ប្រយ័ត្ន! ត្បូងឥឡូវមានប្រើជាតិគីមី អាចប៉ះពាល់សុខភាពអ្នកពាក់បាន

2016-10-29 19:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសារតែចរន្តនៃការប្រើប្រាស់ត្បូង មានការពេញនិយមខ្លាំងទាំងបរទេសនិងអ្នកក្នុងស្រុកផងនោះ បច្ចុប្បន្ននេះមានអ្នកលក់ត្បូងមួយចំនួនបានប្រើប្រាស់ជាតិគីមីធ្វើដើម្បីរចនាត្បូងនិងពន្លឺឱ្យទាក់ទាញកាន់តែស្អាត ប៉ុន្តែវាប៉ះពាល់ដល់សុខភាពអ្នកប្រើផងដែរ។

បើតាមលោក គី វាសនា ម្ចាស់កន្លែងលក់និងច្នៃត្បូងនៅខេត្តប៉ៃលិនបានបង្ហើបឱ្យដឹងថាការប្រើប្រាស់ត្បូងនៅពេលនេះ មិនអន់ជាងពេជ្រនោះទេ។ ដោយអ្នកប្រើប្រាស់ចូលចិត្តពាក់វា ព្រោះមានតម្លៃថោកជាងពេជ្រ ប៉ុន្តែបើនិយាយពីភ្លឺចែងចាំងវិញ ក៏មិនអន់ដែរ។ ភ្ញៀវនៅក្នុងស្រុកភាគច្រើន ចូលចិត្តម៉ូដកាន់តែចាំងកាន់តែល្អ ខណៈដែលអ្នកខ្លះមិនទាន់យល់ច្បាស់ពីត្បូងនៅឡើយទេ ប៉ុន្តែសម្រាប់ភ្ញៀវបរទេសវិញ គេចូលចិត្តតែបែបធម្មជាតិដែលអាចជំនួយដល់សុខភាពគេបាន។

ដោយសារតែកត្តានេះហើយ បានជាធ្វើឱ្យមានឈ្មួញមួយចំនួនមានល្បិចច្រើន ដោយអាចយកត្បូងមិនល្អ ទៅកែច្នៃ ដុតឱ្យចេញជាត្បូងមានពន្លឺនិងស្រស់ស្អាតបាន។ ការដុតប្រែពណ៌ត្បូងនោះ គឺពួកគេអាចបញ្ចូលជាតិគីមីឬថ្មកែវនៅក្នុងគ្រាប់ត្បូងនោះ ឱ្យចេញជាត្បូងមួយគ្រាប់ភ្លឺស្អាតខ្លាំងណាស់។ ទន្ទឹមនិងការទាក់ទាញនេះ លោក គី វាសនា បញ្ជាក់ថាវាក៏ប៉ះពាល់ដល់សុខភាពនៃអ្នកប្រើប្រាស់ដែរ ពោលគឺប្រើបានតែប៉ុន្មានខែ ជាតិគីមីនៅក្នុងត្បូងនោះនឹងជ្រាបចេញ ហើយអាចប៉ះពាល់ដល់ស្បែកមនុស្សបាន។

ជាដំណោះស្រាយ ប្រសិនបើប្រិយមិត្តចង់បានត្បូង១គ្រាប់ដែលល្អហើយមានសុវត្ថិភាពទៀតនោះ ត្រូវទៅរកកន្លែងដែលមានលិខិតចេញឱ្យត្រឹមត្រូវនៅពេលទិញ ព្រោះប្រសិនបើមានអ្វីកើតឡើង នោះអ្នកទិញអាចទៅទាក់ទងកន្លែងលក់វិញបាន៕