អនាគតទេសចរណ៍កម្ពុជាមិនអាចផ្ដាច់ចេញពីទេសចរចិន
- 2016-10-25 23:24:07
- ចំនួនមតិ 0 | ចំនួនចែករំលែក 0
អនាគតទេសចរណ៍កម្ពុជាមិនអាចផ្ដាច់ចេញពីទេសចរចិន
ចន្លោះមិនឃើញ
រដ្ឋមន្ត្រីនៃក្រសួងទេសចរណ៍លោក ថោង ខុន បានគូសបញ្ជាក់ថា អនាគតនៃទេសចរណ៍កម្ពុជាគឺមិនអាចកាត់ផ្ដាច់ចេញពីការស្រូបទាញកំណើននៃលំហូទេសចរចិននិងវិនិយោគិនចិនបានឡើយ។
វត្តមានទេសចរចិននៅកម្ពុជាបានជួយបង្កើនសេដ្ឋកិច្ចនិងជំរុញអភិវឌ្ឍន៍ទេសចរណ៍ឲ្យឆ្ពោះទៅមុខ តាមរយៈការបង្កើនការងារ ទីកន្លែងស្នាក់នៅរួមមានសណ្ឋាគារ ភោជនីយដ្ឋានជាដើម។ មិនតែប៉ុណ្ណោះរដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ លោក វង្សី វិស្សុត ធ្លាប់ថ្លែងថា សេដ្ឋកិច្ចកម្ពុជាមានទំនាក់ទំនងយ៉ាងខ្លាំងនឹងសេដ្ឋកិច្ចប្រទេសចិន តាមរយៈជំនួយអភិវឌ្ឍន៍ លំហូរវិនិយោគនិងភ្ញៀវទេសចរ។
ម្ល៉ោះហើយ លោក ថោង ខុន បញ្ជាក់ថាតាមរយៈ កិច្ចសហប្រតិបត្តិការល្អជាយុទ្ធសាស្ត្រនិងគ្រប់ជ្រុងជ្រោយរវាងកម្ពុជានិងចិន បានធ្វើឲ្យចំនួនអ្នកវិនិយោគចិន ក៏ដូចជាភ្ញៀវទេសចរចិនមកកម្ពុជាមានចំនួនកាន់តែច្រើនឡើង។
ទេសចរចិនជាទីផ្សារទេសចរណ៍ដ៏ធំក្នុងពិភពលោក។ បើនិយាយពីពាណិជ្ជកម្មចិនជាមួយប្រទេសនានាលើពិភពលោក បានកើនឡើងដល់ប្រមាណ ៤ទ្រីលានដុល្លារអាមេរិក ដែលបញ្ជាក់ឲ្យឃើញថាចិនជាដៃគូពាណិជ្ជកម្មឈានមុខគេនិងជាប្រភពកាន់តែសំខាន់នៃការវិនិយោគផ្ទាល់ពីបរទេសនៅទូទាំងពិភពលោក ក៏ដូចជាអាស៊ានលើគ្រប់វិស័យរួមទាំងវិស័យទេសចរណ៍ផងដែរ។
ដើម្បីបម្រើដល់សេចក្ដីត្រូវការរបស់ទេសចរចិន ក្រសួងទេសចរណ៍បានរៀបចំផែនការយុទ្ធសាស្ត្រ(២០១៦-២០២០) ពិសេសការដាក់ចេញនូវ សៀវភៅសស្តីពី China Ready សម្រាប់ទេសចរកម្ពុជា ព្រមទាំងគម្រោងបង្កើតមជ្ឈមណ្ឌលកម្ពុជា ចិន សំដៅត្រៀមទទួលស្វាគមន៍ភ្ញៀវទេសចរចិនយ៉ាងតិចឲ្យបាន ២លាននាក់នៅឆ្នាំ២០២០ទៀតផង។
លើសពីនេះ អំពីការសម្រួលការធ្វើដំណើរបានផ្ដល់ទិដ្ឋាការនៅពេលមកដល់ (Visa on Arrival) ទិដ្ឋាការអេឡិចត្រូនិច E-visa និងផ្ដល់ទិដ្ឋាការចេញចូលច្រើនដងសម្រាប់រយៈពេល១ឆ្នាំ ២ឆ្នាំ ៣ឆ្នាំដល់ទេសចរចិនផងដែរ៕
អត្ថបទ៖ លឹម សុនា