ទ័ពកំពុងធ្វើតេស្តរកកីឡាករបរទេសខ្លាំងដូច Cheo និង Kim បន្ថែមទៀត
- 2016-11-22 07:44:39
- ចំនួនមតិ 0 | ចំនួនចែករំលែក 0
ទ័ពកំពុងធ្វើតេស្តរកកីឡាករបរទេសខ្លាំងដូច Cheo និង Kim បន្ថែមទៀត
ចន្លោះមិនឃើញ
ក្លឹបបាល់ទាត់ក្រសួងការពារជាតិ (ទ័ព) កំពុងធ្វើតេស្តទៅលើសមត្ថភាពកីឡាករមកពីកូរ៉េខាងត្បូងចំនួនពីររូប ដែលសុទ្ធតែជាខ្សែប្រយុទ្ធមកជួយក្រុមរដូវកាលក្រោយ២០១៧ ហើយការជ្រើសរើសរបស់ពួកគេគឺចង់បានខ្លាំងដូចកីឡាករកូរ៉េខាងជើង Kim Kyong Hun និង Cheo Myong Ho។
បើតាមការឲ្យដឹងពីលោក ទេព ឡុងរចនា គ្រូបង្វឹកក្រុមខាងលើថា លោកកំពុងធ្វើតេស្តទៅលើកីឡាករមកពីកូរ៉េខាងត្បូងចំនួនពីររូប ដោយបានដាក់ឲ្យលេងដើម្បីមើលជើងកាលប្រកួតមិត្តភាពកន្លងទៅជាមួយបឹងកេត។ បន្ទាប់មកទៀតក្លឹបជើងឯករងលីគកំពូលកម្ពុជារដូវកាលមុនមួយនេះ នឹងដាក់កីឡាករបរទេសពីររូបនេះឲ្យចូលរួមប្រកួតមិត្តភាពជាមួយណាហ្គាវើលមួយប្រកួតទៀត។
គ្រូបង្វឹករូបនេះបញ្ជាក់ថា កម្លាំងថ្មីរបស់ទ័ពពីររូបក្រោយនេះត្រូវតែមានសមត្ថភាពប្រហាក់ប្រហែល ទៅនឹងកីឡាករកូរ៉េខាងជើង Kim Kyong Hun និង Cheo Myong Ho ដែលជាកំពូលកីឡាកររបស់ទ័ពកាលពីរដូវកាលមុន ពុំដូច្នេះទេលោក នឹងមិនចុះកុងត្រាទទួលឡើយ។ ចំណុចសំខាន់ដែលធ្វើឲ្យលោកចង់បានកីឡាករថ្មី ហើយខ្លាំងដូចកូនក្រុមមកពីកូរ៉េខាងជើង ពីព្រោះចង់ឲ្យទម្រង់លេងរបស់ក្រុមរដូវកាលក្រោយល្អស្មើគ្មានចន្លោះប្រហោងលើទីលាន។
ក្លឹបបាល់ទាត់ក្រសួងការពារជាតិបាននាំយកកីឡាករកូរ៉េខាងត្បូងពីររូបនេះចំនួន ១សប្ដាហ៍មកហើយ។ ទន្ទឹមនឹងនោះក្លឹបបានដាក់កីឡាករពីររូបនេះឲ្យលេងជួយទ័ពយកឈ្នះបឹងកេតក្នុងជំនួបមិត្តភាព ២-០កាលពីពេលថ្មីៗនេះ។ ប្រកួតបន្ទាប់ក្លឹបជើងឯក Hun Sen Cup ២០១៦ មួយនេះ នឹងដាក់ពួកគេឲ្យលេងម្ដងទៀតនាថ្ងៃសុក្រទី ២៥ ខែវិច្ឆិកានេះក្នុងជំនួបមិត្តភាពរវាង ទ័ព និង ណាហ្គាវើល ដើម្បីមើលសមត្ថភាពលើកចុងក្រោយ៕