពាក់ព័ន្ធនឹង តួប្រុស បានជាខ្ញុំជ្រើសរើសយកគាត់ដោយសារ គាត់ជាកីឡាករជម្រើសជាតិ ហើយឥឡូវគាត់កំពុងតែល្បីក្នុងស្រទាប់យុវវ័យ "។

យ៉ាងណាមិញ អ្នកនិពន្ធ នៅមានការព្រួយបារម្ភខ្លះៗ ពាក់ព័ន្ធនឹងការសម្តែងលើកដំបូងរបស់តួឯកប្រុស។ យ៉ាងនេះក្ដី មុននឹងឈានដល់ការចេញថត ស៊ា រស្មី ប្រាប់ថា នឹងបង្រៀនតួឯកប្រុសរូបនេះពីរបៀបសម្តែង និងប្លង់ពិបាកៗ រយៈពេល៣ថ្ងៃសិន។

លី វ៉ាហេទ មិនបានមានវត្តមានទេ ក្នុងថ្ងៃក្រុងពាលីកាលពីថ្ងៃសៅរ៍ ដោយលោកជាប់ត្រៀមខ្លួនចូលរួមប្រកួត AFF U-19 Championship 2016 នៅប្រទេសវៀតណាម។ ប៉ុន្តែជួបជាមួយ Sabay តាមរយៈទូរសព្ទ លោកអះអាងថា ពិតជារំភើបដែលមានឱកាសសម្ដែងក្នុងភាពយន្តខ្នាតធំរបស់ផលិតកម្មរ៉ុក(Rock) តែយ៉ាងណាក៏មិនបោះបង់អាជីពកីឡាដែរ។ កីឡាជម្រើសជាតិរូបនេះ អះអាងថា ជឿជាក់លើសមត្ថភាពខ្លួនឯងតែ៥០ភាគរយប៉ុណ្ណោះ ប៉ុន្តែនឹងព្យាយាមឲ្យអស់ពីសមត្ថភាព។

វិលមករឿង "ខូចចិត្តអាជីព" វិញ លោក យឹម សុសត្យា អ្នកគ្រប់គ្រងការផលិតរបស់ផលិតកម្ម Rock មានប្រសាសន៍ថា រឿងនេះ ចាយទុនប្រហែល៦ម៉ឺនដុល្លារ ដែលតួនីមួយៗដែលសម្តែងក្នុងរឿងនេះសុទ្ធតែធ្លាប់ទទួលបានការគាំទ្រពីទស្សនិកជន។ តួសម្តែងក្នុងភាពយន្តខ្នាតធំ "ខូចចិត្តអាជីព" មានដូចជា សុខ សោម៉ាវត្តី លី វ៉ាហេទ នាយ ចឺម ប៉េងប៉ោង នាយ តេឡេ និង តារាល្បីៗជាច្រើនដួងទៀត៕

សកម្មភាពក្រុងពាលីកាលពីថ្ងៃសៅរ៍នៅ ក្រុមហ៊ុន Rock ចាក់អង្រែក្រោម៖