នំផ្លែអាយ មានប្រវត្តិមិននឹកស្មានដល់ គួរឲ្យចាប់អារម្មណ៍

2016-10-19 15:51:09
ចំនួនមតិ 0 | ចំនួនចែករំលែក 0

ចន្លោះមិនឃើញ

នំផ្លែអាយ ជាបង្អែមស្រស់មួយប្រភេទ ដែលបងប្អូនខ្មែរធ្វើដោយម្សៅអង្កដំណើបលញ់ស្រោបដុំស្ករត្នោតនៅខាងក្នុង បង្កើតបានជារសជាតិផ្អែមស្អិត គួរឲ្យចង់ពិសា។

នៅតាមតំបន់មួយចំនួន គេហៅឈ្មោះវាផ្សេងៗគ្នា ដូចជា នំខាំស្ករ នំបង្កប់ស្ករ ជាដើម ប៉ុន្តែ ឈ្មោះនំ "ផ្លែអាយ " មានឈ្មោះដើមថា នំបំពួនស្ករ។ នេះបើតាមឯកសារវចនានុក្រមខ្មែរសម្ដេចព្រះសង្ឃរាជ ជួន ណាត។ ពីព្រោះវាមានន័យត្រឹមត្រូវតាមអត្ថន័យរបស់នំ ដែលដុំស្ករត្នោតដាក់បង្កប់ខាងក្នុង។

តាមឯកសារដដែលបានឲ្យដឹងថា នំផ្លែអាយ ខ្មែរហៅឈ្មោះបាន៣យ៉ាងគឺ នំផ្លែអាយ នំកើតក្ដី ឬនំបំពួនស្ករ។ ចំពោះអត្ថន័យនៃឈ្មោះទាំងនោះគឺមានរឿងរ៉ាវទាក់ទងដូចខាងក្រោម៖

នំផ្លែអាយ៖ ចាស់ៗបានតំណាលប្រាប់ថា ក្នុងរជ្ជកាលនៃព្រះបាទអង្គឌួង គេច្រើនយកនំនេះទៅដាក់ភ្ជាប់លើមែកឈើ ឬមែកឫស្សីដែលគេកាត់យកមកដោតលើកំណាត់ដើមចេក។ គេភ្ជាប់នំនេះតម្រៀបគ្នា ស្រដៀងនឹងឈើមានផ្លែ រហូតគេសន្មតឈ្មោះថា នំផ្លែអាយ (គឺទុកដូចជាឈើផ្លែនៅអាយ)។

នំកើតក្ដី៖ តាមរឿងព្រេងមួយថា មានបុរសពីរនាក់ជាសម្លាញ់នឹងគ្នា កំពុងអង្គុយហូបនំនេះជាមួយគ្នា។ បុរសម្នាក់អង្គុយហូបតាមធម្មតា តែបុរសម្នាក់ទៀតហូបនំនេះដោយខាំចំពាក់កណ្ដាល ក៏ខ្ទាតទឹកស្ករខាងក្នុងបាញ់ត្រូវមុខបុរសម្នាក់ទៀត។ បុរសនោះខឹងក៏ងើបវាយតប់គ្នា កើតជាក្ដីប្ដឹងផ្ដល់គ្នា ទើបចៅក្រមឲ្យឈ្មោះបង្អែមនេះថាជា នំកើតក្ដី ចាប់តាំងពីពេលនោះមក។

ចំពោះពាក្យថា "នំកើតក្ដី " គេមិនសូវហៅឈ្មោះនេះទេ ព្រោះវាជាពាក្យសាមញ្ញ ដោយខ្មែរយើងនិយមហៅតែ នំបំពួនស្ករ និងនំផ្លែអាយនេះឯង៕