ជំងឺឆ្កែឆ្កួតសម្លាប់មនុស្សពី ៣៥ ០០០ ទៅ ៥០ ០០០ នាក់រៀងរាល់ឆ្នាំ
- 2016-09-29 18:59:44
- ចំនួនមតិ 0 | ចំនួនចែករំលែក 0
ជំងឺឆ្កែឆ្កួតសម្លាប់មនុស្សពី ៣៥ ០០០ ទៅ ៥០ ០០០ នាក់រៀងរាល់ឆ្នាំ
ចន្លោះមិនឃើញ
ជំងឺឆ្កែឆ្កួត ជាជំងឺបណ្តាលមកពីវីរុសដែលអាចបង្ការបាន ប៉ុន្តែកាចសាហាវដែលបាន និងកំពុងសម្លាប់មនុស្សពី ៣៥ ០០០ ទៅ ៥០ ០០០ នាក់ទូទាំងពិភពលោកជារៀងរាល់ឆ្នាំ។ របាយការណ៍របស់អង្គការសុខភាពពិភពលោកបង្ហាញថា ៤០% នៃជនរងគ្រោះពីជំងឺនេះ គឺក្មេងដែលមានអាយុក្រោម១៥ឆ្នាំ ហើយជារៀងរាល់ឆ្នាំមានមនុស្សច្រើនជាង១៥លាននាក់ទូទាំងពិភពលោកដែលបានចាក់ថ្នាំបង្ការជំងឺនេះក្រោយពេលសត្វខាំ។
សម្រាប់ឆ្នាំ២០១៦នេះ ទិវាពិភពលោកប្រឆាំងជំងឺឆ្កែឆ្កួត ត្រូវបានប្រារព្ធឡើងក្រោមប្រធានបទ "អប់រំ-ចាក់ថ្នាំបង្ការ‑លុបបំបាត់"។ ព្រឹកថ្ងៃទី២៨ កញ្ញា ម្សិលមិញនេះ ក្រុមហ៊ុនសាណូហ្វីកម្ពុជា ដែលជាសាខាមួយនៃក្រុមហ៊ុនថែទាំសុខភាពឈានមុខគេលំដាប់ពិភពលោក ក៏បានចូលរួមប្រារព្ធទិវាពិភពលោកប្រឆាំងជំងឺឆ្កែឆ្កួតនេះផងដែរ នៅការិយាល័យកណ្តាលរបស់ខ្លួនក្នុងរាជធានីភ្នំពេញ ដោយមានការចូលរួមពីសំណាក់គណៈគ្រប់គ្រង និងបុគ្គលិកទាំងអស់នៃក្រុមហ៊ុនសាណូហ្វីកម្ពុជា។
នាយិកាគ្រប់គ្រងក្រុមហ៊ុនសាណូហ្វីកម្ពុជា លោកស្រី ដាវ ធូង៉ា(Ms. Dao Thu Nga) លើកឡើងនៅក្នុងទិវាពិភពលោកប្រឆាំងជំងឺឆ្កែឆ្កួតថា៖ "ក្រុមហ៊ុនសាណូហ្វី តែងតែបេ្តជ្ញាធ្វើការងារដែលពាក់ព័ន្ធនឹងជំងឺសំខាន់ៗនៅកម្ពុជា។ ជាក់ស្តែង ជារៀងរាល់ឆ្នាំ ក្រុមហ៊ុនតែងគាំទ្រ និងចូលរួមប្រារព្ធទិវាប្រឆាំងជំងឺឆ្កែឆ្កួតនេះ ដើម្បីចូលរួមប្រយុទ្ធប្រឆាំង និងលើកកម្ពស់ការយល់ដឹងជាសាធារណៈអំពីជំងឺឆ្កែឆ្កួតនៅកម្ពុជា"។
យោងតាមការសិក្សារបស់វិទ្យាស្ថានប៉ាស្ទ័រកម្ពុជា ក្នុងចន្លោះពីថ្ងៃទី១ មករា ដល់ទី ៣១ ធ្នូ ២០១៤ មានមនុស្សចំនួន ២១ ៧៨២ នាក់ ត្រូវបានបញ្ជូនមក ឬមកខ្លួនឯងដល់មជ្ឈមណ្ឌលបង្ការជំងឺឆ្កែឆ្កួតនៃវិទ្យាស្ថានប៉ាស្ទ័រកម្ពុជា ដើម្បីចាក់ថ្នាំបង្ការជំងឺឆ្កែឆ្កួតសរុបមានចំនួន ១២៦ ៣៨២ លើក។ ជំងឺនេះ អាចត្រូវបានចម្លងតាមរយៈឆ្កែ និងឆ្មា នៅពេលវាខាំ ក្រញៅ ឬលិឍត្រង់កន្លែងមានរបួសបានដោយងាយ ដោយវាចម្លងមេរោគ LYSSA VIRUSES។ ពេលដែលអ្នកត្រូវបានខាំដោយសត្វឆ្កែ ឬឆ្មាដែលមានជំងឺនេះ ទឹកមាត់វានឹងចម្លងវីរុសនេះទៅជាលិកាក្រោមស្បែក និងសាច់ដុំ។
ជារៀងរាល់ឆ្នាំស្ទើរតែគ្រប់ប្រទេស រដ្ឋាភិបាល អង្គការ និងស្ថាប័ននានាតែងប្រារព្ធ និងរៀបចំបង្កើតកម្មវិធី «ទិវាពិភពលោកប្រឆាំងជំងឺឆ្កែឆ្កួត» ដើម្បីពង្រីកវិសាលភាពនៃការយល់ដឹងអំពីជំងឺនេះ និងបន្តលើកកម្ពស់វិធីបង្ការ និងការពារនៅតំបន់សហគមន៍ដែលងាយរងគ្រោះពីជំងឺនេះ។ ការស្រាវជ្រាវមួយនៅផ្នែកអេពីដេមីសាស្ត្រ និងផ្នែកវីរុសសាស្ត្រនៃវិទ្យាស្ថានប៉ាស្ទ័រកម្ពុជា គឺដើម្បីកំណត់រកវិធីដែលល្អជាងគេទាំងប្រសិទ្ធភាព និងទាំងតម្លៃ សម្រាប់ការបង្ការបឋម (មិនទាន់មានឆ្កែខាំ) និងសម្រាប់ការបង្ការជំងឺឆ្កែឆ្កួតលើមនុស្ស បន្ទាប់ពីត្រូវបានឆ្កែខាំនៅកម្ពុជា និងប្រទេសដទៃទៀត។ ការខិតខំប្រឹងប្រែងនេះ គឺដើម្បីជួយដល់ប្រជាជនកម្ពុជាព្រមទាំងអាជ្ញាធរនានា ខណៈពួកគេកំពុងធ្វើការងារដើម្បីឆ្ពោះទៅរកគោលដៅនៃការតាំងចិត្តរបស់សហគមន៍អាស៊ាន ដើម្បីលុបបំបាត់ជំងឺឆ្កែឆ្កួតទូទាំងសកលលោកឲ្យបាននៅត្រឹមឆ្នាំ២០២០។
បើអ្នកត្រូវបានខាំ ក្រញៅ ឬរងរបួសតាមរូបភាពណាមួយក្តី ដោយសត្វឆ្មា ឬជាពិសេសដោយសត្វឆ្កែ ដែលអ្នកគិតថាវាឆ្កួត អ្នកត្រូវប្រញាប់ទៅជួបគ្រូពេទ្យកាន់តែឆាប់កាន់តែប្រសើរ។ បើអ្នកមិនបានចាក់ថ្នាំបង្ការត្រឹមត្រូវ ហើយរង់ចាំរហូតដល់ចេញរោគសញ្ញានោះ អ្នកនឹងប្រឈមគ្រោះថ្នាក់ខ្ពស់រហូតដល់បាត់បង់ជីវិត។ បើអ្នកសង្ស័យថា អ្នកបានឆ្លងជំងឺនេះ សូមទៅពិគ្រោះយោបល់ជាមួយវេជ្ជបណ្ឌិតជាបន្ទាន់ដើម្បីទទួលបានដំបូន្មាន ឬការចាក់ថ្នាំបង្ការ។ បើអ្នកសង្ស័យថា មានការចម្លងជំងឺឆ្កែឆ្កួតនៅក្នុងសហគមន៍របស់អ្នក អ្នកត្រូវបង្ខាំងសត្វឆ្កែរបស់អ្នកទុកក្នុងបរិវេណផ្ទះ និងចាក់ថ្នាំបង្ការជំងឺឆ្កែឆ្កួតដល់ឆ្កែរបស់អ្នក ដើម្បីការពារក្រុមគ្រួសាររបស់អ្នក។
ក្នុងករណីមានឆ្កែខាំ អ្នកគួរអនុវត្តវិធីបង្ការបឋមដូចខាងក្រោម៖
១. ត្រូវលាងសម្អាតមុខរបួសជាមួយទឹកសាប៊ូ ដោយម៉ត់ចត់ រយៈពេល១៥នាទី។ បើគ្មានសាប៊ូ ត្រូវលាងសម្អាតដោយប្រើទឹកស្អាតធម្មតា ២. លាបថ្នាំសម្លាប់មេរោគ (ថ្នាំកម្ចាត់មេរោគ POVIDONE) ៣. ចៀសវាងការដេរភ្ជិតមុខរបួស បើអាចធ្វើបាន ៤. ឆាប់ទៅពិគ្រោះជាមួយមជ្ឈមណ្ឌលបង្ការជំងឺឆ្កែឆ្កួតក្រោយសត្វខាំជាបន្ទាន់។
សាណូហ្វី ដែលជាក្រុមហ៊ុនឱសថឈានមុខគេមួយលើពិភពលោក បានរកឃើញ និងកែច្នៃ ព្រមទាំងចែកចាយផលិតផលដែលផ្ដោតសំខាន់លើតម្រូវការរបស់អ្នកជំងឺជាចម្បង។ សាណូហ្វី មានចំណុចស្នូលសំខាន់ៗចំនួន ៥ ក្នុងវិស័យថែទាំសុខភាពដែលមានដូចជា៖ ផ្នែកទឹកនោមផ្អែម និងសរសៃឈាមបេះដូង, វេជ្ជសាស្ត្រទូទៅ និងទីផ្សារថ្មីៗ, សាណូហ្វី Genzyme, សាណូហ្វីប៉ាស្ទ័រ និងសុខភាពសត្វ។ សាណូហ្វីបានចុះបញ្ជីទីផ្សារភាគហ៊ុននៅទីក្រុងប៉ារីស (EURONEXT: SAN) និងនៅទីក្រុងញូវយ៉ក (NYSE: SNY)។
សាណូហ្វីប៉ាស្ទ័រ ជាស្ថាប័នថ្នាំបង្ការរបស់ក្រុមហ៊ុនសាណូហ្វី ដែលផលិតថ្នាំបង្ការលើសពី១០០០លានដូសក្នុងមួយឆ្នាំៗ ដែលផ្តល់ការការពារដល់មនុស្សលើសពី៥០០លាននាក់ទូទាំងសកលលោក ជាស្ថាប័នមួយក្នុងចំណោមស្ថាប័នដែលឈានមុខគេ និងធំជាងគេក្នុងឧស្សាហកម្មថ្នាំបង្ការនៅលើសកលលោកអស់រយៈពេលជាងមួយសតវត្សមកហើយ។ សាណូហ្វីប៉ាស្ទ័របាន និងកំពុងផលិតថ្នាំបង្ការការពារជីវិតដែលមានគុណភាពខ្ពស់សមស្របនឹងតម្រូវការផ្នែកសុខភាពសាធារណៈ។ ក្រុមហ៊ុនវិនិយោគក្នុងទឹកប្រាក់លើសពី១លានអឺរ៉ូ សម្រាប់ការស្រាវជ្រាវ និងអភិវឌ្ឍថ្មីៗជារៀងរាល់ថ្ងៃ។ សម្រាប់ព័ត៌មានបន្ថែម សូមចូល www.sanofipasteur.com ឬ www.sanofipasteur.us ៕
អត្ថបទ៖ ពាណិជ្ជកម្ម