ផលិតករបញ្ជាក់មូលហេតុ I Am a Singer គ្មានតារាក្រៅផលិតកម្មចូលរួម

2016-10-01 14:31:02
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក គង់ រចនា ដែលជាផលិតករកម្មវិធីប្រឡងចម្រៀង I Am a Singer Cambodia បានថ្លែងមកកាន់ Sabay ដើម្បីបកស្រាយពីចម្ងល់មួយចំនួនដែលថា ហេតុអ្វីបានជាប្រឡងចម្រៀងនេះ ពុំមានតារាចម្រៀងក្រៅផលិតកម្ម ហង្សមាស ចូលរួម?

លោក គង់ រចនា ផលិតករកម្មវិធីប្រឡងចម្រៀង I Am a Singer Cambodia

ផលិតករកម្មវិធីប្រឡងចម្រៀងមានប្រភពមកពីប្រទេសកូរ៉េ បានលើកឡើងថា មានមតិបងប្អូនលើកឡើងអំពីបញ្ហានេះ ច្រើន ថាហេតុអ្វីពុំមានតារាចម្រៀងផ្សេងក្រៅពី ហង្សមាស ចូលរួម? “តាមពិតទៅខាងយើង មិនបានហាមតារាចម្រៀងណាទាំងអស់ សំខាន់ឲ្យតែគាត់ជាតារាចម្រៀងអាជីព គាត់អាចដាក់ពាក្យប្រឡងបាន ព្រោះមុននឹងចូលបង្ហាញសមត្ថភាពយើងតម្រូវឲ្យដាក់ពាក្យជាមុនសិន" លោកថ្លែង។

លោកបន្តទៀតថា បញ្ហានេះ បានភ្ជាប់ជាមួយបញ្ហាមួយចំនួន ក្នុងនោះអាចតារាចម្រៀងអាជីពមួយចំនួន មិនទាន់យល់ច្បាស់ពីកម្មវិធីប្រឡងចម្រៀងមួយនេះ តារាចម្រៀងខ្លះទៀតគិតថាខ្លាចធ្លាក់ធ្វើឲ្យបាត់បង់ប្រជាប្រិយភាព តែតាមពិតពិតមិនដូច្នោះទេ គឺតារាចម្រៀងទាំងនោះ រឹតតែមានឱកាសទាញប្រជាប្រិយភាពរបស់ខ្លួនក្នុងការប្រឡងនេះតែម្ដង។

"ខ្ញុំសូមសរសើរតារាចម្រៀងអាជីពទាំងអស់ដែលគាត់យល់ច្បាស់ពីកម្មវិធីមួយនេះហើយហ៊ានចូលរួមបង្ហាញសមត្ថភាព"។ លោក បន្ថែមថាសម្រាប់រដូវកាលទី១នេះតារាចម្រៀងក្រៅផលិតកម្ម ហង្សមាស គឺលោក អាន វិសាល មួយរូបហើយដែលក្លាហានចូលរួមប្រឡងប្រជែងក្នុងកម្មវិធីនេះ។

នៅថ្ងៃសៅរ៍ល្ងាចនេះ ជាវគ្គពាក់កណ្ដាលផ្ដាច់ព្រ័ត្រហើយកុំភ្លេចតាមដាន និងផ្ញើសារគាំទ្រដល់តារាក្នុងដួងចិត្តរបស់អ្នក ឲ្យឈានទៅដល់វគ្គផ្ដាច់ព្រ័ត្រតារាចម្រៀងអាជីព៤រូប ក្នុងនោះមាន ដួង វីរៈសិទ្ធ យក់ ដួងតារា វី ឌីណែត និង សួស វីហ្សា បានត្រៀមខ្លួនជាស្រេច ដើម្បីបង្ហាញសមត្ថភាពជាមួយវិញ្ញាសាថ្មីសម្រាប់សប្ដាហ៍ទី១១នេះ៕