ការព្រួយបារម្ភ និងបញ្ហារបស់សិស្សក្នុងការជ្រើសរើសមុខវិជ្ជាសិក្សានៅមហាវិទ្យាល័យ

2016-10-25 20:23:21
ចំនួនមតិ 0 | ចំនួនចែករំលែក 0

ចន្លោះមិនឃើញ

សិស្សមួយចំនួន ដែលទើបតែប្រឡងជាប់សញ្ញាប័ត្រមធ្យមសិក្សាទុតិយភូមិ ឬបាក់ឌុបថ្មីៗ មានការព្រួយបារម្ភ និងពិបាកក្នុងការជ្រើសរើសមុខវិជ្ជារបស់ខ្លួន ដើម្បីយកមកសិក្សាបន្តនៅមហាវិទ្យាល័យ ពីព្រោះពួកគេមិនដឹងថាត្រូវជ្រើសរើសមុខវិជ្ជាអ្វី។

ទាំងអស់នេះ គឺផ្ដើមពីកង្វះខាតព័ត៌មាននៃការសិក្សានៅកម្រិតឧត្ដមសិក្សា ហើយធ្វើឲ្យសិស្សមួយចំនួនបានសម្រេចចិត្តជ្រើសរើសមុខវិជ្ជាទៅតាមក្តីប្រាថ្នារបស់ឪពុកម្ដាយ។ សិស្សខ្លះជ្រើសរើសទៅតាមការអូសទាញរបស់មិត្តភ័ក្តិ ដោយឡែកសិស្សមួយចំនួនទៀតបានសម្រេចចិត្តទៅតាមតម្រូវការនៃទីផ្សារនៅក្នុងប្រទេស។

យុវជន ហ៊ីង បូរី អាយុ១៩ឆ្នាំ មានស្រុកកំណើតនៅខេត្តរៀមរាប ដែលទើបប្រលងជាប់បាក់ឌុបថ្មីៗ បាននិយាយថា ដំបូងឡើយខ្លួនហាក់ដូចជាមានការព្រួយបារម្ភ និងពិបាកខ្លះដែរក្នុងការជ្រើសរើសមុខវិជ្ជាមកសិក្សាបន្ត តែដោយសារមានដុងទៅខាងគណិតវិទ្យា ក៏សម្រេចចិត្តជ្រើសរើសយកមុខវិជ្ជាគណិតវិទ្យាមកសិក្សាបន្តនៅសាកលវិទ្យាល័យភូមិន្ទភ្នំពេញម្ដងទៅ។

ដូចគ្នានេះដែរ យុវជន សុខ ជីវ័ន្ត ដែលបានសម្រេចចាប់យកមុខវិជ្ជាព័ត៌មានវិទ្យា មកសិក្សាបន្តនៅសាកលវិទ្យាល័យន័រតុន បានរៀបរាប់ថា ការដែលខ្លួនចាប់យកជំនាញនេះ គឺមានការជំរុញពីគ្រួសារ ដោយគាត់យល់ថា បច្ចុប្បន្ននេះគឺជាសម័យបច្ចេកវិទ្យា។ ដូច្នេះអ្វីគ្រប់យ៉ាងពឹងផ្នែកលើបណ្ដាញទំនាក់ទំនងតាមរយៈម៉ាស៊ីនកុំព្យូទ័រ និងគន្លឹះផ្សេងទៀតដែលដឹងមិនទាន់ច្បាស់។

ជីវ័ន្ត បានបន្តថា ដំបូងឡើយខ្លួនមានការពិបាកដែរក្នុងការសម្រេចចិត្តជ្រើសរើសមុខវិជ្ជាមករៀនបន្ត ដោយសារតែគិតថាបើសម្រេចចិត្តខុស វានឹងនាំឲ្យមានផលប៉ះពាល់ដល់ឱកាសការងារទៅអនាគតតែបន្ទាប់ពីមានការជំរុញពីគ្រួសារ ហើយជាចំណង់ចំណូលផងនោះ ជីវ័ន្ត ក៏សម្រេចចិត្តចាប់យកមុខវិជ្ជា IT តែម្ដង។

សម្រាប់ យុវតី ហូយ ផាណែត អាយុ ២១ឆ្នាំ មានស្រុកកំណើតនៅខេត្តកណ្ដាល បាននិយាយថា៖ "ពេលដែលខ្ញុំប្រលងជាប់បាក់ឌុប ខ្ញុំមានការពិបាក និងមានការរារែកចិត្ត ដោយពេលខ្លះចង់រៀនពេទ្យ ហើយពេលខ្លះទៀតគិតថាចង់រៀនផ្នែកអក្សរសាស្ត្រអង់គ្លេស ហើយក៏មានមិត្តភក្ភិខ្លះបានណែនាំខ្ញុំឲ្យជ្រើសរើសយកមុខវិជ្ជាធនាគារ និង ហិរញ្ញវត្ថុ"។

ផាណែត បានបន្តទៀតថា៖ "ក្នុងការរៀនពេទ្យត្រូវចំណាយថវិកាច្រើន ដោយគ្រួសារមិនមានសមត្ថភាព ម្យ៉ាងទៀតដោយមានអូសទាញពីមិត្តភ័ក្ដិផង ខ្ញុំក៏សម្រេចចិត្តចាប់យកមុខវិជ្ជាធនាគារ និង ហិរញ្ញវត្ថុ សិក្សាបន្តនៅសាកលវិទ្យាល័យចេនឡា ទាំងដែលចិត្តខ្លួនមិនចង់ រហូតមកដល់ពេលនេះខ្ញុំមានអារម្មណ៍ស្ដាយក្រោយ"។

ដូច្នេះការកង្វះខាតពីការទទួលបាននូវព័ត៌មាននៃការសិក្សានៅកម្រិតឧត្តមសិក្សារបស់សិស្ស ក៏ជាបញ្ហាមួយធ្វើឲ្យសិស្សជ្រើសរើសមុខវិជ្ជាខុស ដែលជាហេតុផលមួយនាំអោយពួកគេមិនបានទទួលជោគជ័យនៅក្នុងការសិក្សា និងជីវិត។

ក្នុងសិក្ខាសាលាស្ដីពី «ការតម្រង់ទិសលើមុខជំនាញថ្នាក់ឧត្ដមសិក្សា សម្រាប់សិស្សជាប់បាក់ឌុប និងការងារ» ប្រចាំឆ្នាំ២០១៦ កន្លងមកនេះ រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន បានលើកឡើងថា បញ្ហាប្រឈម ដែលជះឥទ្ធិពលដល់ឱកាសការងាររបស់សិស្សភាគច្រើនមកពីការជ្រើសរើសមុខជំនាញ ឬមុខវិជ្ជាខុសពេលសិក្សានៅសាកលវិទ្យាល័យ។

ក្នុងសិក្ខាសាលានោះដែរ រដ្ឋមន្ត្រីក្រសួងអប់រំក៏លើកទឹកចិត្តឲ្យសិស្សដែលជាប់បាក់ឌុប គួរសិក្សាជំនាញបច្ចេកទេសដូចជា វិទ្យាសាស្ត្រមូលដ្ឋាន ទេសចរណ៍ វិស្វកម្ម និងវិស័យកសិកម្មជាដើមព្រោះកម្ពុជានៅតែប្រឈមនឹងបញ្ហាកង្វះធនធានមនុស្សក្នុងវិស័យនេះ រីឯទីផ្សារការងារក៏កំពុងតែត្រូវការផងដែរ៕

អត្ថបទ៖ CCJ 