ហាប់គីដូ បើកសិក្ខាសាលាបង្ហាញបច្ចេកទេសក្បាច់គុនថ្មីៗដល់សិស្ស៧០នាក់
- 2016-10-12 21:06:33
- ចំនួនមតិ 0 | ចំនួនចែករំលែក 0
ហាប់គីដូ បើកសិក្ខាសាលាបង្ហាញបច្ចេកទេសក្បាច់គុនថ្មីៗដល់សិស្ស៧០នាក់
ចន្លោះមិនឃើញ
សហព័ន្ធកីឡាហាប់គីដូកម្ពុជាបានធ្វើសិក្ខាសាលាដើម្បីបង្ហាញពីបច្ចេកទេសក្បាច់គុនថ្មីៗដល់សិក្ខាកាមជាង៧០រូប ដែលបង្ហាញដោយព្រឹទ្ធាចារ្យក្បាច់គុន សេង ប៊ុនសុង អតីតប្រធានសហព័ន្ធកីឡាមួយនេះ កាលពីព្រឹកថ្ងៃទី១២ ខែតុលា ឆ្នាំ២០១៦ នៅទីស្ដីការគណៈកម្មាធិការជាតិអូឡាំពិកកម្ពុជា។
លោក សេង ប៊ុនសុង បណ្ឌិតក្បាច់គុនកីឡាហាប់គីដូបានឲ្យដឹងថា ការចូលខ្លួនបង្ហាញពីក្បាច់គុននេះ ក្រោយលោកបានស្រាវជ្រាវអស់ជាច្រើនឆ្នាំ។ ក្បាច់គុនដែលលោកលើកយកមកបង្ហាញក្នុងថ្ងៃធ្វើសិក្ខាសាលានេះសុទ្ធសឹងតែជាក្បាច់ថ្មីៗ ដែលពិភពលោកកំពុងប្រើប្រាស់។
គ្រូបង្វឹកក្បាច់គុនហាប់គីដូនៅអាមេរិករូបនេះបន្ថែមថា បច្ចុប្បន្នកម្រិតបច្ចេកទេសកីឡាហាប់គីដូកម្ពុជាកំពុងបោះជំហានឆ្ពោះទៅមុខពីមួយថ្ងៃទៅមួយថ្ងៃ បើទោះបីជាឧបករណ៍ប្រើប្រាស់នៅមានកម្រិត។ លោកសង្ឃឹមថា នាពេលអនាគត នឹងអាចមកបង្ហាត់ក្បាច់គុនមួយនេះនៅកម្ពុជាជាអចិន្ត្រយ៍។
ជាមួយគ្នានោះលោក គង់ ច័ន្ទធីណា អគ្គលេខាធិការសហព័ន្ធកីឡាខាងលើបានបញ្ជាក់ថា សិក្ខាសាលានេះមានសារៈសំខាន់ក្នុងចូលរួមចំណែកផ្ដល់ចំណេះដឹងថ្មីៗ ដល់សិក្ខាកាមដែលបានចូលរួម។ លោកសំគាល់ឃើញថា ក្បាច់គុនមួយនេះកំពុងត្រូវបានយុវជនចាប់អារម្មណ៍ច្រើនជាងពេលកន្លងទៅ។
ក្នុងការធ្វើសិក្ខាសាលានេះមានសិក្ខាកាមចូលរួមជាង៧០រូបមកពីក្លឹបចំនួន៥រួមមានក្លឹប Master Song, ក្លឹបប្រីដតុន បឹងត្របែក, ប្រីដតុន ស្ទឹងមានជ័យ, ក្លឹបកីឡាហាប់គីដួមកពីខេត្តបាត់ដំបង និង ក្លឹបឥន្ទ្រីយ៍៕
អត្ថបទ៖ ស្រី សុវណ្ណដារ៉ា