សេន ប៊ុនថេន « របួសប៉ុណ្ណឹង! មិនអាចឲ្យខ្ញុំបោះបង់អាជីពនេះបានទេ»

2016-10-31 17:20:30
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ជើងចាស់ សេន ប៊ុនថេន បានអះអាងពីជំហររបស់ខ្លួននឹងនៅតែបន្តអាជីពឈឺខ្លួនមួយនេះពោលរូបគេ គិតចង់ឡើងសង្វៀនវិញម្ដងទៀតក្រោយជាសះស្បើយរបួសរបូតសន្លាក់ដើមដៃ។

ជើងខ្លាំងប្រភេទទម្ងន់ធ្ងន់រូបនេះបានឲ្យដឹងថា របួសដៃរបស់គេ នឹងអាចជាសះស្បើយប្រហែលជាពីរឬបីខែទៀត។ បន្ទាប់មកទៀតនឹងឡើងសង្វៀនវិញ ក្រោយជាសះស្បើយដៃ ពីព្រោះរូបគេមើលឃើញថា ខ្លួននៅមានកម្លាំងកាយអាចវាយ៥ទឹកពេញបាន។

អ្នកលេងទម្ងន់ជើងរូបនេះបាននិយាយថា « របួសប៉ុណ្ណឹង! មិនអាចឲ្យខ្ញុំបោះបង់អាជីពនេះបានទេ។ ខ្ញុំខំសាងវាឡើងមកច្រើនឆ្នាំហើយ បើបោះបង់នៅពេលនេះស្ដាយណាស់ »។ ប៊ុនថេន បន្ថែមថា ឲ្យតែជាសះស្បើយភ្លាម នឹងប្រឹងប្រែងហ្វឹកហាត់ឡើងវិញ។

អ្នកប្រដាល់រូបនេះបានបង្ហាញពីជំនួយក្នុងការឧបត្ថម្ភមកលើខ្លួនពីសំណាក់អ្នកស្នេហាវិស័យប្រដាល់មួយចំនួនគឺបានជិត ៥រយដុល្លារអាមេរិក។ ចំណែកការចំណាយទៅលើការព្យាបាលវិញអស់ប្រហែលជា៣០០ដុល្លារអាមេរិក និងនៅមានទិញថ្នាំលេបនៅផ្ទះជាប្រចាំបន្ថែមទៀត។

សេន ប៊ុនថេន បានរងរបួសរបូតសន្លាក់ឆ្អឹងដើមដៃកាលពីថ្ងៃទី២៨ ខែតុលា ឆ្នាំ២០១៦ ពេលកំពុងប្រកួតជាមួយកីឡាករថៃ Dee Bunchoung ក្នុងកំឡុងពាក់កណ្ដាលទឹកទី៥នៅសង្វៀនអាស៊ីអាគ្នេយ៍ ដែលពេលនោះកីឡាករកម្ពុជារូបនេះចាញ់ដោយពិន្ទុ ក្រោយមកត្រូវបញ្ជូនទៅសង្គ្រោះបន្ទាន់ភ្លាមៗនៅមន្ទីរពេទ្យមិត្តភាពខ្មែរសូវៀត៕

អត្ថបទ៖ ស្រី សុវណ្ណដារ៉ា