"ព័ត៌មានសម្ងាត់" ក្នុងច្បាប់សិទិ្ធទទួលព័ត៌មាន មិនទាន់គាំទ្រច្រើនពីមហាជន
- 2016-09-23 17:59:21
- ចំនួនមតិ 0 | ចំនួនចែករំលែក 0
"ព័ត៌មានសម្ងាត់" ក្នុងច្បាប់សិទិ្ធទទួលព័ត៌មាន មិនទាន់គាំទ្រច្រើនពីមហាជន
ចន្លោះមិនឃើញ
មតិភាគច្រើនមិនយល់ស្របនឹងអត្ថន័យ "ព័ត៌មានសម្ងាត់" ឡើយ ដោយសារនិយមន័យហាក់មិនបានឆ្លុះបញ្ចាំងពីសិទិ្ធទទួលព័ត៌មាននោះទេ ផ្ទុយទៅវិញ រឹតតែបង្កការលំបាកក្នុងការសុំព័ត៌មានថែមទៀត។
ក្នុងវេទិកាពិភាក្សាផ្នែកប្រព័ន្ធផ្សព្វផ្សាយលើសេចក្ដីព្រាងច្បាប់ស្តីពីសិទិ្ធទទួលព័ត៌មាន ពួកគេយល់ថា ការកំណត់បែបនេះមិនខុសពីបិទសិទ្ធក្នុងការសុំព័ត៌មាន និងកាន់តែធ្វើឲ្យមន្ត្រីជាច្រើនយកលេសលើពាក្យ "ព័ត៌មានសម្ងាត់" នេះ មិនផ្ដល់ដំណឹងដល់ពួកគេ។
អ្នកនាង លឹម ធីតា ប្រធានផលិតនៃអង្គការ CCIM លើកឡើងថា និយមន័យនេះពេលអានទៅ ហាក់ដូចជាហាមស្ទើរគ្រប់រឿងទាំងអស់ អ្វីក៏មិនអាចសុំបានដែរព្រោះប៉ះពាល់អន្តរាយច្រើនដល់សង្គមជាតិ។ ដូចអ្នកកាសែតត្រូវការព័ត៌មានរាល់ថ្ងៃ បើកំណត់និយមន័យបែបនេះ ច្បាស់ជាគ្មានព័ត៌មានរកបាននោះទេ ថាមិនស្រួលអ្នកការសែតគ្មានការងារធ្វើដោយសារនិយមន័យនេះផង។ ដូច្នេះ គួរអ្នកតែងច្បាប់នេះពិចារណាឡើងវិញ។
មិនខុសគ្នាប៉ុន្មាន លោក សិរីមុនី និពន្ធនាយកនៃសារព័ត៌មានតោះអាន ស្នើលុបព័ត៌មានសម្ងាត់នេះចោលតែម្ដង។ លោកថា វាអាចក្លាយជាការកេងចំណេញរបស់មន្ត្រីណាមួយចង់លាក់ព័ត៌មានពិតដែលបម្រើប្រយោជន៍សាធារណជន ដោយយកលេសថា ដំណឹងនេះមិនអាចផ្ដល់បាន ព្រោះជាព័ត៌មានសម្ងាត់។ ឧ៖ ការផ្សាយសុខភាពរបស់មន្ត្រីថាបានឈឺធ្ងន់ វានៅក្នុងព័ត៌មានសម្ងាត់ មិនអាចផ្សាយបានទេ។ តែតាមពិតដំណឹងនេះបើនៅស្រុកគេជារឿងក្ដៅគគុក នឹងចេញផ្សាយយ៉ាងទូលាយ។ ដូចជាគេផ្សាយពីសភាពជំងឺលោកស្រី ហ៊ីឡារី គ្លីនតុន ត្រូវបានចាត់ទុកថាជាព័ត៌មានល្អ ដោយសារសភាពរបស់បុគ្គលសាធារណៈត្រូវតែមហាជនដឹងលឺ ព្រោះប៉ះពាល់ដល់ការដឹកនាំប្រទេសជាតិ។
ងាកមកយុវសិស្ស ចម្រើនលិការ និស្សិតសាកលវិទ្យាល័យន័រតុន ប្រាប់ថា ពិបាកយល់ន័យព័ត៌មានសម្ងាត់ ព្រោះទូលាយពេកមិនកំណត់ច្បាស់លាស់។ និស្សិតជំនាញធនាគារនិងហិរញ្ញវត្ថុ ចង់ឲ្យអ្នកពាក់ព័ន្ធលើច្បាប់នេះសម្រាយន័យឲ្យច្បាស់ ដើម្បីងាយយល់ជាងនេះកុំឲ្អ្វីៗក៏សម្ងាត់ចឹង ។
ក្នុងជំពូកទី៤ត្រង់មាត្រា២០នៃសេចក្ដីព្រាងច្បាប់សិទ្ធទទួលបានព័ត៌មាន "ព័ត៌មានសម្ងាត់" គឺស្ថាប័នសាធារណៈអាចបដិសេធផ្ដល់ព័ត៌មានដល់សាធារណជន ប្រសិនបើការបញ្ចេញព័ត៌មាននោះបណ្ដាលឲ្យ៖
-អន្តរាយដល់សន្តិសុខសណ្ដាប់ធ្នាប់សាធារណៈ -អន្តរាយដល់ទំនាក់ទំនងជាមួយប្រទេសដទៃ -អន្តរាយដល់សេដ្ឋកិច្ច និងហិរញ្ញវត្ថុសាធារណៈជាតិ -ប៉ះពាល់ដល់សំណុំរឿងក្តីរបស់តុលាការ ឬការសម្ងាត់របស់តុលាការ -ប៉ះពាល់ដល់អាថ៌កំបាំងឯកជនបុគ្គល ដោយរួមបញ្ចូលទាំងសំណុំរឿងរបស់មន្ត្រី រាជការ សំណុំរឿងពាក់ព័ន្ធបញ្ហាសុខភាព សំណុំរឿងវិវាទនីតិឯកជន -គ្រោះថ្នាក់ដល់មន្ត្រីដែលអនុវត្តច្បាប់ ឬបំពេញបេសកម្ម -ប៉ះពាល់ដល់លិខិតបទដ្ឋានគតិយុត្ត និងបទបញ្ញត្តិហាមឃាត់ស្ដីពី ព័ត៌មានសម្ងាត់នៃព្រះរាជាណាចក្រកម្ពុជា។
លោក ប៉ា ងួនទៀង (ស្តាំ)
ជាទស្សនៈ លោក ប៉ា ងួនទៀង នាយកប្រតិបត្តិ CCIM និយាយថា បើពង្រួមន័យកាន់តែតូច ឲ្យជាក់លាក់ជាងនេះកាន់តែល្អ ដោយសារការកំណត់ន័យព័ត៌មានសម្ងាត់មានភាពទូលាយពេក។ ព័ត៌មានសម្ងាត់គួរតែហាមលើ ការផ្សាយទិន្នន័យឃ្លាំងស្តុកអាវុធឬស្ថានភាពកងទ័ពពេលមានសង្គ្រាម និងសំណុំរឿងអនីតិជនក្នុងតុលាការជាដើម។
ចំពោះលោក ឆាយ សុផល មន្ត្រីកម្មវិធីនៃអង្គការ UNESCO គួរមានការទាមទារឲ្យផ្ដល់និយមន័យ លើព័ត៌មានសម្ងាត់ឲ្យបានច្បាស់លាស់។ បើមិនដូច្នេះទេមន្ត្រីដែលផ្ដល់ព័ត៌មាន ឬទទួលបន្ទុកព័ត៌មាននឹងយកលេសថា នេះជាព័ត៌មានសម្ងាត់។ ការកំណត់និយមន័យព័ត៌មានសម្ងាត់គឺមានសារៈសំខាន់ណាស់ម្ល៉ោះហើយត្រូវតែពិភាក្សាគ្នា។ យ៉ាងណា លោកថា ច្បាប់នេះស្ថិតក្នុងសេចក្ដីព្រាងនៅឡើយ មិនទាន់បានជជែកគ្នាកំណត់បែបណាក្នុងក្រុមការងារបច្ចេកទេសនោះទេ។
ការបង្កើតច្បាប់ដែលជាប្រវត្តិសាស្ត្រលើសិទ្ធទទួលព័ត៌មាននេះ លោកថា មានទាំងមន្ត្រីសង្គមស៊ីវិលទាំងជាតិនិងអន្តរជាតិ អ្នកសារព័ត៌មាន ក្រុមប្រឹក្សាច្បាប់មកពីទីស្ដីការគណៈរដ្ឋមន្ត្រី និងក្រសួងយុត្តិធម៌ចូលរួម។ ដូច្នេះច្បាប់នេះ នឹងមានតម្លាភាព៕
អត្ថបទ៖ លឹម សុនា
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
