ណាហ្គាវើល នាំចូលកីឡាករកម្ពុជាបាន៣រូបហើយ ត្រៀមរដូវកាលថ្មី

2016-11-03 16:40:39
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក មាស ចាន់ណា គ្រូបង្វឹកក្លឹបណាហ្គាវើលបានធ្វើការនាំចូលកីឡាករមកពង្រឹងក្រុមរបស់ខ្លួនចំនួន៣រូបហើយ បើគិតត្រឹមថ្ងៃទី៣ ខែវិច្ឆិកា ឆ្នាំ២០១៦ ដើម្បីត្រៀមលេងលីគកំពូលកម្ពុជា និង Hun Sen Cup រដូវកាល២០១៧។

ក្លឹបបាល់ទាត់ណាហ្គាវើលទទួលបានចំណាត់ថ្នាក់លេខ ៣ក្នុងក្របខ័ណ្ឌកំពូលរបស់កម្ពុជា និងធ្លាក់ត្រឹមវគ្គ ៨ក្រុមចុងក្រោយក្នុងការប្រកួតពានរង្វាន់ Hun Sen Cup រដូវកាល២០១៦។ ដោយមើលឃើញពីចន្លោះប្រហោងរបស់ក្រុមលោក មាស ចាន់ណា បានធ្វើការនាំចូលកីឡាករល្អៗចំនួនបីរូបសម្រាប់ត្រៀមរដូវកាលថ្មីគឺ សួង វីរៈ, សំរឹទ្ធ សីហា, និង សុខ សេងតារា។

ទាក់ទងនឹងការនាំកីឡាករទាំងបីនាក់ខាងលើគ្រូបង្វឹករូបនេះបានឲ្យដឹងថា ខ្សែប្រយុទ្ធ សួង វីរៈ និងអ្នកចាំទី សំរឹទ្ធ សីហា មកពីក្លឹប Cambodia Tiger ស្របពេលខ្សែការពារកណ្ដាល សុខ សេងតារា មកពីក្លឹបអាស៊ីអឺរ៉ុប។ ចំពោះបច្ចេកទេសលោកមើលឃើញថា ពួកគេនឹងដើរតួយ៉ាងសំខាន់នារដូវកាលក្រោយ ដើម្បីបំពេញចន្លោះប្រហោងដែលក្លឹបមានសព្វថ្ងៃ។

លោកបន្ថែមថា កីឡាករ សួង វីរៈ ជាក្ដីសង្ឃឹមរបស់លោកក្នុងការប្រជែងទាំងលីគកំពូលកម្ពុជា និង Hun Sen Cup នារដូវកាលក្រោយ។ ខណៈពេលនេះកីឡាករទាំងបីរូបសុទ្ធសឹងតែត្រូវបានលោកកំពុងបង្ហាត់ និងបង្ហាញយុទ្ធសាស្ត្រថ្មីៗ។ លើសពីនេះលោកនៅមានគម្រោងនាំចូលកីឡាករបរទេស និងកម្ពុជាបន្ថែមទៀតនាពេលក្រោយ។

ជាមួយគ្នានោះគ្រូបង្វឹកដែលជួយណាហ្គាវើលទទួលបានជើងឯករងទាំងលីគកំពូលកម្ពុជា និង Hun Sen Cup កាលពីឆ្នាំ២០១៥ សូមធ្វើការស្នើទៅសហព័ន្ធកីឡាបាល់ទាត់កម្ពុជាមេត្តាផ្ដល់ព័ត៌មានពីកម្មវិធីប្រកួតរដូវកាលថ្មី២០១៧ និងការកំណត់ឲ្យប្រើប្រាស់កីឡាករបរទេស ដើម្បីធ្វើការត្រៀមខ្លួនឲ្យបានល្អ៕