សិល្បករប្រឈមនឹង "ក្រមសីលធម៌នៃអ្នកសិល្បៈ"
- 2016-09-27 22:32:46
- ចំនួនមតិ 0 | ចំនួនចែករំលែក 0
សិល្បករប្រឈមនឹង "ក្រមសីលធម៌នៃអ្នកសិល្បៈ"
ចន្លោះមិនឃើញ
តាមសេចក្ដីព្រាង ដែលត្រូវបានលើកយកមកពិគ្រោះយោបល់គ្នានាព្រឹកមិញ សិល្បករខ្មែរទាំងអស់ដែល នឹងត្រូវប្រឈមនឹងច្បាប់ថ្មីមួយដែលបច្ចុប្បន្ននៅជាពង្រាងនៅឡើយ គឺ "ក្រមសីលធម៌នៃអ្នកសិល្បៈ"។
ក្រមសីលធម៌នេះ ជាផែនការថ្មីមួយរបស់ក្រសួង បន្ទាប់ពីដាក់ចេញប្រកាសពីផែនការប្រើប្រាស់គ្រប់គ្រងសិទ្ធិរួម ដើម្បីការពារផលប្រយោជន៍ ក៏ដូចជាស្នាដៃរបស់អ្នកនិពន្ធកាលពីខែមុន។ តាមរដ្ឋមន្ត្រីក្រសួងវប្បធម៌ និងវិចិត្រសិល្បៈ ជំទាវ ភឿង សកុណា បានឲ្យដឹងថា នេះជាផែនការ លើកកម្ពស់ និងរក្សាបាននូវភាពថ្លៃថ្នូររបស់សិល្បៈវប្បធម៌ខ្មែរ ដែលមានឈ្មោះថាប្រទេសនៃវប្បធម៌។
លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ(រូបភាព៖ Facebook page ក្រសួងវប្បធម៌)
ផ្ដើមដោយពុំនោល "ធម្មជាតិជាអ្នកជួយ ខ្ទួយជាអ្នកទិច" លោក ជំទាវ បានមានប្រសាសន៍ថា សិល្បករ សិល្បការិនីខ្មែរយើង គឺមានធម្មជាតិដ៏ល្អ មានទេពកោសល្យ ប៉ុន្តែពេលខ្លះត្រូវទិចដោយខ្ទួយ តាមការភ្លាំងភ្លាត់ ធ្វើកំហុសមួយពេល តាមរយៈអកប្បកិរិយា និយាយស្ដី ឬការស្លៀកពាក់មិនសមរម្យ។ ដូច្នេះហើយ ក្រសួងត្រូវផ្ដល់ជំនួយ ជួយពួកគេ មុនពេលអ្វីៗត្រូវបំផ្លាញដោយធម្មជាតិអវិជ្ជមាន។
"យើងមិនអោយធម្មជាតិអវិជ្ជមានណាមួយចូលមកបំផ្លាញធម្មជាតិវិជ្ជមានទេ អីចឹងការធ្វើរបស់យើង មានទាំងណែនាំ និងបើចាំបាច់ក៏ត្រូវពិន័យដែរ"។ ជំទាវ ថ្លែង។
កិច្ចពិគ្រោះយោបល់ព្រឹកមិញ នៅមានការប្រទាំងប្រទើសខ្លះ លើការប្រើពាក្យ "សិល្បៈ" ដែលតាមឯកឧត្តម គឹម គុណវឌ្ឍ ប្រតិភូរាជរដ្ឋាភិបាល ទទួលបន្ទុកអគ្គនាយកទូរទស្សន៍ជាតិ បានមានប្រសាសន៍ថា វាមានន័យទូលំទូលាយពេក ដែលមានទាំងចម្លាក់ និងអ្វីផ្សេងទៀត ខណៈពង្រាងហាក់ផ្ដោតតែលើ មនុស្ស គឺសិល្បករ សិល្បការិនី។
តាមខ្លឹមសារនៃពង្រាងនេះ គឺគ្រប់ដណ្ដប់ទៅលើគ្រប់បុគ្គលអ្នកសម្ដែង ដែលតម្រូវឲ្យរក្សាបាននូវសុជីវធម៌ សីលធម៌ ភាពថ្លៃថ្នូរ ទាំងកាយវិការ ការស្លៀកពាក់ និងវោហាសព្ទ ជាដើម។ ចំណុចនេះទាំងនេះមានចែងក្នុងប្រការ៦ដែលមាន៧ចំណុច នៃពង្រាងទាំងមូល។ ឈរលើមូលដ្ឋានលើកកម្ពស់សិល្បៈវប្បធម៌តែមួយ សិល្បករបានសាទរចំពោះពង្រាងនេះ។
លោក ដួង សុខគា ក្នុងនាមសិល្បករមួយរូបបានគូសបញ្ជាក់ថា លោកសាទរចំពោះសេចក្ដីព្រាង ប៉ុន្តែលោកក៏ត្រៀមលើកពីបញ្ហាប្រឈមមួយចំនួនរបស់ខ្លួនក្នុងនាមសិល្បករដែរ ដោយស្នើកុំអោយរឹតត្បិតខ្លាំងពេក។
លោក ថ្លែងថា "បើតឹងខ្លាំងពេក ដូចឲ្យសិល្បករឈររាំលើខ្សែពួអីចឹង យីងយោង រាំម៉េចនឹងសម ងាកនេះខុស ខាងទៅនោះខុស អីចឹងធ្វើអ្វីមិនកើតទេ"។ សេចក្ដីព្រាង ក៏បានជជែកលើការដាក់ពិន័យផងដែរ ល្គឹគណា សិល្បករ ដើរខុសពីការណែនាំ ធ្វើឲ្យការអសកម្មនៅតែមាន ហើយប៉ះពាល់ដល់សេក្ដីថ្លៃថ្នូររបស់សិល្បៈវប្បធម៌របស់ជាតិ។
រូបភាពនៃការពិន័យទាំងនោះមាន ហៅណែនាំ ឬស្ដីបន្ទោសផ្ទាល់មាត់ ឬព្រមានជាលាយលក្ខណ៍អក្សរផ្សព្វផ្សាយជាសារធាណៈ។ ក្រៅពីនេះករណីធ្ងន់ធ្ងរ គឺផ្អាកមិនអោយធ្វើសកម្មភាពទាក់ទងនឹងវិស័យសិល្បៈ ក្នុងពេលសមស្របណាមួយ អាស្រ័យលើកំហុសឆ្គងដែលកើតមាន។
យ៉ាងនេះក្ដី លោក ជំទាវ រដ្ឋមន្ត្រី បញ្ជាក់ថា ក្រសួងនៅតែប្រកាន់យុទ្ធសាស្ត្រទន់ភ្លន់ជាអាទិភាពដដែល។ "យើងមិនចង់ធ្វើអ្វីឲ្យតឹងតែងពេកទេ គឺប្រកាន់យកវិធីសាស្ត្រណែនាំ និងពន្យល់ឲ្យគាត់យល់ដោយខ្លួនឯងថា បែបនេះ ឬបែបនោះ គួរធ្វើ ឬមិនគួរធ្វើ។ កុំអោយគេថា ប៉ះដៃយកដៃ ប៉ះជើងយកជើងនោះ យើងមិនចង់ធ្វើបែបនេះ។ លើកលែងតែករណីមិនរាងចាលប៉ុណ្ណោះ"៕
អត្ថបទ៖ ទារិកា
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
