គ្រូ Barca ថាចាញ់ Man City ព្រោះកីឡាកររបស់លោក បង្កកំហុសច្រើនពេក

2016-11-02 17:16:39
ចំនួនមតិ 0 | ចំនួនចែករំលែក 0

ចន្លោះមិនឃើញ

Luis Enrique អ្នកចាត់ការក្រុម Barcelona បានលើកឡើងថា ការបរាជ័យ ៣-១ ក្រោមថ្វីជើងក្រុមអង់គ្លេស Manchester City នៅ UEFA Champions League កីឡដ្ឋាន Etihad យប់មិញ ព្រោះតែកីឡាកររបស់លោក បង្កកំហុសផ្ទាល់ខ្លួនច្រើនពេក។

Luis Enrique អ្នកចាត់ការក្រុម Barcelona

ក្រុមយក្សអេស្ប៉ាញ បាននាំមុខ Man City ១-០ មុនបន្ទាប់ពី Lionel Messi ស៊ុតនៅនាទី២១ ប៉ុន្តែត្រូវក្រុមមេឃខៀវ តាមស្មើ ១-១ វិញ ដោយការស៊ុតរបស់ Ilkay Guendogan បន្ទាប់ពីខ្សែការពារ Sergi Roberto បង្កកំហុសបញ្ជូនបាល់មិនបានល្អនៅមុខទី ធ្វើឲ្យ Raheem Sterling ឆ្មក់យកបាល់បាន។ ម្ចាស់ផ្ទះបានថែម២គ្រាប់ទៀត នៅតង់ទី២ ដែលរកបានដោយ Kevin de Bruyne ហ្វ្រីឃីតនាទី៥១ និង Guendogan ស៊ុតគ្រាប់ទី៣ ឲ្យ Man City នាទី៧៤ ធ្វើឲ្យក្រុមអ្នកមានបុណ្យ បានត្រឹម០ពិន្ទុត្រឡប់ទៅផ្ទះវិញ។

ក្រោយចប់ការប្រកួត អ្នកចាត់ការសញ្ជាតិអេស្ប៉ាញ Enrique បាននិយាយថា៖ "យើងលេង៤០នាទីដំបូងយ៉ាងអស្ចារ្យ មានឱកាសរកគ្រាប់ច្រើន គ្រប់គ្រងបាល់ច្រើន ហើយពួកគេគ្មានឱកាសទេ។ ប៉ុន្តែយើងបង្កកំហុសស្ទើរតែរាប់មិនអស់ នៅតង់ទី២ និងគ្មានសំណាង។ ការបង្កកំហុស ពិតជាធ្វើឲ្យយើង ទទួលលទ្ធផលបរាជ័យក្នុងប្រកួតដូចនេះ។ យើងនឹងព្យាយាម យកឈ្នះទាំង២ប្រកួតដែលនៅសល់”៕