Mi Note 2 ជួយអ្នកគាំទ្រកាត់ចិត្ត Galaxy Note 7 បាន

2016-10-25 23:25:41
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកគាំទ្រ Galaxy Note 7 ច្បាស់ជានៅមានអារម្មណ៍ខូចចិត្តពេលដែលបានដឹងថា Samsung បញ្ឈប់ការផលិតស្មាតហ្វូនកំពូលមួយនេះ។ ប៉ុន្តែជាមួយវត្តមានរបស់ Mi Note 2 ដែលក្រុមហ៊ុន Xiaomi ទើបប្រកាសមុននេះប្រហែលជាអាចជួយអ្នកឲ្យកាត់ចិត្តពី Note 7 បាន។

រូបរាងខាងក្រោយរបស់ Mi Note 2 ស្រដៀងគ្នានឹង Galaxy Note 7 ដោយសារតែមានផ្ទាំងកញ្ចក់រៀងកោងទាំងផ្នែកខាងមុខ និង ខាងក្រោយ។ ផ្ទាំងអេក្រង់របស់ Mi Note 2 មានទំហំធំដល់ ៥,៧ អ៊ីញ ជាអេក្រង់ប្រភេទ OLED និង មានតួខ្លួនផលិតពីសារធាតុអាលុយមីញ៉ូម។ Mi Note 2 មានផ្ទុកដោយបន្ទះ Chip ជំនាន់ចុងក្រោយរបស់ Qualcomm គឺ Snapdragon 821 ដែលមានល្បឿន 2.35 GHz, មាន RAM ទំហំ 6 GB មានអង្គផ្ទុកទិន្នន័យម៉ាស៊ីនទំហំដល់ 128 GB និង មានថាមពលថ្ម 4070 mAh។

នៅពីក្រោយ Mi Note 2 មានបំពាក់កាមេរ៉ារបស់ក្រុមហ៊ុន Sony ទំហំដល់ទៅ 22.56 MP ដោយមានបច្ចេកវិទ្យារក្សាលំនឹងរូបភាពបែបអេឡិចត្រូនិក និង មានភ្លើង LED ចំនួន ២ គ្រាប់។ នៅពីមុខមានកាមេរ៉ា Selfie កម្រិត 8 MP ដែលមានមុខងារ Autofocus និង មាន Aperture f/2.0។

Mi Note 2 នឹងមានលក់ក្នុងជម្រើសពីរ ដោយប្រភេទទីមួយ មានអង្គផ្ទុកទិន្នន័យទំហំ 64 GB និង មាន RAM 4 GB តម្លៃប្រមាណ ៤១៣ ដុល្លារ។ ចំណែកប្រភេទទីពីរមានអង្គផ្ទុកទិន្នន័យទំហំ 128 GB និង មាន RAM 6 GB តម្លៃប្រមាណ ៤៨៧ ដុល្លារ។ Xiaomi នៅមិនទាន់បញ្ជាក់ពីកាលបរិច្ឆេទចេញលក់ស្មាតហ្វូនជំនាន់ថ្មីនេះនៅឡើយទេ៕