“អូនអើយ! ថ្ងៃណាក៏ឃើញតែភ្ញៀវខាងថៃគេមកលេងរហូត តែខ្មែរយើងអត់សូវមានទេ” សម្ដីទាហានខ្មែរលើប្រាសាទតាក្របី
- 2016-11-07 21:57:00
- ចំនួនមតិ 0 | ចំនួនចែករំលែក 0
“អូនអើយ! ថ្ងៃណាក៏ឃើញតែភ្ញៀវខាងថៃគេមកលេងរហូត តែខ្មែរយើងអត់សូវមានទេ” សម្ដីទាហានខ្មែរលើប្រាសាទតាក្របី
ចន្លោះមិនឃើញ
ប្រាសាទតាក្របី ស្ថិតនៅក្នុងភូមិសែនជ័យ ឃុំគោកមន ស្រុកបន្ទាយអម្ពិល ខេត្តឧត្តរមានជ័យ ដោយប្រាសាទនេះស្ថិតនៅក្បែរនិងប្រាសាទតាមាន់តែម្ដង។ បើតាមទាហានយាមនៅប្រាសាទនេះ បានបញ្ជាក់ថារាល់ថ្ងៃមិនសូវមានប្រជាជនខ្មែរទៅលេងទេ ដោយភាគច្រើនសិស្សនិស្សិតខាងថៃទៅលេងរាល់ថ្ងៃ មិនដែលខានឡើយ។
លោក ថែន ធួន នាយទាហាននៅយាមលើប្រាសាទតាក្របីបានរៀបរាប់ដូច្នេះថា៖ “អូនអើយ! ម្ងៃៗ ឃើញតែភ្ញៀវខាងថៃគេមើលលេងរហូត ជាពិសេសសិស្សសាលាគេតែម្ដង ហើយខាងខ្មែរយើងវិញ មិនសូវមានអ្នកមកលេងទេ។ សឹងតែថ្ងៃខ្លះគ្មានផង។ ខាងគេមកម្ដងៗ ឡើងពេញៗ មានដល់ថ្ងៃខ្លះ២ ៣ពាន់នាក់នោះ។ បងគ្មានអីទេ ក្រៅពីចង់ឃើញបងប្អូនយើងមកលេងផង ព្រោះនេះជារបស់ខ្មែរ មិនមែនរបស់ថៃទេ”។
មូលហេតុដែលមិនសូវមានអ្នកទៅលេងនេះ ត្រូវបានគេគិតឃើញថាតំបន់នេះធ្លាប់ជាតំបន់ប្រយុទ្ធគ្នាខ្លាំងរវាងកងទ័ពកម្ពុជា និងថៃកាលពីជំលោះគ្នាក្នុងឆ្នាំ២០០៨កន្លងទៅ។ ខណៈដែលភ្ញៀវមួយចំនួនខ្លាចមិនមានសុវត្ថិភាពទើបមិនសូវហានឡើងទៅលេងនៅលើប្រាសាទនេះទេ។
ចំពោះរឿងសុវត្ថិភាពនេះដែរ នាយទាហាន ថែន ធួន បានបញ្ជាក់ថាគ្មានអ្វីត្រូវខ្លាចនោះទេ ព្រោះបច្ចុប្បន្នសភាពការបានត្រលប់ទៅរកសន្តិភាពវិញហើយ បើទោះជានៅលើប្រាសាទមានទាហានថៃ២នាក់និងខ្មែរ២នាក់នៅយាមក៏ដោយ។
“ទៅខ្លាចអីអូន! នៅនេះសុវត្ថិភាពណាស់។ ទាហានថៃនិងខ្មែរ យាមនៅនេះដេក ស៊ី ជាមួយគ្នានិង គ្មានអីទេ យើងរាប់អានគ្នាដូចបងប្អូនតើ។ កុំឱ្យតែយើងទៅចូលដីគេទៅបានឃើញ ព្រោះគេដាក់បម្រាមដែរ។ ហើយបើច្រឡំដើរចូលទៅក៏គ្មានអីដែរ គេហៅយើងឱ្យបកក្រោយវិញ តាប៉ុណ្ណឹង”។
ប្រសាទតាក្របី កាលពីមុនមានឈ្មោះថាប្រាសាទព្រះតង្វាយ ហើយប្រាសាទនេះត្រូវបានកសាងឡើង ដើម្បីឧទ្ទិសដល់ព្រះឥសូរ ដូចទៅនឹងប្រាសាទព្រះវិហារ ប្រាសាទតាមាន់ដែរ៕
អត្ថបទ៖ មុន្នី រម្យ